Mɔ hũ se mɛ Atɛmwɛ tɛ Yehova ndo yu na bɔngɔ nzɔ̃ni na ngoi ti abombi tɛ la nga ma se mɛ alimɔ mɛ ya nyi buku mɛ ndo fa? E ndo lɛkɛ bɔngɔ tɛ e na tɛrɛ e nzɔ̃ni lo nɛ?

Ti tɔndɔngɔ Nzapa tɛ e. Adu biani ya Nzapa ndo ba ye mɛ ka bɛ zo a ɔ yangba lɛ lo. (1 Samwele 16:7) Ngoi mɛ e ndo bombi tɛrɛ e ti vɔrɔngɔ Nzapa ko, e ndo e fa ya eye tɔndɔngɔ Nzapa nga na ayata e. Se e ga ti gwengɔ ka gbɛlɛ Gbia kɔi ko, e ndo lɛkɛ tɛrɛ e nzɔ̃ni ti hɛ̃ngɔ lo ndima. Kwɛ́ kɔi, ngoi mɛ e ndo gwe bombi ko, e ndo fa ya e ndo tɔndɔ Yehova Nzapa mɛ “Gbia tɛ e.”​—Yisaya 33:22.

Ti fangɔ ya e ndo e kpã aye mɛ e ndo manda na kwa. Ngbangɔ wa awa Kristo ya ala yu bɔngɔ “na se mɛ alengbi nga na se mɛ nzɔ̃ni.” (1 Timɔte 2:9, 10) Yungɔ bɔngɔ “na se mɛ alengbi” afa ya ta e yu bɔngɔ mɛ ndo gbɔ̃ lɛ azi ndo sa tɛrɛ e ma, mɛ ndo fa bóto tɛrɛ e ma, mɛ ndo ndu gwɛ tɛrɛ bere ndo gbɔ̃ tɛrɛ kakaka ma. Fani mɛ ndɛ, yungɔ bɔngɔ “na se mɛ nzɔ̃ni” ndo za e ya e sala bɔngɔ mɛ alengbi, ta ti wawa ma. Abɛ se so ko, zo na zo la alengbi ti salangɔ bɔngɔ mɛ lo yu. Yungɔ bɔngɔ na se mɛ alengbi nga na se mɛ nzɔ̃ni alengbi ti hɛngɔ “wangɔ tɛ wa songɔ e” ndima nga na ‘gondangɔ Nzapa.’ (Tito 2:10; 1 Petro 2:12) Se e yu bɔngɔ na seni ka bombi tɛ e ko, ni na tongɔ azi mɛ ndɛ ya ala vɔrɔ Yehova.

Abɛ se ta mɔ na anzɔ̃ bɔngɔ ma ko, e na yambangɔ mɔ ka Da Lo-lengɔ Gbia tɛ e. Ta bo bɔngɔ mɛ ndo ti ngere gba bere omɛ ti nzɔ̃ni nvɛ̃ni la zo yu ko lo si nzɔ̃ni ka lɛ azi ma.

• Ahũnda ya e yu bɔngɔ nzɔ̃ni ngoi mɛ e ndo vɔrɔ Nzapa lo nɛ?

• Awangɔ ti Ngbangɔ mɛ aba yungɔ bɔngɔ na lɛkɛngɔ tɛrɛ la nɛ?