Gbinya ti ya Ngbangɔ

 Batisimɔ adu yɔlɔngɔ zo tɛrɛ lo zu kaya ngu. a Ngbangɔ tɛnɛ tɛnɛ ti abatisimɔ gba. (Awa Pangɔ Kwa 2:41) Kɔi ti batisimɔ ni adu batisimɔ mɛndó ahɛ̃ Yezo kaya ngu ti yɔlɔdani. (Matie 3:13, 16) Bulu gba na pɛni a hɛ̃ndó kɔli kɔi ti Etiopia batisimɔ “ka ya ngu” mɛ so tɛrɛ lége mɛndó lo ndo ɔ ti da.—Awa Pangɔ Kwa 8:36-40.

 Yezo tɛnɛndó ya tinɛngɔ ya zo ti kɔi tɛ ava ni ko, ayɔ ya lo mu batisimɔ. (Matie 28:19, 20) Bulu gba na pɛni toma Pɛtro adi tɛnɛ ngandó tɛnɛ niko.—1 Pɛtro 3:21.

Na ya tɛnɛ mɛ mɔ na luangɔ gbinya ti ahũnda mɛ

•  Batisimɔ fa nɛ?

•  Tɛnɛ mɛ Ngbangɔ tɛnɛ na ndo hɛ̃ngɔ batisimɔ hɛ̃ ayangambi mɛ ala dɛ pɛsɛni nɛ?

•  Mungɔ batisimɔ na ili To, Nyi, nga na Nyingɔ vúru alengbi na nɛ?

•  Mungɔ batisimɔ fãni mɛndɛ̃ adu siɔni?

•  Batisimɔ mɛndɛ̃ mɛ Ngbangɔ tɛnɛ tɛnɛ ni

•  Dangɔ bɛ ti yungɔ ndo mɛ azi ndo du na ni na ndo batisimɔ tɛ awakristo

 Batisimɔ fa nɛ?

 Batisimɔ du fangɔ yangondo na gbɛlɛ azi zu ya zo mɛ ye mungɔ batisimɔ agbinya bɛ lo na ya siɔ kpale tɛ lo wa lo kokapa hɛ̃ Nzapa ya ni na lingɔ se bɛ lo na ya dungɔ lɛ ngɛ̃́ tɛ ni. Ni fa nga ya lo ye tɔndɔngɔ Nzapa na Yezo na ya dungɔ lɛ ngɛ̃́ tɛ lo zu. Azi ko la ndo mu batisimɔ ko, ala ndo fa ya ani banda dɔ̃ngɔ nɔ na lége ti dungɔ lɛ ngɛ̃́.

 Yɔlɔngɔ zo ya ngu ndo fa ya zo gbinyangbi dungɔ lɛ ngɛ̃́ tɛ lo. Ngasia? Ngbangɔ haka batisimɔ na ɔngɔ zo. (Roma 6:4; Kɔlɔsɛ 2:12) Yɔlɔngɔ zo ya ngu ndo fa ya, zo niko kpi na dungɔ lɛ ngɛ̃́ tɛ lo ti gã. Na ngoi mɛ lo lo ka gbɛ ngu si ko, lo banda dungɔ lɛ ngɛ̃́ ti fãnani mɛ amangbi na hɛ̃ngɔ tɛrɛ tɛ awakristo.

 Tɛnɛ mɛ Ngbangɔ tɛnɛ na ndo hɛ̃ngɔ batisimɔ hɛ̃ ayangambi mɛ ala dɛ pɛsɛni nɛ?

 Ta Ngbangɔ tɛnɛ tɛnɛ ti batisimɔ tɛ “pɛsɛ nyi ma.” b Ta ni tɛnɛ nga ya ahɛ̃ ayangambi mɛ dɛ yakere batisimɔ ma.

 Ta hɛ̃ngɔ batisimɔ hɛ̃ ayangambi amangbi na tɛnɛ mɛ Ngbangɔ tɛnɛ ma. Ngbangɔ tɛnɛ ya zo ko la ye mungɔ batisimɔ ko ayɔ ya lo tɔndɔ aye mɛ Ngbangɔ yɔ ka ti lo. Na ndakisa ayɔ ya lo gbɔ̃ da tɛnɛ ti ngbondoni ti ya Ngbangɔ wa lo kpã nga ni na kwa na ya dungɔ lɛ ngɛ̃́ tɛ lo. Ayɔ ya lo gbinya bɛ lo na ya siɔ kpale tɛ lo. Wa ayɔ nga ya lo hɛ̃ dungɔ lɛ ngɛ̃́ tɛ lo hɛ̃ Nzapa na ya sambela. (Awa Pangɔ Kwa 2:38, 41; 8:12) Ni du ye mɛ ta apɛsɛ ayangambi alengbi ti lingɔ ni ma.

 Mungɔ batisimɔ na ili To, Nyi, nga na Nyingɔ vúru alengbi na nɛ?

 Yezo hɛ̃ndó nyɔ hɛ̃ ava lo ya “Ĩ li ya, ala ti ava mbi. Ĩ hɛ̃ la batisimɔ na ili To mbi Nzapa, na ili mbi Nyi lo, nga na ili [Nyingɔ vúru, NWT] ĩ pa hɛ̃ la ya, ala tɔndɔ aye zu mɛ ndo mbi pa hɛ̃ ĩ.” (Matie 28:19, 20) Tɛnɛ mɛ “Na ili,” ni ye tɛnɛngɔ ya zo mɛ ye mungɔ batisimɔ ndo ye lo Gbia nga na kwa mɛ To na Nyi ndo li, nga na omɛ Nyingɔ vúru ndo li. Na ndakisa: Toma Pɛtro tɛnɛndó hɛ̃ kɔli kɔi mɛndó lo zɛ̃ na ngoi mɛndó lo dɛ nyingambi ya: “Na ili Yezo Kristo, wa Nazarɛtɛ, lo ndozu, mɔ dɔ nɔ!” (Awa Pangɔ Kwa 3:6) E gbɔ̃ nda ni yangondo ya, Pɛtro hĩngandó nzɔ̃ni lo gbia mɛ Kristo na ni, ni la lo lindó kpɛ̃nɛ na ili lo.

•   Tɛnɛ mɛ “To” afa Yehova c Nzapa. Na lo mɛ ya lo du Wa lingɔ aye zu, Wa hɛ̃ngɔ dungɔ lɛ ngɛ̃́, nga Nzapa mɛ nvɛ̃ ngunu zu, Yehova na lo Gbia mɛ aɔ alo gbia zu.—Ebandeli 17:1; Suma 4:11.

•   Tɛnɛ mɛ “Nyi” adu Yezo Kristo mɛ hɛ̃ dungɔ lɛ ngɛ̃́ tɛ lo na lo tɛ e. (Roma 6:23) Ta elengbi ti luangɔ songɔ kwá ma se du ya ta e ndo hĩnga kumba mɛ Yezo na ni na ya dangɔ bɛ mɛ Nzapa na ni na lo tɛ azi ma.—Yoanɛ 14:6; 20:31; Awa Pangɔ Kwa 4:8-12.

•   Tɛnɛ mɛ “Nyingɔ vúru” adu ngunu tɛ Nzapa mɛ lo ndo li ni kwa. d Nzapa lindó aye zu na lége ti Nyingɔ vúru, dungɔ lɛ ngɛ̃́, pangɔ nyɔ lo hɛ̃ aprofɛta nga na azi mɛndɛ̃, ni hɛ̃ ngandó la ngunu ti nɛngɔ ya ala li aye mɛ bɛ lo ndo ye. (Ebandeli 1:2; Yobo 33:4; Roma 15:18, 19) Na lége ti nyingɔ vúru tɛ lo, Nzapa zandó azi mɛ asu Ngbangɔ ti nɛngɔ ya ala su dangɔ bɛ tɛ lo.—2 Pɛtro 1:21.

 Mungɔ batisimɔ fãni mɛndɛ̃ adu siɔni?

 Ta du siɔni ya zo zia sambela tɛ lo ma. Wa se du ya lo mundó batisimɔ kaya sambela tɛ lo ti gã wɛ mɛ? Alengbi ti dungɔ siɔni se lo di mu batisimɔ fáni mɛndɛ̃? Azi mɛndɛ̃ alengbi ti yengɔ ĩĩ, ngoi mɛndɛ̃ na bangɔ se mɛ ala ndo ba na tɛnɛ mɛ kaya mbɛti ti Efɛzɛ 4:5, mɛ ndo tɛnɛ ya: “Gbia tɛ e bo kɔi, lo yengɔ tɛ e bo kɔi, batisimɔ mɛ e mu bo kɔi.” Kanda ta vɛrsɛ mɛ ye tɛnɛngɔ ya zo lengbi ti diringɔ mungɔ batisimɔ fãni mɛndɛ̃ ma. Nda mɛ e tɛnɛ ngaso nɛ?

 Nda mɛ atɛnɛ na tɛnɛ ni. Tɛnɛ mɛ kaya Efɛzɛ 4:5 ndo fa ya Toma polo ndo hũndo ya adu ngbondoni ya awakristo du na mangbi na omɛ ba loyengɔ tɛ la. (Efɛzɛ 4:1-3, 16) Ti nɛngɔ ya mangbi ti ngaso adu da ko, ayɔ ya ala zu vɔrɔ bo Nzapa kɔi, lo yengɔ bo kɔi, ala gbɔ̃ nda tɛnɛ mɛ Ngbangɔ ndo ha na seni wa ala tɔndɔ ye mɛ Ngbangɔ ndo yɔ ya zo li uzu ti nɛngɔ ya lo mu batisimɔ.

 Toma Polo sandó ngunu bɛ azi mɛndó mu batisimɔ wɛ ya ala diri mu batisimɔ fãni mɛndɛ̃. Na lo nɛ? Na lo mɛ ya ta ala gbɔ̃ndó nda hangɔ lo mɛ ba Yezo Kristo uzu ti nɛngɔ ya ala mu batisimɔ ma.—Awa Pangɔ Kwa 19:1-5.

 Ye mɛ ayɔ ya zo li uzu ti nɛngɔ ya lo mu batisimɔ. Ti nɛngɔ ya Nzapa ye batisimɔ mɛ zo mu ko, ayɔ ya lo gbɔ̃ nda bɛta tɛnɛ ti ya Ngbangɔ nzɔ̃ni. (1 Timɔte 2:3, 4) Se zo mu batisimɔ na lo mɛ ya lo gbɔ̃ nda tɛnɛ mɛ sambela tɛ lo ndo ha mɛ aɔngbi na omɛ Ngbangɔ ndo ha ko, ta Nzapa lengbi ti yengɔ batisimɔ tɛ lo ma. (Yoanɛ 4:23, 24) Na lingɔ ngaso lo fa ya ni mbilimbili kaya sambela tɛ ni kanda ta na lo ti “bɛta hĩngangɔ ndo ma.” (Roma 10:2) Ti nɛngɔ ya Nzapa ye lo ko, ayɔ ya lo manda bɛta tɛnɛ ti ya Ngbangɔ, lo kpã ni na kwa na ya dungɔ lɛ ngɛ̃́ tɛ lo, lo hɛ̃ tɛrɛ lo hɛ̃ Nzapa wa lo di mu batisimɔ fãni mɛndɛ̃. Na ya lo ti ngaso ta mungɔ batisimɔ fãni mɛndɛ̃ adu siɔ kpale ma. Ni du nvɛ̃ni ye mɛ ayɔ ya lo li la.

 Abatisimɔ mɛndɛ̃ mɛ Ngbangɔ tɛnɛ tɛnɛ ni

 Ngbangɔ tɛnɛ tɛnɛ ti abatisimɔ mɛ aɔngbi na batisimɔ ti yɔlɔngɔ zo ya ngu mɛ ava Yezo ndo mu. E ba ambanga batisimɔ ni.

 Batisimɔ tɛ Yoanɛ mɛ wa hɛ̃ngɔ batisimɔ. e Yoanɛ mɛ wa hɛ̃ngɔ batisimɔ ndo hɛ̃ndó batisimɔ mɛ ndo fa ya Ayuda na azi mɛndó ati Ayuda agbinya bɛ la na lo mɛ ya ala kondó nyɔ ndia tɛ Moise, ni dundó ndia mɛ Nzapa hɛ̃ aya Izraɛlɛ na lége tɛ Moise. Batisimɔ tɛ Yoanɛ lɛkɛndó azi ya ala hĩnga wa ala ye nga lo tɛ Mɛsia, Yezo mɛ zo ti Nazarɛtɛ.—Luka 1:13-17; 3:2, 3; Awa Pangɔ Kwa 19:4.

 Batisimɔ tɛ Yezo. Batisimɔ mɛndó Yoanɛ mɛ wa hɛ̃ngɔ batisimɔ hɛ̃ Yezo adundó batisimɔ mɛ aɔngbi na abatisimɔ zu. Yezo ndo zo ti lengbingɔ wa ta lo lindó siɔ kpale kɔi ma. (1 Pɛtro 2:21, 22) Ta batisimɔ tɛ lo fandó ya lo gbinya bɛ lo na lo ti siɔ kpale bere “yɔngɔ kati Nzapa dangɔ bɛ ti nzɔ̃ni ma NWT.” (1 Pɛtro 3:21) Ni ndo fa ya lo hɛ̃ndó tɛrɛ lo ti lingɔ se bɛ Nzapa nga na hɛ̃ngɔ dungɔ lɛ ngɛ̃́ tɛ lo na lo tɛ azi ti kokisangɔ kapa mɛndó ako na lo tɛ Mɛsia bere Kristo.—Aebreo 10:7-10.

 Batisimɔ na ya nyingɔ vúru. Yoanɛ mɛ wa hɛ̃ngɔ batisimɔ na Yezo tɛnɛndó tɛnɛ mɛ ba mungɔ batisimɔ na ya nyingɔ vúru. (Matie 3:11; Luka 3:16; Awa Pangɔ Kwa 1:1-5) Ni du batisimɔ mɛ aɔngbi na batisimɔ mɛ ndo mu na ili nyingɔ vúru. (Matie 28:19) Ngasia?

 Ka popo tɛ ava Yezo ko, bo azi yakere la mu batisimɔ na ya nyingɔ vúru. A hĩni la na kpɔ̃ ti nyingɔ vúru, wa ala na lɛngɔ gbia ndoni kɔi na Yezo ka ndozu. f nga mabere agbia bere anganga nzapa ti nɛngɔ ya ala lɛ gbia na ndo lɛ sese. (1 Pɛtro 1:3, 4; Suma 5:9, 10) Ala na lɛngɔ gbia ndo amiliɔ̃ tɛ azi mɛ na nzɔ̃ dangɔ bɛ ti dungɔ na dungɔ lɛ ngɛ̃́ ge lɛ sese mɛ na tingɔ paradizo.—Matie 5:5; Luka 23:43.

 Mungɔ batisimɔ na ya Kristo Yezo nga na ya kwá tɛ lo. Azi ko mu batisimɔ na ya nyingɔ vúru ko, ala mu nga “batisimɔ na ya Kristo Yezo.” (Roma 6:3, NWT) Bo ava Yezo mɛ a hĩni la na kpɔ̃ ti nyingɔ mɛ ala na lɛngɔ gbia ndoni kɔi na lo ka ndozu la lengbi ti mungɔ batisimɔ niko. Mungɔ batisimɔ na ya Yezo Kristo la ndo li ya ala li kaya linɔ tɛ ava Yezo mɛ a hĩni la na kpɔ̃ ti nyingɔ. Yezo du li wa ala du ngbonga tɛrɛ.—1 Kɔrinto 12:12, 13, 27; Kɔlɔsɛ 1:18.

 Awakristo mɛ ahĩni la na kpɔ̃ ti nyingɔ ndo mu nga “batisimɔ na ya kwá tɛ Yezo.” (Roma 6:3, 4) Na lo mɛ ya ala ndo landa pagɛrɛ Yezo wa ala ndo tɔndɔ Nzapa na hɛ̃ngɔ tɛrɛ la hɛ̃ lo wa ta ala di dɛ nga na dangɔ bɛ ti luangɔ dungɔ lɛ ngɛ̃́ ge lɛ sese ma. Nda batisimɔ niko ndo kɔ na ngoi mɛ ala ndo kpili wa ala so na tɛrɛ ti nyingɔ ti nɛngɔ ya ala du na dungɔ lɛ ngɛ̃́ ti bwai na bwai ka ndozu.—Roma 6:5; 1 Kɔrinto 15:42-44.

 Batisimɔ ti ya wá. Yoanɛ mɛ wa hɛ̃ngɔ batisimɔ tɛnɛndó hɛ̃ azi mɛ ndo ma lo ya: “Lo [Yezo] na hɛ̃ngɔ ĩ batisimɔ na ya nyingɔ vúru nga na ya wá NWT. Zo ni ko agbɔ̃ lungu so ti lo ya ni pɛ na le tɛ, wa sã ni agwe katɛ. Lo na bongɔ le tɛ ni ka ya gɔ tɛ lo, ko lo na zɔngɔ sã ni na wá mɛ ta ndomingɔ bɛ gbɔ ma.” (Matie 3:11, 12) Yoanɛ mɛ wa hɛ̃ngɔ batisimɔ tɛnɛndó ya batisimɔ ti ya nyingɔ vúru aɔngbi na batisimɔ ti ya wá. Lo yendó tɛnɛngɔ ya nɛ?

 Blé ndo fa azi ko la ndo ma Yezo wa ala ndo tɔndɔ nga lo. Ala ndo du na nzɔ̃ dangɔ bɛ ti mungɔ batisimɔ na ya nyingɔ vúru. Sã ti blé adu azi ko la ndo kɛ̃ mangɔ Yezo. Nda la na kɔngɔ na ngoi mɛ na hɛ̃ngɔ la batisimɔ ti ya wá mɛ ndo fa kpingɔ kwá ti bwai na bwai.—Matie 3:7-12; Luka 3:16, 17.