Yesu aahaahusiha achu okhala mwa murecele mukina ni mukhwaawe. Ekwaha emoha owo aaloca wa oomuchara awe: “Muhuupuwele wi orwa waka kiruuhale murecele veelaponi ya vathi. Nkiruuhale murecele, nto nivaka. Kirweenle ommwalanyiha, muchu ni atiithinya, mwaana a mwaamuthiyana ni amannya, pwiyamwaana ni apwiyamwaana awe.” (Mat. 10:34, 35) Tiheeni Yesu aataphuleleiye?

Yesu haachuna waamwalanyiha a veemusini mukina ni mukhwaawe, nyenya owo aanasuwela wi mahusiheryo awe yaahaala otannya okawanyeya mu imusi ikina. Mwawiihiiha, yaale analakelela okhala oohuserya a Kristu ni opatisiwa anaphwanela osuwela wi a veemusini vaya hesiveliwa ni yoolakelela aya. Ilukuluku ikina, oothelana aya naari akina a veemusini anahaala owiicaka ni weeriha okhala woovila wa yaawo otitelela okhala oororomeleya wa mahusiheryo a Kristu.

Piipiliya onnaaceenyerya Akristu “okhala mmureceleni ni achu oothene.” (Aro. 12:18) Nyenya mahusiheryo a Yesu enanwerya okhala ntoko “nivaka” mu imusi ikina. Eyo eneereya wakhala wi mmoha a veemusini oheemererya mahusiheryo a Yesu eniiha akina ekhoocaka naari waakaaha mahusiheryo awo. Wakhala wi ela yoheereya, achu yaala a veemusini annakhala ‘amwiicani’ a yoole ohusenrye eparipari.—Mat. 10:36.

Oohuserya a Kristu yaawo anakhala mu emusi yookawanyeya mmalapelo, ilukuluku ikina annahoolela makacamiho yaawo aneeha ororomeleya waya wa Yehova ni Yesu. Ntoko yootakiherya, amusi yaawo ahiri Anamoona a Yehova ananwerya waakhinyererya yaawo opaka makupa a ifesta sa malapelo aya. Vaavaa aneehiwaaya, taani anahaalaaya omuhakalaliha? Yesu oriye: “Yoowo onaakhwela atiithinya nari amannya okipwaha miyo, hanaphwanela okhala awaka.” (Mat. 10:37) Mweeparipari, Yesu haachuna oloca wi yaale anachuna okhala oohuserya awe yaaphwanela waasivelaka vakhaani asitiithi aya. Nyenya owo aahusiha mukhalelo wa opaka soolakelela soochuneya mu okumi aya. Wakhala wi amusi ahu yaawo ahiri Anamoona a Yehova annaakaaha wiilipixerya wahu omulapa Yehova, hiyaano ninnatitelela waasivela yaawo nyenya nsuwelaka wi omusivela wahu Muluku onaphwanela okhala mu nipuro noopacerya.

Moohikhwa minikwa, wiiciwa veemusini onanwerya okhala wawiicelaxa. Naamwiihiiha, oohuserya a Yesu anaphwanela wuupuwelaka masu awe ala: “Yoowo ohinateexa [mwiri awe woohooxiwavo] wi akichare, hanaphwanela okhala awaka.” (Mat. 10:38) Mmasu makina, Akristu annoona wiiciwa veemusini ntoko makupa a ohooxiwa wa oohuserya a Kristu nave annavilelano. Mu elukuluku emohamoha, awo annawehererya wi mukhalelo aya waphaama onahaala waaceenyerya amusi aya yaawo ahiri Anamoona a Yehova otoroka muupuwelo aya ni ochuna ohuserya michaka sa Mpiipiliyani.—1 Ped. 3:1, 2.