Mu elapo ya Usi, aakhalawo mulopwana aamulapela Yehova iichaniwa Yupu. Owo aari mulipa a muhakhu, aakhalano emusi etokweene. Owo aari muchu aphaama nave aanakhaviherya achu oohaawa, anaamukhwele ni ikwaasuni. Apwanne hantonko okhalano makacamiho woona wi aari muchu aphaama?

Yupu haasuwenle wi Satana ookhala nyenya owo aanamoona Yupu. Yehova aaloca ni Satana: ‘Woomoona mulapeli aka Yupu? Mweelaponi yoothene haavo muchu aphaama ni awookololowa oolikana ni yoowo. Owo onnakhooca yoonanara ntakhara onnamulapa Muluku.’ Satana aahaakhula: ‘Nyuwaano munnamukhapelela yoowo, echoko awe ni ichu sawe soothene! Munnareeliha ichu soothene oneereiye nave muhuwo awe onnarelana. Nto vano nkeereryani ni munanarihe muhuwo awe nave munamoona ooruwanakaani.’ Yehova ahi: ‘Phaameene, weerele muhakhu woothene ntoko onachunelaawevo nto ohimwiiphe mwaneene owo.’ Ntakhara heeni Yehova aheemererya wi Satana amweererye Yupu? Owo aanaroromela wi Yupu hi acheke.

Satana aahimweererya Yupu ni ichu soohiyanahiyana. Woopacerya owo aamurumihenle ampava yaawo yaamwiiyenrye imope ni apuuru awe. Voocharela aarumiha etari yeeyo yiiphale ipucepuche soothene sa Yupu. Nikhuuru nikina na achu o Khalteya yaamwiiyerya tho ikameelo sawe. Akukhula a muhuwo tho yaahiiphiwa. Voocharela yaaheereya epahu yoothananihaxa. Anamwane oothene a Yupu yaakhwa elyaaka efesta. Nave Yupu aahisooseya murima, nyenya haahiyale omulapela Yehova.

Satana aachuna wi Yupu eeteteye elukuluku  yoothene nave aaheeriha wi akhume makhwaca mwiili woothene. Yupu haasuwela ntakhara heeni ichu saakhumelelaaya. Naamwi hiiha mukhalelo wa Yupu waari wa ochuna omulapa Yehova. Muluku aanoona soothene seereya, nave owo aahakalala ni Yupu.

Ohoolo waya, Satana ahaarumiha alopwana araru wi emweererye Yupu. Awo yaahi: ‘Onnuupuwela wi muchu oohicheka onahaala otakhaliwa naari aphaama aphwanye epahu? Muluku oonyeenyeya ni weyaano.’ Yupu aawaakhula: ‘Miyaano nkichenke.’ Owo aammora wuupuwela wi Yehova taatannyile makacamiho awe, nave ahiloca tho wi yeeyo Muluku aapakeiye hiyaari echu yaphaama wa yowo.

Mmiravo mmoha nsina nawe Elihu aari oomaaleleya ene awiriyanaka yooloca yeele. Nave owo aawaakhula wi awo yaalonce mooheseya. Yehova ti mutokweene owo onnaniiwexexa. Owo haneera ichu soonanara. Onnoona ichu soohiyanahiyana nave onnawaakiha achu awookololowa mmakacamihoni mwaya.

Yehova ahiloca ni Yupu ariki: ‘Waari woowi kipatusaka elapo? Onavaanyeryani malamulo aka? Onoona oloca nyenya hosuwenle onalocaawe.’ Yupu aheemererya yoohesa awe nave ahi: ‘Kilonce ichu kahuupuwelaaka nave kaahisuwenlaaka. Khalai koosuwenleeni vawiiwa mulociwaka, nto vano koowoonaani ni miitho aka. Hiyaavo enoovilaani nyuwo. Nto vano koocharuwa mukilevelele.’

Weererya iwo waavinraaya, Yehova aahipaka echu yaphaama wa Yupu nave ahimvaha ichu sawaaca opwaha khalai. Yupu aakhalano ekumi yoolekela ni yaphaama. Yehova aamureeliha Yupu nthowa na omwiiwelela. Weyaano onahaala otitelela omulapela Yehova naamwi okumanaka ni makacamiho hiiha ntoko Yupu enreiye?