Moshilongo Uz, omwa li mwa kala omulumentu ha longele Jehova. Edhina lye oJob. Okwa li omulumentu omuyamba lela e na aanegumbo oyendji. Job okwa li omunalukeno, ha kwathele oohepele, aaselekadhi nosho wo oothigwa. Mbela shoka otashi ti kutya ka li ta vulu okwaadhika komaupyakadhi gasha, molwaashono a li ha longo shoka shu uka?

Job ka li e shi ngele ota vulu okwaadhika kuupyakadhi, ihe Satana Omuhindadhi okwa li e shi kutya Job omudhiginini. Jehova okwa ti kuSatana: ‘Ino mona omuntu gwandje Job? Kombanda yevi kaku na omuntu e shi okwiinekelwa e mu fa. Oha pulakene ndje noha longo shoka shu uka.’ Satana okwa yamukula a ti: ‘Osho, Job oha vulika kungoye, molwaashono oho mu gamene nowe mu yambeka. Owe mu pe ehala niimuna. Ngele owa kutha po ayihe mbyoka e yi na, ote etha po oku ku longela.’ Jehova okwa ti: ‘Oto vulu okuyeleka Job, ihe ino mu dhipaga.’ Mbela omolwashike Jehova e etha Satana a makele Job? Okwa li e shi kutya Job ite ke etha po uudhiginini we.

Satana okwa tameke okumakela Job niiponga oyindji. Tango, okwa tumu aantu mboka hayi ithanwa Aasaba, ya yake po oongombe nuusino we. Konima yethimbo, omulilo ogwa yonagula po oonzi adhihe dhaJob. Ongundu yimwe yaantu hayi ithanwa Aababilonia, oya yaka po oongamelo dhe. Aapiya mboka ya li haya tonatele iimuna mbyoka nayo oya dhipagwa. Konima yethimbo opwe ya eshongo lya kwata miiti. Aanona ayehe yaJob oya si, sho egumbo moka ya li tayi idhilike iikulya lye ya gwile. Job okwa li a yemata noonkondo, ihe ine etha po okulongela Jehova.

Satana okwa li a hala Job a mone lela iihuna. Okwa li u umbu Job iitumbuka molutu  aluhe, nosha li she mu etele uuwehame uunene. Ka li e shi kutya omolwashike iinima ayihe mbika tayi mu ningilwa. Nonando ongawo, Job okwa tsikile okulongela Jehova. Jehova okwa li a mono ayihe mbika, nokwa li a nyanyukilwa Job noonkondo.

Satana okwa tumine ishewe Job aalumentu yatatu ye ke mu makele. Aalumentu mbaka oya ti kuJob: ‘Owu na okukala wa yona noto kambadhala oku shi holeka. Kalunga okwe ku geela.’ Job okwa ti: ‘Inandi ninga sha sha puka.’ Job okwa tameke okudhiladhila kutya Jehova Kalunga oye a li te mu etele omaupyakadhi, nokwa ti kutya ka li tu ungaunga naye pauyuuki.

Omulumentu omugundjuka gwedhina Elihu, okwa kala a mwena a pulakena koonkundathana ndhoka. Konima yethimbo okwa ti: ‘Shoka amuhe mwa popi osha puka. Jehova omunene e tu vule. Iha ningi sha nando oshiwinayi. Oha mono kehe shimwe noha kwathele aantu momaupyakadhi gawo.’

Jehova okwa popi naJob a ti: ‘Owa li peni sho nda shiti egulu nevi? Omolwashike to ti kutya inandi ungaunga nangoye pauyuuki? Oto popi owala, ihe ku shi kutya omolwashike iinima iiwinayi tayi ku ningilwa.’ Job okwa li a zimine epuko lye, e ta ti: ‘Onda puka. Onda li ndu uvu kombinga yoye, ihe ngashingeyi ondi ku shi nawa. Kaku na shoka tashi ku nyenge. Ombili kwaashoka nda popi.’

Konima yomamakelo ngoka, Jehova okwa li a galulile Job uukolele nokwe mu pe oshindji shi vulithe pwaashoka a li e na nale. Job okwa kala nomwenyo omule nokwa kala a nyanyukwa. Jehova okwa li a yambeke Job, sho a pulakene kuye, nonando okwa li moonkalo oondhigu. Mbela oto ka kala wa fa Job noto ka tsikila okulongela Jehova kutya nduno owi iyadhe monkalo ya tya ngiini?