PaMateus 25:1-46
25 “Uukwaniilwa womegulu otawu vulu okufaathanithwa naakadhona omulongo, mboka ya kutha oolamba dhawo, noya yi ya ka tsakaneke ombushiki.*
2 Yatano yomuyo oya li omagoya, nayalwe yatano oya li aanandunge.
3 Mboka aagoya oya kutha oolamba dhawo, ihe inaya faalela omahooli,
4 omanga mboka aanandunge ya faalele omahooli moohanga,* pamwe noolamba dhawo.
5 Sho ombushiki* ya kala ko, ayehe oya kwatwa koomposi e taya kotha.
6 Mokati kuusiku, okwa igidhwa taku ti: ‘Ombushiki oye ya! Indeni mu ke yi tsakaneke.’
7 Opo nduno aakadhona ayehe mboka oya penduka e taya longekidha oolamba dhawo.
8 Mboka aagoya oya ti kaanandunge, ‘Tu pii mo momahooli geni, oshoka oolamba dhetu odhi li pokudhima.’
9 Mboka aanandunge oya ti kuyo: ‘Otashi vulika kaage tu gwaneni atuheni. Pamwe indeni mu ka lande kwaamboka haye ga landitha.’
10 Manga ya li mondjila ye ke ga lande, ombushiki* oye ya. Aakadhona, mboka ya li ya ilongekidha, oya yi pamwe nombushiki mehala moka mwa li tamu ningilwa oshituthihango, omweelo e tagu edhilwa.
11 Konima yaashono, aakadhona mbeyaka yalwe nayo oye ya, taya ti: ‘Omuwa, Omuwa, tu egulula!’
12 Okwe ya yamukula ta ti: ‘Otandi mu lombwele oshili kutya kandi mu shi.’
13 “Onkee ano kaleni mwa tonata, oshoka esiku notundi kamu yi shi.
14 “Uukwaniilwa waKalunga otawu vulu okufaathanithwa nomulumentu, ngoka e li pokuya kondje yoshilongo e ta ithana aapiya ye, nokwe ya inekelele iinima ye.
15 Gumwe okwe mu pe iitalenti* itano, gumwe iyali, namukwawo shimwe. Kehe gumwe okwe mu pe sha ikolelela kokuvula kwe, nokwa yi kondje yoshilongo.
16 Ngoka a pewa iitalenti itano okwa yi nziya a ka ngeshefe nayo e ta likola itano ya gwedhwa po.
17 Sha faathana, ngoka a pewa iyali okwa likola iyali ya gwedhwa po.
18 Ihe omupiya, ngoka a pewa owala oshitalenti shimwe, okwa yi e ta fulu oshilambo, nokwa fumvike oshimaliwa* shamwene gwe.
19 “Sho pwa piti ethimbo ele, mwene gwaapiya mboka okwa galuka e te ya pula kutya iimaliwa mbyoka oye yi longitha ngiini.
20 Onkee ano omupiya, ngoka a pewa iitalenti itano; okwe ya komuwa gwe niitalenti itano ya gwedhwa po, ta ti: ‘Omuwa gwandje, owa inekelele ndje iitalenti itano, tala, onda likola itano ya gwedhwa po.’
21 Omuwa gwe okwa ti kuye, ‘Iyaloo, omupiya omwaanawa nomudhiginini! Owa kala omudhiginini miinima iishona, onkee otandi ku inekelele iinima oyindji. Nyanyukwa pamwe nomuwa gwoye.’
22 Opo nduno omupiya, ngoka a pewa iitalenti iyali, naye okwe ya komuwa gwe e ta ti: ‘Omuwa gwandje, owa inekelele ndje iitalenti iyali, tala, onda likola iyali ya gwedhwa po.’
23 Omuwa gwe okwa ti kuye: ‘Iyaloo, omupiya omwaanawa nomudhiginini! Owa kala omudhiginini miinima iishona, onkee otandi ku inekelele iinima oyindji. Nyanyukwa pamwe nomuwa gwoye.’
24 “Hugunina, omupiya, ngoka a pewa oshitalenti shimwe, okwe ya komuwa gwe e ta ti: ‘Omuwa gwandje, ondi shi kutya ngoye omulumentu ha panga nayi, ho teya mpoka inoo kuna, noho gongele iilya mbyoka inoo yela.
25 Onkee onda kwatwa kuumbanda, nonda yi ndi ka fumvike oshitalenti, shoka wa pe ndje. Osho shika; shi taamba.’
26 Opo nduno omuwa gwe okwe mu yamukula ta ti: ‘Omupiya ngoye omukolokoshi nomunanyalo, ngele owu shi kutya ohandi teya mpoka inaandi kuna, nohandi gongele iilya mbyoka inaandi yela,
27 nena owa li wu na okufala iimaliwa* yandje kaapunguli yiimaliwa, opo ngele onda galuka, ndi yi mone niihohela.
28 “‘Onkee ano mu kutheni oshitalenti, shoka e na e tamu shi pe ngoka e na iitalenti omulongo.
29 Oshoka kehe ngoka e na ota pewa oshindji e ta kala e na oshindji lela. Ihe ngoka kee na sha ota kuthwa nokuli naashoka e na.
30 Omupiya, ngoka omunanyalo, mu umbileni pondje momilema, moka ta ka lilagana nokwiikokota komayego.’
31 “Sho Omuna gwomuntu te ya meadhimo lye, pamwe naayengeli ayehe, ota ka kuutumba koshipangelapundi she sheadhimo.
32 Iigwana ayihe otayi ka gongelwa koshipala she, nota ka yoolola mo aantu mooyakwawo, ngaashi owala omusita ta yoolola mo oonzi miikombo.
33 Oonzi ote ke dhi tula kolulyo lwe, ihe iikombo okolumoho lwe.
34 “Opo nduno Omukwaniilwa ota ka lombwela mboka ye li kolulyo lwe, ta ti: ‘Ileni, ne mboka mwa yambekwa kuTate, thigululeni Uukwaniilwa, mboka mwa longekidhilwa okuza peshito lyuuyuni.
35 Oshoka sho nda li nda sa ondjala, omwa pe ndje okulya; sho nda li nda sa enota, omwa pe ndje okunwa. Onda li omuyendanandjila, ihe omwa yakula ndje.
36 Onda li olutu lwowala,* nomwa zaleke ndje. Onda li tandi ehama, nomwa sile ndje oshimpwiyu. Onda li mondholongo, nomwa talele ndje po.’
37 Opo nduno aayuuki otaye ke mu yamukula taya ti: ‘Omuwa, uunake twe ku mono wa sa ondjala e tatu ku pe okulya, nenge wa sa enota e tatu ku pe okunwa?
38 Uunake twe ku mono wu li omuyendanandjila e tatu ku yakula, nenge wu li olutu lwowala e tatu ku zaleke?
39 Uunake twe ku mono to ehama, nenge wu li mondholongo e tatu ku talele po?’
40 Omukwaniilwa ote ke ya yamukula ta ti: ‘Oshili tandi mu lombwele, ashihe shoka mwa ningila gumwe gwomaamwatate mbaka aashona, ongame mwe shi ningila.’
41 “Opo nduno ota ka lombwela mboka ye li kolumoho lwe, ta ti: ‘Zii po pungame, ne mboka mwa thingwa, notamu ka umbilwa momulilo gwaaluhe, ngoka gwa longekidhilwa Ondiyapoli naayengeli yayo.
42 Oshoka onda li nda sa ondjala, ihe inamu pa ndje okulya, nonda li nda sa enota, ihe inamu pa ndje okunwa.
43 Onda li omuyendanandjila, ihe inamu yakula ndje; onda li olutu lwowala, ihe inamu zaleka ndje; onda li tandi ehama nonda li mondholongo, ihe inamu sila ndje oshimpwiyu.’
44 Opo nduno nayo otaya ka yamukula taya ti: ‘Omuwa, uunake twe ku mono wa sa ondjala, nenge wa sa enota, nenge wu li omuyendanandjila, nenge wu li olutu lwowala, nenge to ehama, nenge wu li mondholongo, ihe inatu ku yakula?’
45 Opo ihe ote ke ya yamukula ta ti: ‘Oshili tandi mu lombwele, kehe shoka inaamu ningila gumwe gwomwaambaka aashona, ongame inaamu shi ningila.’
46 Mbaka otaya ka hanagulwa po sigo aluhe, ihe aayuuki otaya ka kala nomwenyo sigo aluhe.”
Omanyolo gopevi
^ nenge “omufuko gwomumati.”
^ Nenge “miikwatelwa yomahooli.”
^ Nenge “omufuko gwomumati.”
^ Nenge “omufuko gwomumati.”
^ Oshitalenti oshimaliwa shAagreka shondjundo yookilograma 20.4.
^ Eln. oshisiliveli.
^ Eln. “oshisiliveli.”
^ Nenge “onda li ndi na onkayi yoonguwo.”
