Muluku opatunxe mwiili ahu ni mikhalelo soophwanelela wi onawerya oreheryeya wakhala wi noophoreya. Vaavaa nnaphoreyaahu, ohommwa naari waateya, “mwiili ahu onnapacerya meerelo oovila ni yoolakelela ya ovoliha nikhwaca, moohipwacha waakhanle wi nikhaani naari ntokweene.” (Johns Hopkins Medicine) Mwiili ahu mwawaakuveya onneeravo echu wi ociyele nikhami nnakhuma, wuumiha nikhwaca, ni oruuha nrapala nivyaani.

NKUUPUWELANI: Mpatuxa opanke mwiili ahu wi oweryeke ovola wakhala wi woophoreya. Mwawiihiiha, nnaphwanela ororomela yoolaiherya awe ya openuxa makhwaca a mmuupuweloni, hamunoona? Piipiliya onaloca wi Apwiya Muluku “annavoliha murima wophoreya, nave annamaka makhwatxa aya.” (Salumu 147:3) Vano naanyiherye wi nyuwaano munnahooxeya ni echu yeeren’ye naari enaamweereya. Muni muroromele hai wi Yehova onahaala ovoliha murima anyu ophoren’ye, hiihaano ni omwaahiyu.

Muluku onnaniroromeliha: “Ohòve, miyano kiri ni weyano. Ohithananeke, miyano ka Muluku à. Kinnolipiha, kinnokhaviherya.” (Isaiya 41:10) Vaavaa muchu onasuweleiye wi Yehova onnamuthokororya, owo onnakhalano murecele nave onnakhalano ikuru wi atitelele. Murummwa Paulo aahiichana murecele owo ntoko “muretxele wa Muluku, onapwaha miruku sothene.” Nave tho Paulo aaloca ariki: “Kinnawerya itxhu sothene mwa yowo onakilipiha.”—Filipi 4:4-7, 9, 13.

Piipiliya onnanikhaviherya okhalano Nroromelo mwa soolaiherya sa Yehova sa omwaahiyu. Ntoko yootakiherya, Wupulula 21:4, 5, onaphwanyeya mu epaaxina enacharela, onnaloca tiheeni Muluku onahaaleiye weera nave ntakhara heeni nnaphwanelaahu ororomela wi onahaala weerano:

• “Muluku onanvuta mithori” mmiiithoni mwa achu oothene. Owo onahaala omaliha makacamiho ni sawiipiha murima sahu soothene, ophitaanyerya sawuukhula sahu seiho inakhala ntoko ikhaani wa akina.

• Mpatuxa ahu “okiranthe vehitxeni” vawe wirimu. Owo Mwene oowerya woothene nave onahaala opharihela owerya wawe ni ikuru wi amalihe ohooxeya nave wi anikhaviherye.

• Yehova onaniroromeliha wi masu ala “t’òroromeleya ni èparipari.” Nave owo haahaala onyemula nsina nawe ni ovuwa wawe ntoko Muluku eeparipari. Nthowa na yeeyo, nnaphwanela ororomela wi owo onahaala waakhwaniherya yeeyo ororomelinheiye.

“Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira. Vanonto ole okiranthe vehitxeni àlotxa, ariki: ‘Onani, kinneriha isya itxhu sothene.’ Nave àhatxererya: ‘Orepe, ntakhara masu ala t’òroromeleya ni èparipari.’”—Wupulula 21:4, 5.

Soopatuxiwa sa Muluku vamoha ni Piipiliya sinnanikhaviherya omusuwela Tiithi ahu a wirimu ni mikhalelo sawe. Nnanwerya oloca wi ichu seiho Muluku opankeiye siri ntoko nwopelo wi nimusuwele phaama Muluku. Iho sinnaneeriha ochuna omusuwela owo ntoko nthamwene ahu aphaama. Piipiliya onnapaka nwopelo owo mmukhalelo wookwakwaleya. Owo onii: “Mmwatxameleke Muluku nave owo onan’watxamelani.” (Tiyako 4:8) Nave Saweriwa T’arummwa 17:27 onaloca wi Muluku “hari òtxiwene wa hiyo.”

Wakhala wi mohiivaha elukuluku wi mmusuwele Muluku, munahaala okhala oolekecheya wi chiryene “ti yowo onokhapelelani.” (1 Pedro 5:7) Apwanne osuwela yeela ennaruuha mphurelo mu okumi ahu?

Moone yaweereya ya Toru, a o Xapau. Amannya yaari Mukristu, nave yene aavolowela meerelo a owoka ni nlala o Xapau, nikhuuru nawiichaniwa Yakuza. Owo onnaloca: “Kuupuwela wi Muluku aanakiica. Ikwaha soothesene akhweiye mwaacamani, kuupuwela wi Muluku aamukilaka, xaxaxa wakhala wi aari muchu yoowo kamusivelaaka vancipale.” Turu onneemererya wi mukhalelo wa ekumi aakunxeiye ni muupuwelo awe waamweeriha okhala muchu “awuuma murima ni oonanara.” Nave uupuwelaka echu yeeyo aachuneiye vancipale, owo onnaloca: “Miyaano kachuna okhwa kiri mmiravo kimwiiphale muchu oovuwaxa okiphwaha miyaano, wi kisuweliwe vancipale.”

Nave voocharela Turu vamoha ni mwaariye, Hannah, yaapacerya omuhuserya Piipiliya vamoha. Eyo yaamukhaviherya Turu otoroka moomalela ekumi  awe ni mukhalelo awe wa wuupuwela. Hannah onnaloca: “Koowoona aiyaka ni miitho aka epakaka matorokelo.” Vano Turu onnaloca ni olekecheya woothene: “Ookhalavo Muluku onamuthokororya muchu ti muchu a hiyo. Owo hanachuna wi muchu ori oothene akhwe nave ori ooreheryeya wi aakhurumuwele yaale anacharuwa chiryene soohesa saya. Nave vaavaa nnamuleelaahu ichu seiho naahihaalaahu owerya omuleela muchu mukina, naari saahihaala wiiwexexiwa ti muchu mukina, Muluku onnaniwiriyana. Enahala elukuluku vakhaani wi Muluku amalihe makacamiho ahu oothene, ohooxeya ni sawiiniha murima. Nave hiihaano, owo onnanikhaviherya mmukhalelo wootikhiniha. Owo onnanisivela nave nivuluxo nahu mu ilukuluku sookacamiha.”—Salumu 136:23.

Yaweereya ya Turu ennanihusiha echu yoochuneya: Echu yaphaama osuwela wi Muluku onanwerya—nave moohilekela onahaala—omaliha makacamiho oothene ni ovuta miithori ahu oothene. Eyo ennanikhaviherya ororomela wi nnahaala okhalano omwaahiyu woohakalaliha ni okhalano ekumi yaphaama hiihaano. Mu elapo yoosareya makacamiho, osuwela wi Muluku onnoosivelaani ennaruuha mphurelo waphaamaxa mu okumi anyu!