Mɔ ye gigingɔ aye mɛ amai na kɔdɛ tɛ mɔ na ndo Ngbangɔ? Mɔ ye gbɔ̃ngɔ nda vɛrsɛ kɔi ka ya Ngbangɔ, bere hĩngangɔ zo kɔi, bere ndo kɔi, bere mbɛni ye mɛ Ngbangɔ tɛnɛ tɛnɛ ni? Bere mɔ ka mɔ hũnda tɛrɛ mɔ na ndo mɛ tɛnɛ tɛ Nzapa alengbi ti zangɔ na mɔ nga? Se adu seni la ko, gwe mɔ ba ka bibliotɛkɛ mɛ ka Da Lo-lengɔ Gbia.

Ni na ambeti nga na aye mɛ aza mɔ na gigingɔ nda lo. Ta sialo da ma, ta mɔ na ambeti zu tɛ Atɛmwɛ tɛ Yehova mɛ ndo tɔndɔ nda Ngbangɔ mɛ na yanga tɛ mɔ da ma. Kanda bibliotɛkɛ ko ka Da Lo-lengɔ Gbia na ambeti mɛ asi fanani ma wo ma. Ni lengbi nga ti dungɔ na Angbangɔ mɛ agbinyangbi ndɛ ndɛ ndɛ, nzɔ̃ diksiɔnɛrɛ, nga na aye mɛ ndɛ mɛ aza mɔ na gigingɔ nda lo. Mɔ lengbi ti gigingɔ nda lo ka bibliotɛkɛ uzu bere na pɛ bombi. Se ni du na ɔrdinatɛrɛ ko, alengbi ti dungɔ na Watchtower Library ka dazu. Adu prɔgramɛ ti ɔrdinatɛrɛ mɛ abombi lɛ ambeti tɛ e búlú búlú ka ya ni, ni adu nga woni ti gigingɔ na lo kɔi, tɛnɛ kɔi, bere vɛrsɛ kɔi.

Ndo za awa kalasi ti Kalasi ti kwa ti Teokrasi. Se asu ili mɔ ka kalasi ni ko, mɔ lengbi ti gwengɔ lɛkɛngɔ tɛnɛ tɛ mɔ ka bibliotɛkɛ ko ka Da Lo-lengɔ Gbia. Wa bangɔ ndo kalasi ni la ndo ba Bibliotɛkɛ ti Da Lo-lengɔ Gbia. Kwa tɛ lo la kpãngɔ ambeti mɛ si fanani ka ya bibliotɛkɛ, dɔngɔngɔ ni nga na seni. Lo bere wa hangɔ mɔ na Ngbangɔ alengbi ti fangɔ mɔ na ye mɛ mɔ ndo gi. Ta zo kɔi alengbi ti mungɔ buku ka ya bibliotɛkɛ lo gwe na ni ma. Se eli kwa na abuku ni wɛ ko, ale e diri na ni ka ndoni, ta elengbi ti sungɔ ye ka ya buku ti bibliotɛkɛ ma.

Ngbangɔ pa ya uzu ti “lwangɔ kɔdɛ tɛ Nzapa” ko, ale e gi ni bɛ e kɔi ‘se ko e ndo gi na ye ti kota faranga mɛ a ɔndɛ.’ (Masese 2:1-5) Bibliotɛkɛ mɛ ka Da Lo-lengɔ Gbia alengbi ti zangɔ mɔ ya mɔ tonda gingɔ kɔdɛ ni.

• Aye ti gigingɔ na kɔdɛ mɛ ka ya bibliotɛkɛ ti Da Lo-lengɔ Gbia nɛ?

• Zo mɛ lengbi ti zangɔ mɔ ya mɔ hĩnga gingɔ ye ka ya bibliotɛkɛ na?