Achu ancipale analoca wi annamuroromela Muluku. Nyenya waakhala wi nohaakoha Muluku taani, anaakhula mmukhalelo woohiyanahiyana. Wa akina, Muluku muthoriha awuuma murima, yoowo pahiru onachuna waahooxa achu. Wa akina, Muluku toosivela ni oolevelela ilukuluku soothene, moohipwacha yeeyo enraaya. Nave akina anuupuwela wi Muluku ori ocai wa hiyaano. Nthowa na miyoonelo soohiyanahiyana, ancipale anoona wi tahi wooweryeya omusuwela Muluku chiryene.

Apwanne ti woochuneya omusuwela Muluku? Aai, ti woochuneya. Namusuwela Muluku nnahaala okhalano yoolakelela ni yootaphulela ya okumi ahu. (Saweriwa T’arummwa 17:26-28) Wakhala wi moomwaacamela Muluku, owo onahaala woosivelakaani ni wookhaviheryaani. (Tiyako 4:8) Opwaha soothene, wakhala wi moomusuwela phaama Muluku munahaala waakhela ekumi yoohimala.—Yohani 17:3.

Muni nwerye hai omusuwela Muluku? Mmuupuwele muchu yoowo mmusuwenlaanyu phaama, ntoko nthamwene anyu. Mwaapacenrye hai opaka onthamwene ni yoowo? Akhweya mwaapacenrye osuwela nsina nawe, meecelo awe, ichu inamusivela ni ihinamusivela, vamoha ni ichu eenreiye naari ichu onachuneiye weera, ni ichu sikina. Ti yeeyo ewerinheni opaka onthamwene ni muchu yoowo—nyuwaano mwahuserya ichu vooloca sa yoowo.

Moolikana, hiyaano nnanwerya omusuwela Muluku moorweela wa osuwela maakhulo a makoho ala:

• NSINA NA MULUKU TAANI?

• OWO TA MUKHALELO TAANI?

• TIHEENI MULUKU EENREIYE?

• TIHEENI MULUKU ONAHAALEIYE WEERA?

• TUUVI ORI MPHURELO WA OMUSUWELA MULUKU?

Erevista ela epakiwe wi evahererye maakhulo a makoho yaala. Ela enahaala wookhaviheryaani osuwela ohiya pahiru Muluku taani, nyenya tho tiheeni onahaaleiye woovaahaani, wakhala wi moopaka onthamwene ni yoowo.