MOmpango yaKalunga ndjoka ya li ya pewa Moses e yi pe oshigwana shaIsraeli shonale, omwa li mwa nyolwa oshipango tashi ti “eho okeho.” Jesus naye okwa li a popi kombinga yasho mEuvitho lye lyokOndundu. (Mateus 5:38; Eksodus 21:24, 25; Deuteronomium 19:21) Oshipango shoka osha li tashi ti kutya ngele omuntu ngoka a yona ta pangulwa, oku na okupewa egeelo li thike peyono lye. *

Osha li hashi landulwa ngele omuntu a yono kumukwawo owina. Ompango yaMoses oya popile kombinga yomuntu ngoka ta yono owina ya ti: “Ngele okwe mu teya esipa, esipa lye nali teywe; ngele okwe mu tsipula eho, eho lye nali tsipulwe mo; ngele okwe mu kula eyego, eyego lye limwe nali kulwe mo. Ano shoka a ningile mukwawo, osho naanaa na ningilwe.” — Levitikus 24:20.

•  Elalakano lyoshipango “ngoka a tsipula mo eho lyamukwawo, naye wo na tsipulwe eho” olya li lyashike?

•  Mbela Aakriste kunena oye na okulandula oshipango shoka?

•  Omauvoko ga puka ge na ko nasha noshipango shoka

•  Shoka Jesus a popi kombinga yoshipango shoka

Oshipango shoka kasha li sha pe omuntu ngoka a yonenwa sha epitikilo lyokugalulila mukwawo uuwinayi. Ihe osha li sha kwathele aatokolihapu nenge aapanguli mboka ya tulwa po, ye ya pe egeelo tali opalele. Kaya li ye na okugeela omuntu sha pitilila nenge ye mu yaalele unene.

Oshipango shoka osha li wo tashi londodha ayehe mboka taya ehameke yakwawo owina nenge taya dhiladhila oku shi ninga. Ompango oya ti: “Nena ayehe taye shi kundana, otaa tila nokape na we ngoka ta ka halela mukwawo uuwinayi u thike mpoka.” — Deuteronomium 19:20.

Aawe, Aakriste kaye na oku shi landula. Oshipango shoka osha li mOmpango yaMoses, ndjoka Jesus a hulitha po sho a si. — Aaroma 10:4.

Ihe nonando ongaaka, oshipango shoka otashi tu kwathele tu mone kutya Kalunga oha dhiladhila ngiini. Pashiholelwa, otashi tu ulukile kutya Kalunga oku hole uuyuuki. (Episalomi 89:14) Otashi ulike nkene Kalunga a tala ko uuyuuki, ano kutya omuntu ngoka a yona oku na okuputudhwa nenge okupangulwa ‘pauyuuki.’ — Jeremia 30:11.

Euvoko lya puka: Oshipango shoka osha li sha pitike aantu ya galulile yakwawo uuwinayi kehe ethimbo taya ningilwa sha.

Uushili: Ompango yaMoses oya ti: “Mukweni inamu kala mu mu nine iikonene noku mu tonda.” (Levitikus 19:18) Pehala lyokuhumitha komeho okugalulilathana uuwinayi, Ompango oya li tayi ladhipike aantu yi inekele Kalunga nosho wo oveta ndjoka ya tulwa po yi shilipaleke kutya uuyuuki otawu longwa. — Deuteronomium 32:35.