Aayambi aakuluntu oya fala Jesus kuuwa womupangeli Pilatus. Okwe ya pula a ti: ‘Omulumentu nguno otamu mu tamaneke a ninga shike?’ Oya yamukula ya ti: ‘Ota ti kutya ye omukwaniilwa.’ Pilatus okwa pula Jesus a ti: ‘Ongoye Omukwaniilwa gwAajuda?’ Jesus okwa yamukula a ti: ‘Uukwaniilwa wandje kawu shi womuuyuni mbuka.’

Pilatus okwa tumu Jesus kuHerodes, omupangeli gwaGalilea, opo a tale ngele ote mu mono epuko lyasha. Herodes ka li a mono Jesus epuko lyasha, nokwe mu shunitha kuPilatus. Opo ihe Pilatus okwa lombwele ongundu yaantu a ti: ‘Ngame naHerodes inatu mona ondjo yasha momulumentu nguka. Otandi mu mangulula.’ Ongundu oyi igidha ya ti: ‘Mu dhipaga! Mu dhipaga!’ Aakwiita oya dhenge Jesus nongola, oye mu hiyile omayeye noye mu dhenge noongonyo. Oya ningi oshishani shomakwega noye shi mu zaleke komutse, e taye mu sheke taya ti: “We ya po, omukwaniilwa gwAajuda!” Opo nduno Pilatus okwa lombwele ongundu yaantu a ti: ‘Kandi wete ondjo yasha momulumentu nguka.’ Ihe oyi igidha ya ti: ‘Na alelwe komuti gwomahepeko!’ Onkee ano, Pilatus okwe mu gandja a ka dhipagwe.

Aakwiita oya fala Jesus kehala hali ithanwa Golgata. Oye mu alele komuti gwomahepeko, e taye gu thikameke. Jesus okwa galikana a ti: ‘Tate, ya dhimina po, oshoka kaye shi shoka taya ningi.’ Aantu oye mu sheke taya ti: ‘Ngele ngoye Omuna gwaKalunga, za ko komuti gwomahepeko, ngoye wi ihupithe.’

Gumwe gwomaakolokoshi mboka ya li ya alelwa pamwe naye, okwa ti: “Dhimbulukwa ndje, ngele wa thiki mOshilongo shoye.” Jesus okwe mu uvanekele a ti: “Oto ka kala pamwe nangame mOparadisa.” Pokati komutenya moshilongo ashihe omwa ningi omilema, ndhoka dha kala ko oowili ndatu. Aalongwa yaJesus yamwe, mwa kwatelwa yina Maria, oya li ya thikama popepi nomuti gwomahepeko. Jesus okwa lombwele omulongwa gwe Johannes kutya nyoko, Maria, oye ngo, mu sila oshimpwiyu.

Hugunina, Jesus okwa ti: “Ayihe ya gwanithwa!” Okwa sizimana, e ta fudha mo omufudho gwe gwahugunina. Pethimbo mpono, opwa ningwa ekakamo lyevi enene. Opo ihe elapi lyomotempeli ndyoka lya li pokati kUuyapuki nUuyapukielela, olya tuuka pokati. Omukuluntu gwaakwiita okwa ti: ‘Nguka okwa li Omuna gwaKalunga shili.’