1. Openi tatu vulu okwiilonga shi na ko nasha nonakuyiwa?

MBELA owa tala nale oonkundana ko-TV nenge wa pulakena oonkundana koradio e to ipula to ti: ‘Uuyuni mbuka owu uka peni?’ Iinima yinikitha oluhodhi otayi ningwa ombaadhilila noinaashi tegelelwa nomolwaashono kapu na omuntu ngoka ta vulu okutseya shoka tashi ka ningwa monakuyiwa, nokuli nando omo mesiku tali landula. (Jakob 4:14) Ihe Jehova okwe shi tseya. (Jesaja 46:10) Oohapu dhe, Ombiimbeli, odha hunganeke okuza nalenale iinima iiwinayi mbyoka tayi ningwa methimbo lyetu nosho wo iinima iiwanawa mbyoka tayi ka ningwa monakuyiwa yi li popepi.

2, 3. Epulo lini aalongwa ya li ya pula Jesus, nokwa li e ya yamukula ngiini?

² Jesus Kristus okwa popi shi na ko nasha nUukwaniilwa waKalunga, mboka tau ka hulitha po uukolokoshi nokuninga evi oparadisa. (Lukas 4:43, KB) Aantu oya li ya hala okutseya kutya Uukwaniilwa owa li tau ke ya uunake. Aalongwa yaJesus oya li nokuli ye mu pula ya ti: ‘Endhindhiliko lyokuya kwoye nolyehulilo lyuuyuni olini?’ (Mateus 24:3, OB-1954) Jesus okwe ya yamukula ta ti kutya oJehova Kalunga awike a tseya naanaa kutya ehulilo lyuuyuni mbuka otali ke ya uunake. (Mateus 24:36) Ihe Jesus okwa hunganeke iinima mbyoka ya li tayi ka ningwa owala  manga Uukwaniilwa inaau etela aantu ombili negameno lyashili. Shoka a hunganeke otashi ningwa ngashingeyi.

³ Manga inaatu konakona shoka tashi ulike kutya otu li pethimbo ‘lyehulilo lyuuyuni,’ natu konakoneni paufupi shi na ko nasha niita mbyoka inaayi monika nando onale komuntu gwontumba. Oya kondjwa megulu kaashi wetike, ihe iilanduliko yayo oye tu guma.

4, 5. (a) Oshike sha li sha ningwa megulu nziya sho Jesus a ningi Omukwaniilwa? (b) PaHololo 12:12, oshike sha li tashi ke etithwa kiita mbyoka ya kondjwa megulu?

⁴ Ontopolwa ya tetekele yembo ndika oya yelitha kutya Jesus Kristus okwa ninga Omukwaniilwa megulu mo 1914. (Daniel 7:13, 14) Nziya sho Jesus a ningi Omukwaniilwa, okwa katuka onkatu. Ombiimbeli otayi ti: “Megulu omwa tukuluka olugodhi. Mikael [edhina limwe lyaJesus] naayengeli ye oya kondjitha oshikoko [Satana Ondiaboli] pamwe naayengeli yasho.” * Satana naayengeli ye aawinayi, oompwidhuli, oya sindwa miita moka e tayu umbwa mo megulu, yu umbilwa kombanda yevi. Aamati yaKalunga yopambepo aadhiginini oya li ya nyanyukwa sho Satana noompwidhuli dhe ya tidhwa mo megulu. Ihe aantu kaya li ya nyanyukwa. Pehala lyaashono, Ombiimbeli oya hunganeke tayi ti: “[Yaye evi nefuta, OB-1954]. Oshoka omuhindadhi okwa kulukile kune u udha ondjahi, sho e shi shi kutya oku na ko ashike okathimbo okafupi kowala.”—Ehololo 12:7, 9, 12.

⁵ Ndhindhilika kutya oshizemo shiita mbyoka ya kondjwa megulu osha li ngiini. Molwaashoka Satana okwa li a geya noonkondo, okwa li te ke etela mboka ye li kombanda yevi ooyaye nenge omaupyakadhi. Ngaashi to ke shi mona, otu li ngashingeyi methimbo ndyoka lyomaupyakadhi. Ihe itali ka kala po ethimbo ele—otali ka kala po “okathimbo okafupi kowala.” Satana naye oku shi shi nokuli. Ombiimbeli otayi ulike kethimbo ndyoka kutya oli li ‘omasiku gahugunina.’ (2 Timoteus 3:1, OB-1954) Inatu nyanyukwa tuu sho masiku Kalunga ta ka hulitha po  enwethomo lyOndiaboli kombada yevi alihe! Natu konakoneni yimwe yomiinima ya hunganekwa mOmbiimbeli mbyoka tayi ningwa ngashingeyi. Shoka otashi ulike kutya otu li momasiku gahugunina nosho wo kutya Uukwaniilwa waKalunga masiku otau ke etela mboka ye hole Jehova omalaleko nuuyamba taga kalelele. Tango natu konakoneni ano iiningwanima ine yi na ko nasha nendhindhiliko ndyoka Jesus a ti kutya olyo tali ka ndhindhilikitha ethimbo ndyoka tu li mulyo.

6, 7. Ongiini oohapu dhaJesus dhi na ko nasha niita nondjala tadhi gwanithwa nena?

⁶ “Iigwana otayi ka thikama okukondjithathana, iilongo otayi ka matukilathana.” (Mateus 24:7) Aantu omamiliyona oya li ya dhipagwa miita methelemumvo lya piti. Omunandjokonona gumwe Omubritania okwa nyola a ti: “Methelemumvo eti-20, omwa li mwa dhipagwa aantu oyendji mondjokonona ayihe. . . . Olya li ethelemumvo moka mwa kala tamu kondjwa iita konyala ethimbo alihe nopwa li owala oompito oonshona sho kaapwa li iita.” Olopota ya za kehangano ndyoka hali konakona iiningwanima yomuuyuni oya ti: “Omuyalu gwaantu mboka ya ninga iihakanwa yiita methelemumvo [eti-20] ogu thike pomuyalu gwaantu mboka ya sa miita okuza methelemumvo lyotango AD sigo omo 1899, gwi indjipalekwa lutatu.” Aantu ye vulithe pomamiliyona 100 oya sa omolwiita  okuza mo 1914. Aantu omamiliyona oya mona iihuna molwaashoka ya silwa aaholike yawo miita. Otashi vulika nangoye wa silwa omuholike pamukalo gwa tya ngaaka.

⁷ ‘Otaku ke ya ondjala.’ (Mateus 24:7) Aanongononi otaya ti kutya okulongwa kwiikulya okwi indjipala noonkondo muule woomvula 30 dha piti. Ihe nando ongaaka, ondjala opo yi li natango molwaashoka aantu oyendji kaye na iimaliwa ya gwana yokulanda iikulya nenge omapya moka taya vulu okukuna iikunwa. Miilongo mbyoka opo tayi putuka, aantu ye vulithe pomamiliyona eyuvi ohaya hupu owala modola yimwe yaAmerika mesiku nenge koshimaliwa oshishona shi vulike kwaashoka. Oyendji yomuyo oya konenwa kondjala. Ehangano lyUukalinawa mUuyuni olya tengeneke kutya omanyutu ogo unene haga dhipaga aanona ye vulithe pomamiliyona gatano omumvo kehe.

8, 9. Oshike tashi ulike kutya omahunganeko gaJesus ge na ko nasha nomakakamo gevi nosho wo omalega oga gwanithwa?

⁸ “Otaku ke ya omakakamo gevi omatilithi.” (Lukas 21:11) Ehangano lyaatseyivi yokoAmerika olya ti kutya omumvo kehe okwa tegelelwa pu ningwe omakakamo gevi omanene guupokati wu li 19. Omakakamo gevi ngoka okwa tegelelwa ga kale ge na oonkondo okuteyagula po omatungo nokutendeka evi. Konyala omumvo kehe opwa holoka omakakamo gevi omanene ngoka ga hanagula po thiluthilu omatungo. Uuyelele mboka wu li  po otawu ulike kutya omakakamo gevi oga faalela oomwenyo dhaantu ye vulithe poomiliyona mbali okuza mo 1900. Onzo yimwe yomauyelele otayi ti: “Ehumokomeho ndyoka lya ningwa po olya shonopeka owala kashona omwaalu gwantu mboka haya si mugo.”

⁹ ‘Otaku ke ya omalega.’ (Lukas 21:11) Nonando opwa ningwa omahumokomeho muunamiti, aantu otaya hepekwa natango komikithi ndhoka dha kala ko nale naandhoka opo dhe ya. Olopota yimwe otayi ti kutya omikithi 20 dha tseyika nawa, mwa kwatelwa o-TB, omalaria nosho wo oshimela, odhi indjipala muule woomvula omulongo opo dha zi ko, nadhimwe otadhi nyengana okupangwa. Opwa holoka nokuli omikithi 30 lwaampono omipe. Dhimwe dhomudho kadhi na natango epango nohadhi dhipaga aantu.

10. Iikala yini mbyoka ya hunganekwa muTimoteus omutiyali 3:1-5 u wete maantu nena?

¹⁰ Kakele kokupopya shi na ko nasha niiningwanima yontumba yuuyuni, Ombiimbeli oya hunganeke kutya omasiku gahugunina otaga ka ndhindhilikilwa wo kelunduluko miikala yaantu. Omuyapostoli Paulus okwa hokolola nkene aantu oyendji taya ka kala ye li. MuTimoteus omutiyali 3:1-5 (OB-1954), otatu lesha mo taku tiwa: ‘Momasiku gahugunina otaku ya omathimbo  omadhigu.’ Paulus okwa tumbula yimwe yomiikala yaantu, a ti kutya otaya ka kala

• yi ihole

• ye hole eliko

• ihaa vulika kaakuluntu

• ihaa pandula

• kaaye na ohole

• aakaaneidhiliko

• aadhudhu

• ye hole olundundu peha lyokuhola Kalunga

• oyo ye na emoniko lyowala lyetilokalunga, ihe oonkondo dhalyo ye dhi idhimbike

11. Episalomi 92:7 otali hokolola shike shoka tashi ka ningilwa aakolokoshi?

¹¹ Mbela aantu momudhingoloko gweni osho ye li ngawo? Kapu na omalimbililo kutya osho ye li ngawo. Kehe pamwe opu na aantu mboka ye na iikala iiwinayi. Shoka otashi ulike kutya Kalunga ota ka katuka onkatu masiku, molwaashoka Ombiimbeli otayi ti: “Aakaanakalunga nando naa kale muulinawa ya fa omwiidhi omutalala, aakolokoshi nando naa hupe nawa, ayehe otaa ka dhimwa po thilu.”—Episalomi 92:7.

12, 13. Ongiini ‘ontseyo’ yi indjipala pethimbo ndika ‘lyehulilo lyuuyuni’?

¹² Omasiku gahugunina ogu udha  shili omaupyakadhi, ngaashi naanaa Ombiimbeli ya hunganeke. Ihe muuyuni mbuka wu udha omaupyakadhi omu na iiningwanima yinyanyudha mokati kaalongeli yaJehova.

¹³ Embo lyOmbiimbeli lyaDaniel olya hunganeke tali ti: ‘Ontseyo otayi ki indjipala.’ Ndjika oyo ontseyo yashili kombinga yaKalunga. Mbela shoka otashi ka ningwa uunake? ‘Opehulilo lyuuyuni.’ (Daniel 12:4) Unene tuu okuza mo 1914, Jehova okwa kwathele mboka ye na lela ehalo oku mu longela ya mone euvoko lyomuule lyokuuva ko Ombiimbeli. Oyu uva ko nawa oshili ya simana yi na ko nasha nedhina lyaKalunga nomalalakano ge, ekuliloyambo lyaJesus Kristus, onkalo yoonakusa nosho wo eyumuko. Kakele kaashono, aalongeli yaJehova oyi ilonga nkene ye na okukala nonkalamwenyo ndjoka tayi ye etele uuwanawa notayi mu simanekitha. Oya mona wo euvoko lya yela li na ko nasha nonkandangala ndjoka tayi dhanwa kUukwaniilwa waKalunga nosho wo nkene tau ku ukitha iinima kombanda yevi. Mbela ohaya longitha ngiini ontseyo ndjoka? Epulo ndyoka otali tu eta pehunganeko lilwe natango ndyoka tali gwanithwa momasiku ngaka gahugunina.

14. Onkundana ombwanawa yUukwaniilwa otayi uvithwa shi thike peni nena, noolye taye yi uvitha?

¹⁴ Jesus Kristus okwa popi mehunganeko lye li na ko nasha “nehulilo lyuuyuni” waSatana, a ti: ‘Elaka ndika etoye [lyUukwaniilwa, KB] otali ka uvithilwa aantu ayehe.’ (Mateus 24:3, 14) Elaka etoye nenge onkundana ombwanawa yUukwaniilwa ndjono tayi yelitha kutya Uukwaniilwa oshike, shoka tau ka ninga nosho wo kutya ongiini tatu vulu okumona omalaleko nuuyamba gawo, otayi uvithwa muuyuni auhe miilongo yi vulithe 230 nomomalaka ge vulithe 400. Oonzapo dhaJehova omamiliyona otadhi uvitha nuulaadhi onkundana ombwanawa yUukwaniilwa. Odha za ‘momihoko adhihe, momaludhi agehe, miigwana ayihe nomomalaka agehe.’ (Ehololo 7:9) Oonzapo ohadhi ningi omakonakonombiimbeli gopegumbo oshali pamwe nomamiliyona gaantu mboka ya hala okutseya kutya omalongo gOmbiimbeli ogeni naanaa. Egwanitho lyehunganeko ndyoka kali shi tuu ekumithi, unene tuu sho Jesus a hunganeke kutya Aakriste yashili otaya ka “tondwa kwaayehe”!—Lukas 21:17.

15. (a) Mbela owi itaala kutya otu li momasiku gahugunina, nomolwashike? (b) “Ehulilo” otali ka tya shike kwaamboka taya pataneke Jehova nosho wo kwaamboka taya vulika kepangelo lyUukwaniilwa we?

¹⁵ Molwaashoka omahunganeko ogendji gOmbiimbeli otaga gwanithwa nena, mbela ino zimina nando kutya otu li momasiku gahugunina? Ngele onkundana ombwanawa yu uvithwa sigo Jehova ta ti osha gwana, “ehulilo” otali ke ya shili. (Mateus 24:14) “Ehulilo” olyo ethimbo ndyoka Kalunga ta ka yogola ko uukolokoshi kombada yevi. Opo Jehova a hanagule po ayehe mboka taye mu pataneke owina, ota ka longitha Jesus nosho wo aayengeli aanankondo. (2 Aatessalonika 1:6-9) Satana noompwidhuli dhe itaya ka pukitha we aantu. Konima yaashono, Uukwaniilwa waKalunga otau ke etela omalaleko nuuyamba aantu ayehe mboka taya vulika kepangelo lyawo li li pauyuuki.—Ehololo 20:1-3; 21:3-5.

16. Otashi ka kala shi li pandunge u ninge shike?

¹⁶ Molwaashoka ehulilo lyonkalelo yaSatana oli li popepi, otwa pumbwa okwiipula ngeyi: ‘Mbela oshike ndi na okukala tandi ningi?’ Oshi li pandunge okutsikila okwiilonga oshindji shi na ko nasha naJehova naashoka a tegelela tu ninge. (Johannes 17:3) Kala omukonakoni gwOmbiimbeli a mana mo. Shi ninga omukalondjigilile gwoye okweendathana naamboka taya kambadhala okulonga ehalo lyaJehova. (Aahebeli 10:24, 25) Mona ontseyo oyindji ndjoka Jehova Kalunga ta gandja kaantu muuyuni auhe, e to ningi omalunduluko ga pumbiwa monkalamwenyo yoye opo u kale wa hokiwa kuye.—Jakob 4:8.

17. Omolwashike ehanagulo lyaakolokoshi tali ka adha aantu oyendji inaashi tegelelwa?

¹⁷ Jesus okwa hunganeke kutya aantu oyendji otaye ki ipwililikila uunzapo mboka kutya otu li momasiku gahugunina. Okuhanagulwa po kwaakolokoshi otaku ke ya ombaadhilila. Ngaashi omufuthi he ya uusiku, ehanagulo otali ka adha aantu oyendji inaashi tegelelwa. (1 Aatessalonika 5:2) Jesus okwa londodha a ti: “Ngaashi sha li pethimbo lyaNoowa, osho tuu taku ka kala, uuna Omuna gwOmuntu te ya. Ngaashi aantu  ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noowa a yi monguluwato, yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya.”—Mateus 24:37-39.

18. Elondodho lyaJesus lini tu na okupulakena kulyo?

¹⁸ Onkee ano Jesus okwa li a lombwele aapulakeni ye a ti: “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu [yopauyuni], opo esiku ndyoka lyaaye mú adhe ombadhilila. Oshoka otali ya ongomwigo, tali akele aantu ayehe kombanda yevi alihe. Tonateni, ne mu galikane ethimbo kehe, mu mone oonkondo dhoku mú pititha mumbika ayihe tayi ka ningwa, nokuthikama [mwa hokiwa] koshipala shOmuna gwOmuntu.” (Lukas 21:34-36) Oshi li pandunge okupulakena koohapu dhaJesus. Omolwashike mbela? Omolwaashoka mboka ya hokiwa kuJehova Kalunga nosho wo ‘kOmuna gwOmuntu,’ Jesus Kristus, oye na etegameno lyoku ka hupa pehulilo lyuuyuni waSatana nokukala nomwenyo sigo aluhe muuyuni uupe uukumithi mboka u li popepi.—Johannes 3:16; 2 Petrus 3:13.