1, 2. Achu ancipale anoona hai muteko aya?

ACHU ancipale anoona wi tookhweleya naari toohikhweleya moorweela wa muteko analapaaya. Mu sookhovelela ikina, vaavaa muchu onachuneiye omusuwela mukina, ti wawunlaana omukoha: “Muteko taani munalapaanyu?”

² Ikwaha ikina Piipiliya onnaaloca achu moorweela wa oloca muteko yaalapaaya. Ntoko yootakiherya, onnamuloca “Mateu, mulipa a musokho,” “Simoni, mulipa òtxikitxa isapala,” ni “Luka dotoro ahu òkhweleya.” (Mateu 10:3; Saweriwa T’arummwa 10:6; Kolosi 4:14) Ikwaha ikina, Piipiliya onnaloca mirici achu yaaryaayano mmuteko wa Yehova. Nkuupuwelani vooloca sa Mwene Tavite, mulipa miririmu Eliya, ni murummwa Paulo. Alopwana yaala yaanavaha esisapo mirici Yehova aavanheiye. Moolikana, hiyaanotho nnaphwanela ovaha esisapo murici vyakala nnaakhelaahu mmuteko wa Yehova.

3. Ntakhara heeni achu awunnuwelavo annaphwanela waavyakiha amiravo? (Moone eruku yoopacerya.)

³ Ninnasiveliwa omurumeela Yehova nave ninnacicimiherya  mirici sahu. Ancipale ahiyo ninnasiveliwa vancipale ni muteko ahu nave ninnachuna otitelela opaka ophiyerya nnaweryelaahuvo. Nyenya echu yoothananiha ti yawi vaava achu anuluvalaaya, hanawerya olapa ntoko yeerelaaya eri amiravo. (Eklesiyaste 1:4) Eyo ennaruuha makacamiho wa achu a Yehova. Olelo, muteko woolaleerya onamvira oyaaka vahoolo, nave marehereryo a Yehova annapharihela ikhankoonya sahiihaano wi yaaphwanyihe michaka saphaama achu ancipale. Nyenya ikwaha ikina nnakhala nikacamiho wa achu awunnuwelavo, ohuserya makhalelo mavyaani a weerano ichu. (Luka 5:39) Navetho, enakhala yawooneya achu oyeleela ikuru ni owerya waya vaavaa anakhalaaya atokweene. (Masiposipo 20:29) Mwawiihiiha, ti yoosivela ni yamphurelo vaavaa achu awunnuwelavo anaavyakihaaya amiravo wi ekhaleno mirici mincipale mmarehereryo a Yehova.—Mwaalakhanye Salumu 71:18.

4. Ntakhara heeni ti yoovila wa akina ovaha murici? (Moone ekaaxa “ Ntakhara Heeni Onamukhala Woovila wa Hiyo Ovaha Murici?”)

⁴ Wiiliwiili tahi wookhweya wa yaale arino ohoolela waavaha murici amiravo. Ennaathananiha wuupuwela oyeleela murici yoowo yaasivelaaya vancipale. Nnakhala nikacamiho wa yaawo wuupuwela ohiya muteko yoowo waasivela. Naari, anoova wi wakhala wi tahi tanahoolela muteko, honi opakiwe phaama. Akhweya anoona wi haanono elukuluku ya waavyakiha akina. Mu elukuluku emohamoha, amiravo anaphwanela okhala oovilela vaavaa ahinavahiwaaya murici.

5. Makoho taani nnahaalaahu othokororya mmwaha yoola?

⁵ Vano ntakhara heeni eryaaya yookhweleya awunnuwelavo waakhaviherya amiravo okhalano mirici? Eni yeereno hai? (2 Timóteo 2:2) Nave ntakhara heeni amiravo annaphwanela okhalano moonelo woophwanelela vaavaa analapaaya ni awunnuwelavo, anna arino mavyakelo ni ohuserya orweela wa yaawo? Wi nipacerye, hankooni noone mukhalelo Mwene Tavite aamukhavihenryeiye mwanawe ntakhara muteko wookhweleyaxa.

6. Tiheeni Mwene Tavite aachuneiye opaka, nave Yehova aamulenleni?

⁶ Mu iyaakha sincipale, Tavite aniikariwa nave aanathaamela mmapuro oohiyanahiyana. Voocharela, vaavaa aareiye mwene, owo aanakhala mu empa yooreera. Mwawiihiiha aaloca wa mulipa a miririmu Natani: “Wone! Miyano kinakhala empa etekiwe ni miri sa Sedro eniha Arka a Muluku akhalaka mmusakalani.” Tavite uupuwela omutekela Yehova empa yaphaama. Natani aaloca wa yoowo: “Hawe were yeyo murimà onolelaya, ntakhara Apwiya ari ni weyano.” Nto tahi yeeyo Yehova aachuneiye. Owo aaloca ni Natani wi amuleele Tavite: “Akhweya weyano onakitekela empa, wi miyano kikhalekemo?” Naamwi Yehova aamuroromelinhe wi aahaala okhala ni yoowo elukuluku yoothene, Tavite aasuwela wi mmoha a anamwanaawe taahaala oteka empa. Tavite oonne hai?—1 Matharihelo 17:1-4, 8, 11, 12; 29:1.

7. Tavite aakhulenle hai ohoolela wa Yehova?

⁷ Chiryene Tavite aanachuna omutekela Yehova empa, mwawiihiiha akhweya owo aathananaxa. Naamwi hiiha aahikhaviherya muteko yoowo mwanawe  Solomoni aahaaleiye okhwaaniherya. Tavite aamukhaviherya waarehererya anamalapa ni othukumanya eworo, eprata, epronse, mithipo ni miri. Owo hoova vooloca sa taani aahaala ovuwa ntakhara oteka empa, yeeyo voocharela yaasuweliwe ntoko empa ya Solomoni. Opwaha yeeyo, Tavite aamuceenyerya Solomoni, alocaka: “Apwiya Muluku à ekhale ni weyano, okhapelele nroromeliho naya nave owerye watekela empaya.”—1 Matharihelo 22:11, 14-16.

8. Ntakhara heeni akhweya Tavite aahuupuwela wi Solomoni haari ooreheryeya oteka empa? Nyenya tiheeni Tavite aapankeiye?

⁸ Mwaalakhanye 1 Matharihelo 22:5. Akhweya Tavite aahaala wuupuwela wi Solomoni haareheryen’ye wi ahoolele muteko yoowo waari wookhweleyaxa. Empa yaaphwanela okhala ‘yotekeya ni yorèra,’ nave Solomoni aari “mmiravo ni ohiwerya etxhu.” Nyenya Tavite aasuwela wi Yehova aahaala omukhaviherya Solomoni opaka muteko yoowo wavameekhaaya. Mwawiihiiha Tavite aapaka soothene aaweryeiye wi amukhaviherye orehererya muteko yoowo mutokotoko.

9. Anna awunnuwelavo anoona hai vooloca sa waakawela mirici akina? Mooniherye.

⁹ Anna awunnuwelavo hanaphwanela woovelela vaavaa anaavahaaya murici amiravo. Oothene ahu noosuwela wi echu eri yookhweleya olelo ori muteko Yehova aavanheiye achu awe. Waavyakiha amiravo okhalano mirici enahaala okhaviherya opakeya wa muteko owo. Muupuwele yaweereya ela. Vaavaa mwaaryaanyu mwaana, akhweya mwaanawoona atiithinyu yeecihaka moota aya. Vaavaa munnuwaanyu awo yaanoolelaani yeeyo yaapakaaya. Mweelukuluku aya, mwaarehererya ipaaxo sanyu nave mpacerya weeciha mukhatiinyu. Naamwi mwaasuwenle, nlelo atiithinyu  yaanoovahaani ekano. Elukuluku ekina mwaanatorokana weeciha. Nyenya vaavaa atiithinyu yuuluvalaaya, nyuwaano mwaaneeciha ikwaha sincipale. Apwanne atiithinyu yaanyeenyeya? Hooye, mweeparipari awo yaanahakalala ni nyuwaano mwaateesaka. Moolikana, anna awunnuwelavo annahakalala owoona amiravo yaawo yaavyakinhaaya ekhalaka ooreheryeya okhalano mirici mmarehereryo a Yehova.

10. Mose oona hai okhalano ncicimiho ni ohoolela?

¹⁰ Nnaphwanela okhalano ephoole wi nihikhalele nrima mirici sa akina. Nnanwerya ohuserya orweela wa mukhalelo Mose enrei-ye vaavaa Aisarayeli akina yaapacenryaaya oloca ichu ntoko alipa miririmu. (Mwaalakhanye Namarepela 11:24-29.) Yosuwa aachuna waamaaliha, nyenya Mose aaloca: “Onakikhalela ehatxe? Waweryeyavo wi Apwiya yavahe munepa aya atxhu othene a Isarayele, nave othene ekhala alipa a miririmu.” Mose aasuwela wi Yehova taahoolela muteko. Opwaha ochuna ncicimiho wa yoowo mukhateiye, Mose aachuna wi akapuro oothene a Yehova ekhaleno mirici. Hanka vooloca sa hiyo? Apwanne ninnahakalala vaavaa akina anaakhelaaya mirici mmuteko wa Yehova?

11. Tiheeni Petro olonceiye vooloca sa waavaha mirici akina?

¹¹ Aakhalavo anna ancipale alampe mwakuru mmuteko wa Yehova mu iyaakha sincipale nave aavyakinhe amiravo wi ekhaleno mirici mincipale. Ntoko yootakiherya, hankooni nimuthokororye munna Petro. Variyari wa iyaakha 74 omalinheiye mmuteko wa elukuluku yoothene, iyaakha 35 omalinhe arumeelaka o filiyale ya Europa. Mu elukuluku yincipale, owo aari ooweherya a Nikhuuru na Muteko. Voocharela muteko yoola waathanleliwa Paulo, mmiravo yoowo Petro aamuvyakinheiye. Apwanne Petro aahithanana nthowa na matorokelo yaala? Hooye. Owo ooloca: “Kaatepa ohakalala osuwela wi aakhalavo anna avyakihiwe wi yeemererye mirici mitokweene nave aneerano phaama.”

12. Tiheeni nnahuseryaahu orweela wa yootakiherya ya Ropowamu?

¹² Vaavaa Ropowamu, mwaana a Solomoni aareiye mwene, aahaaveka miruku alopwana awunnuwelavo mukhalelo wa okhwaaniherya murici awe muvyaani. Voocharela aakhooca ekano aya! Opwaha yeeyo, aacharinhe ekano ya amiravo unnunweiyeno vamoha. Yookhumelela yaari  makacamiho. (2 Matharihelo 10:6-11, 19) Tiheeni nnahuseryaahu? Echu yamiruku ori oveka ekano wa yaale ari awunnuwelavo nave arino mavyakelo onipwaha hiyo. Amiravo hanaphwanela okhala ookhinyereryeya otitelela weerano ichu hiiha ntoko seeriwaayano khalai. Nlelo, anaphwanela otitelela ocicimiherya miruku sa awunnuwelavo nave hanaphwanela wuupuwela wi mukhalelo aya wa weerano ichu hophara muteko.

13. Amiravo eni elape hai ni awunnuwelavo?

¹³ Ikwaha ikina, amiravo annaakhela mirici sa ohoolela muteko weeriwano ni anna awunnuwelavo, nave arino mavyakelo. Yaahaala okhala yaphaama ohuserya ni awunnuwelavo yaala. Yootakiherya nloncaahu wuupaceryani, Paulo amanle omuraceela Petro ntoko ooweherya a nikhuuru o Peteli, owo ooloca: “Kaamaliha elukuluku wi kicharihe ekano ya Petro, nave kahaaceenyerya akina weerano emohamoha.”

14. Tiheeni nnahuseryaahu orweela wa mukhalelo Timoteo ni murummwa Paulo yaalampaaya vamoha?

¹⁴ Timoteo aari mukhaani ompwaha murummwa Paulo, naamwi hiiha awo yaahilapa vamoha mu iyaakha sincipale. (Mwaalakhanye Filipi 2:20-22.) Paulo aaloca wa Akorinto: “Ti wa yeyo kimurummaka wa nyuwano Timóteo, mwanaka òkhweleya ni òroromeleya. Owo onaya owupuseryani mecelo aka munroromeloni mwa Kristu kinahusihaka mmapuroni mothene nave mwa mithukumano sothene.” (1 Korinto 4:17) Ovinyerya vaava, ninnasuwela wi Paulo ni Timoteo yaanalapa nave yaanakhaviheryana phaama. Paulo aahimaliha elukuluku wi amuhusihe Timoteo ‘mecelo awe munroromeloni mwa Kristu,’ nave Timoteo aahuserya phaama. Paulo aanasiveliwa ni Timoteo nave aalekecheya wi owo aahaala waakhapelela anna ni arokora o Korinto. Atokweene ananwerya omutakiherya murummwa Paulo vaava anaavyakihaaya akina okhalano mirici mmulokoni.

15. Aroma 12:3-5 oni anikhaviherye hai ovilela ni matorokelo?

¹⁵ Nnakhala mu ilukuluku sootikhiniha. Makupa a marehereryo a Yehova veelaponi yavathi annunnuwa mmikhalelo mincipale. Ela enataphulela wi ichu inahaala otitelela otorokeya. Matorokelo makina annanivolowela nave tahi ookhweya ovilela. Eyo enahaala onikhaviherya wakhala wi nri awiiyeviha ni oteteiwa mwa yeeyo eri yaphaama mmuteko wa Omwene, ohiya mwa yeeyo nnachunaahu. Vaavaa nneerahuno yeela, nnakhala awaataana. Paulo aahaarepela Akristu o Roma: “Kinnolèlani wi ahikhale ani isoneke opwaha mukhalelo awe.” Owo aathariha wi nikupa ti nikupa na mwiili nnalapa mmukhalelo woohiyana, muchu ti muchu a mmulokoni okhalano nikupa noohiyana.—Aroma 12:3-5.

16. Tiheeni Mukristu ori oothene onaphwaneleiye opaka wi atikitherye murecele ni waataana mmarehereryo a Yehova?

 ¹⁶ Achu oothene a Yehova annachuna okhaviherya Omwene ni opaka soothene anavekiwaaya. Awunnuwelavo anaphwanela waavyakiha amiravo. Amiravo ananwerya okhalano mirici mincipale mmukhalelo wawiiyeviha ni mwancicimiho. Nave anna athenle annathamalela vaavaa asaaraya anaakhaviheryaaya naamwi mikhalelo sitorokeyaka. Athiyana yaala ananwerya omutakiherya Priskila, yoowo moororomeleya aalampe ni iyawe Akila.—Saweriwa T’arummwa 18:2.

17. Yesu aavyakinhe oohuserya awe wi epake eheeni?

¹⁷ Yesu oovaha yootakiherya yaphaama ya okhala ooreheryeya waavyakiha akina. Yesu aasuwela wi akina yaaphwanela oyano vahoolo muteko awe. Mweeparipari, owo aasuwela wi oohuserya yaari oohiphaameya. Nyenya aanaroromela wi awo yaahaala omwaryamwasa michaka saphaama opwaha eerenleiye. (Yohani 14:12) Owo aahaavyakiha phaama, nave yaawerya olaleerya mu ilapo soohiyanahiyana.—Kolosi 1:23.

18. Muteko taani nneeraahu nikhaleno omwaahiyu? Muteko taani nryaahuno hiihaano?

¹⁸ Yesu amanle okhwa, Yehova aamviiha mookhwani nave amvaha muteko mutokweene wa okhalano olamulelo wa “vasulu va sowerye sothene ni ikuru sothene, ni otokotoko wothene, ni olamula wothene.” (Éfeso 1:19-21) Naamwi nikhwile ntoko akapuro oororomeleya a Yehova ahaakumve Armaketo, nnahaala okookela okhala ni okhalano muteko muncipale mu elapo evyaani. Naamwi hiihaano oothene ahu nookhalano murici wa esisapo wa olaleerya michaka saphaama ni waapaka oohuserya. Mwawiihiiha, moohipwacha waakhanle wi na amiravo naari awunnuwelavo, oothene ahu nnaphwanela otitelela ‘otepa ophara muteko wa Apwiya.’—1 Korinto 15:58.