DU NA KPENGBA LƐ!
Sitɛ ti intɛrnɛt ti tɛnɛngɔ tɛnɛ na azi ndo gbɛ̃ ayangambi?—Ngbangɔ lengbi ti zangɔ awa dũngɔ ayangambi ngasia
“Ayangambi gba ati ndɛ na ngã ti bingangɔ li—asitɛ ti intɛrnɛt ti tɛnɛngɔ tɛnɛ na azi adu ye ti uzu mɛ li ya, ngã niko ti gba.”—Dr. Vivek Murthy, mɔnganga mɛ wa lingɔ lipaso ka États-Unis, tɛnɛ tɛ azi ti New York Times, 17/07/2024.
Ngasia la awa dũngɔ ayangambi alengbi ti batangɔ ayati la na ya akpale niko nɛ? Ngbangɔ hɛ̃ awangɔ ti nzɔ̃ni.
Ye mɛ awa dũngɔ ayangambi alengbi ti lingɔ
Zia e ba awangɔ mɛ.
“Zo mɛ na kpengba lɛ ndo ba talége tɛ lo na seni.”—Masese 14:15.
Na bangɔ akpale zu ti siɔni mɛ sitɛ ti tɛnɛngɔ tɛnɛ na azi ndo si na ni ko, ta ato mɔ na ngunu ya, mɔ zi lége hɛ̃ ayati mɔ ya, ala salela sitɛ ti tɛnɛngɔ tɛnɛ na azi ma. Uzu ti nɛngɔ ya, mɔ zi lege hɛ nyi mɔ ya, lo salela ni ko, gi hingangɔ nzɔni ya, lo na makoki ti kpangɔ maka na ngoi ti salelangɔ ni, pɔnangɔ akwa ti nzɔ̃ni, nga na kɛngɔ bangɔ aye ti siɔni.
Ti nɛngɔ ya, mɔ hĩnga akpale mɛndɛ ko, di bɛli tɛnɛ mɛ “Mon enfant devrait-il utiliser les réseaux sociaux?” nga na bɛli tɛnɛ mɛ “Protégez votre adolescent des dangers des réseaux sociaux.”
“[Salela] ngoi tɛ mɔ na ndenge ti nzɔ̃ni.”—Efɛzɛ 5:16.
Se mɔ zi lege ya, nyi mɔ salela sitɛ ti intɛrnɛt ti tɛnɛngɔ tɛnɛ na azi ko, kpã ndia na omɛ aba se ti salelangɔ na ni, wa kambisa yangondo hɛ̃ la ya, ni du na lo ti batangɔ ala. Kpa lɛ mɔ na ndo kpale zu mɛ ndo fa ya, seliye tɛ nyi mɔ agbinyangbi na lo ti sitɛ ni, wa gbanzi lo na akpale mɛ aba ni.
Salela video mɛ Kebá na basite Internet ya kosolola na baninga so zangɔ na ayati mɔ ya ala gbɔ̃ ndani ya, kpãngɔ andia na kwa adu ngbondoni.
Gi hĩngangɔ aye mɛndɛ̃
Ngbangɔ tɛnɛ ya, e na dungɔ lɛ ngɛ̃́ na ya “ngoi ti siɔni nvɛ̃ni.” (2 Timɔte 3:1-5) Kanda ni hɛ̃ nga e awangɔ mɛ alengbi ti zangɔ e ya, e nwɔ akple niko. Kaya bɛli tɛnɛ mɛ: Ngã ti li ndo gbɔ̃ ndɛ ayangambi gba, mɔ na luangɔ abɛli tɛnɛ ɔngɔ 20 mɛ alo kaya Ngbangɔ alengbi ti zangɔ awa dungɔ ayangambi na apalanga.
