Oonzapo dhaJehova ohadhi inyengithwa kohole yokuhola Kalunga nosho wo aantu ooyakwawo, opo dhi lombwele aantu ayehe etumwalaka lyOmbiimbeli mwa kwatelwa naamboka ya li nale haya ti: “Kandi na ohokwe.” (Mateus 22:37-39) Ohole yokuhola Kalunga ohayi tu inyengitha tu vulike kelombwelo lyOmwana, ‘lyokuuvithila aantu ayehe evaangeli.’ (Iilonga 10:42; 1 Johannes 5:3) Ohatu shi ningi, mokugandja etumwalaka lyaKalunga kaantu lwiikando, ngaashi owala aahunganeki yaKalunga yopethimbo lyonale ya ningile. (Jeremia 25:4) Molwaashoka otu hole aantu ooyakwetu, ohatu kambadhala oku ya lombwela “elaka etoye lyOshilongo,” mwa kwatelwa naamboka petameko ya li kaaye na ohokwe. — Mateus 24:14.

 Olundji shampa twa galukile komagumbo ngoka mwa li mu na nale aantu kaaye na ohokwe, ohatu ka mona mo mboka ye na ohokwe. Natu tale komatompelo gatatu:

•   Aantu ohaya tembuka.

•   Aantu yalwe megumbo ohayu ulike ohokwe metumwalaka lyetu.

•   Aantu ohaya lunduluka. Iiningwanima yomuuyuni nenge onkalo yomuntu, ohayi ningitha aantu yamwe ya “tseye ompumbwe yawo yopambepo” mokukala ye na ohokwe metumwalaka lyOmbiimbeli. (Mateus 5:3, yelekanitha NW) Nokuli naamboka haye tu pataneke, ohaya vulu okulunduluka ngaashi omuyapostoli Paulus. — 1 Timoteus 1:13.

 Nonando ongawo, ihatu thiminikile omuntu etumwalaka lyetu. (1 Petrus 3:15) Otu shi shi kutya omuntu kehe oku na okuninga etokolo lye mwene li na ko nasha nokulongela Kalunga. — Deuteronomium 30:19, 20.