OSHILESHWA 8
Josia okwa li e na ookuume aawanawa
Sho to tala, mbela oshidhigu okulonga shoka shu uka?— Aantu oyendji ohaya dhiladhila kutya osho. Ombiimbeli otayi popi kutya osha li oshidhigu noonkondo kokamati kedhina Josia okulonga shoka shu uka. Ihe okwa li e na ookuume aawanawa mboka ya li ye mu kwathele. Natu ilonge oshindji kombinga yaJosia nosho wo ookuume ke.
He yaJosia okwa li Amon, omukwaniilwa gwaJuda. Amon okwa li omuntu omwiinayi noha simaneke iimenka. Sho he yaJosia a si, Josia okwa ningi omukwaniilwa gwaJuda. Ihe okwa li owala e na oomvula hetatu. Oto dhiladhila kutya okwa li omwiinayi ngaashi he?— Aawe, hasho nando.
Sefanja okwa li a londodha aantu kaaya longele iimenka
Nokuli naasho Josia a li okanona okwa li a hala okuvulika kuJehova. Nomolwaashono a hogolola okukala nookuume mboka ye hole Jehova. Noya li ye mu kwathele a ninge shoka shu uka. Yamwe yomookuume kaJosia oolye?
Gumwe oSefanja. Sefanja okwa li omupolofeti ngoka a li a londodha aantu yaJuda kutya otaya ka ningilwa iinima iiwinayi ngele otaya galikana iikalunga. Josia okwa li a pulakene kuSefanja e ta kala ha galikana Jehova, pehala lyiimenka.
Omukwawo oJeremia. Okwa li konyala e thike pamwe naJosia, naasho taya putuka oya li aashiinda. Oya li lela ookuume kopothingo, molwaashoka sho Josia a si, Jeremia okwa li a nyola eimbilo tali popi nkene a yuulukwa Josia. Jeremia naJosia oya li ya kwathelathana ya longe shoka shu uka noya vulike kuJehova.
Josia naJeremia oya li ya kwathelathana ya longe shoka shu uka
Oto ilongo mo shike moshiholelwa shaJosia?— Nokuli naasho Josia a li okamatyona, okwa li a hala okulonga shoka shu uka. Okwa li e shi shi kutya oku na okukala nookuume mboka ye hole Jehova. Hogolola ookuume mboka haya longele Jehova mboka taye ke ku kwathela wu longe shoka shu uka.
LESHA MOMBIIMBELI YOYE
-
2 Ondjalulo 33:21-25; 34:1, 2; 35:25
