MWAHA WOOHUSERYA 29
NCIPO 121 Ti Woochuneya Wiivareryela
Mukhale Awiilipelela Ntakhara Yoocheka
“Mutitelele olipelela nave mvekeleke moohihiyererya, wi muhuuwele mu weehiwani.”—MAT. 26:41.
IPONTU SA VASULU
Mwaha ola onahaala onuupuxerya ochuneya waya opaka soothene nnaweryaahu wi nihipake yoocheka. Onahaala tho onuupuxerya ochuneya waya wiikasoopa wi nihipake ichu seiho ohoolo waya saahaala oneeriha opaka yoocheka etokweene.
1-2. (1) Olopola taani Yesu aavanheiye oohuserya awe? (2) Ntakhara heeni oohuserya yaamuhiya Yesu? (Moone tho iruku.)
“MWEEPARIPARI, munepa onnakhwela, nto mwiili ti wooceecheya.” a (Mat. 26:41) Ni masu yaala Yesu aahooniherya wi owo onniiwexexa wi naachu oohiphaameya nave nnahaala opaka yoocheka. Nto masu awe annaphitaanyerya tho olopola ola: Hannaphwanela okhala awiiroromela. Elukuluku vakhaani Yesu ahaakumve oloca masu yaala, oohuserya awe yaahiloca wi awo hiyaahaala omuhiya yoowo. (Mat. 26:35) Awo yaakhalano mathowa aphaama. Nto hiyaasuwela wi mu elukuluku yoovila waahaala okhala wookhweya wa yaawo oyeleela ikuru saya sa weera yeeyo eri yaphaama ohiya yeeyo eri yoonanara. Ti nthowa nene Yesu aaloponleiye yaawo ariki: “Mutitelele olipelela nave mvekeleke moohihiyererya, wi muhuuwele mu weehiwani.”—Mat. 26:41.
2 Moothananiha, oohuserya hiyaatitelenle owehererya. Vaavaa Yesu aaphariweiye, apwanne awo yaatitelela okhala ni yoowo naari wi yaari awoova nave echawa? Woona wi hiyaatitelenle wiilipelela, oohuserya yaaheera yeeyo ene yaaloncaaya wi hiyaahaala weera, awo yaamuchawa Yesu.—Mat. 26:56.
Yesu aaleelaka oohuserya awe wi etitelele olipelela ni wiikhapelela wa yaaweeha, nto awo yaamuhiya (Moone iparakrafu 1-2)
3. (1) Wi ntitelele okhala oororomeleya wa Yehova, ntakhara heeni nnaphwanelaahu osepa wiiroromela? (2) Tiheeni nnahaalaahu othokororya mmwaha yoola?
3 Hiyaano hinnaphwanela okhala awiiroromela. Mweeparipari, hiyaano noolakelela oheera echu vyakala yeeyo yaahaala omuhiciha Yehova. Naamwiihiiha, hiyaano naachu oohiphaameya nave onanwerya okhala wookhweya weehiwa opaka yeeyo eri yoonanara. (Aro. 5:12; 7:21-23) Moohiwehereryeya, hiyaano nnanwerya weehiwa opaka echu yeeyo eri yoonanara. Wi ntitelele okhala oororomeleya wa Yehova ni Mwanawe, nnaphwanela ochariha ekano ya Yesu ya okhala awiilipelela vaavaa nneehiwaahu wi nipake yoocheka. Mwaha yoola onahaala onikhaviherya weerano yeeyo. Woopaceryani, nnahaala othokororya makupa yaawo nnaphwanelaahu okhala awiilipelela. Voocherela, nnahaala othokororya mukhalelo nneeraahu nikhale awiilipelela vaavaa nneehiwaahu. Wookuchulani, nnahaala othokororya mukhalelo nneeraahu ntitelele okhala awiilipelela.
MAKUPA TAANI NNAPHWANELAAHU OTITELELA OKHALA AWIILIPELELA?
4-5. Ntakhara heeni nnaphwanelaahu wiikhapelela ophiyerya tho wa soocheka ikhaani?
4 Ophiyerya tho soocheka seiho inooneya okhala ikhaani inanwerya oceecheiha onthamwene ahu ni Yehova. Iho tho inanwerya oneeriha opaka soocheka itokweene.
5 Oothene ahu ninneehiwa wi nipake yoocheka. Nto oothene ahu nookhalano sooceecheiha soohiyanahiyana, mwawiihiiha ichu ikina inanwerya oneeha wi nipake yeeyo eri yoonanara. Ntoko yootakiherya, muchu mmoha onanwerya owanihaka ni yaweeha ya opaka mararuwo. Mukina onanwerya owanihaka ni mathitimanelo oolipa a opaka ichu sooripiheya, ntoko oceha ni woona epwitikiri. Nave mukina onanwerya owanihaka ni waakuvela onyeenyeya, wiirumiha naari woovelela weera yeeyo eri yaphaama wa nthowa na woova yeeyo achu akina anahaalaaya wuupuwela. Ntoko Tiyaku aalonceiye, “muchu oneehiwa moorweela wa ohuwelihiwa ni owokiwa ni soochunachuna sawe.”—Tiy. 1:14.
6. Nnaphwanela ororomeleya wa eheeni?
6 Apwanne nyuwaano moosuwela makupa yaawo anakhala wookhweya wa nyuwo weehiwa? Ti yawoopiha ohipwacha oceecheya wahu naari wuupuwela wi na achu oolipaxa nave nnanwerya osepa opaka yoocheka. (1 Yoh. 1:8) Opwaha soothene, Paulo aahooniherya wi naamwi yaale ‘ari awunnuwa omunepani’ ananwerya weehiwa wakhala wi hetitelenle wiivareryela. (Aka. 6:1) Nnaphwanela okhala oororomeleya wa hiyo aneene ni osuwela makupa yaawo nryaahu ooceecheya.—2 Ako. 13:5.
7. Nnaphwanela wiikhapelela wa eheeni? Mphwanaphwanihe.
7 Nimanle osuwela ichu seiho inaneeha vancipale, tiheeni nnaphwanelaahu weera? Nnaphwanela wiilipixerya wi niwerye ovootha saweeha seiho! Wi niphwanaphwanihe, mmahiku akhalai, makupa a epooma yaawo yaakuvelaxa ovoloweliwa, saari mikhora. Mwawiihiiha, mmikhora seiho yaanakhalamo alipeleli akuru. Moolikana, hiyaano nnaphwanela opwachaka phaama makupa yaawo nnasuwelaahu wi tookhweya ovoloweliwawo.—1 Ako. 9:27.
MUKHALELO WA OKHALA AWIILIPELELA
8-9. Ti mwawiihai mmiravo onalociwa mu Masiposipo ekapitulu 7 aahaaleiye owerya osepa opaka yoocheka etokweene? (Masiposipo 7:8, 9, 13, 14, 21)
8 Nni niwerye hai okhala awiilipelela? Muthokororye yeeyo nnahuseryaahu wa mmiravo yoowo onalociwa mu Masiposipo ekapitulu ya 7. Owo aapaka mararuwo ni muthiyana oocapaheya. Eversikulu 22 ennanleela wi mmiravo owo aamuchara muthiyana owo “moohilekela.” Nto iversikulu sa muculi sinnooniherya wi owo aapaka ichu soololo ahaakumve opaka ichu seiho samweerinhe opaka yoocheka mookhweya.
9 Tiheeni mmiravo ole eenreiye ahakumve opaka yoocheka etokweene? Woopaceryani, oxekuwa owo “aanavira aseremaka”. Voocharela owo aaheeca ayaaka owannyawe. (Mwaalakhanye Masiposipo 7:8, 9.) Nave vaava aamoonneiye muthiyana, owo haakookenle oculi. Ohiya yeeyo owo aaheemererya epexo awe nave aananwiriyana vaavaa aaloceiye sa ovaha mukucho wa murecele yoowo owo aachuneiye ovaha, akhweya eereryaka omulekecha wi uupuweleke wi owo haari muchu oonanara murima. (Mwaalakhanye Masiposipo 7:13, 14, 21.) Waakhanle wi mmiravo owo henre ichu seiha soololo, aahaala osepa yaweeha ya opaka echu yoonanara nave haahaala ocheka.
10. Ti mwawiihai olelo muchu aahaaleiye opaka yoohesa emohamoha yeeyo mmiravo ole aapankeiye?
10 Yaweereya ya Solomoni ennooniherya yeeyo enahaala owerya weereya wa mulapeli vyakala a Yehova. Owo onanwerya opaka yoocheka etokweene nave voocharela ooneke wi echu eri yoothene yeeren’ye “moohilekela.” Naari onanwerya oloca ariki: “Koonne weereya wene.” Nto wakhala wi owo ohuupuwelela yeeyo yeeren’ye, akhweya onahaala woona wi woopaceryani aapaka soolakelela soololo ahaakumve opaka yoocheka etokweene. Akhweya owo aahaathanla asinthamwene yaawo ahinamurumeela Yehova, naari akhweya mathatelo yaawo aathanlileiye orweela wa interneti naari mapuro yaawo aayeiyewo hiyaari oophwanelela wa Mukristu. Akhweya tho owo aahiya ovekela, omwaalakhanya Piipiliya, oya mmithukumano naari oolaleerya. Moolikana ni mmiravo onalociwa mu Masiposipo, yoocheka awe tahi yeeren’ye mootutuxa.
11. Tiheeni nnaphwanelaahu weera wi nihipake yoocheka?
11 Tiheeni nnahuseryaahuvo? Nnaphwananela osepa ohiya pahiru yoocheka nyenya tho ichu seiho ineeriha wi nipake yoocheka. Solomoni aahooniherya yeela mookwakwaleya amanle oloca sa mmiravo ni muthiyana oocapaheya. Alocaka sa muthiyana owo aahi: “Ohirimeele mu iphiro sawe.” (Masi. 7:25) Ophiyerya wi owo aaloca ariki: “Omurapeleke muthiyana yoola, ohaacameleru nsele na empa awe.” (Masi. 5:3, 8, PMM) Chiryeene, ninniivareryela wi nihipake yoocheka moorweela wa otitelela okhala ocai wa mikhalelo seiho saahaala oneeriha opaka yoocheka. b Ela enaphitaanyerya osepa mikhalelo naari saaweera ikina seiho sihiri soonanara wa Akristu, nto nnasuwelaahu wi inanwerya oneeriha wi neehiwe.—Mat. 5:29, 30.
12. Tiheeni Yupu aalakelenleiye opaka, nave ti mwawiihai eyo yaamukhavihenryaaya wiikhapelela wa yoohesa? (Yupu 31:1)
12 Wi nsepe mikhalelo seiho ineeriha wi nicheke, nnaphwanela opaka yoolakelela ya okhala awiilipelela. Ti yeeyo Yupu eenreiye. Owo ‘apaka waataana ni miitho awe’ wi ahirwe anwehe muthiyana mukina ni nchuno noonanara. (Mwaalakhanye Yupu 31:1.) Weera yeeyo owo aalakelenleiye opaka waanwerya omukhaviherya ohivolowa mu yawoopiha ya opaka mararuwo. Hiyaano tho nnanwerya olakelela osepa echu vyakala enooneya ntoko wi enanwerya oneeriha wi neehiwe.
13. Ntakhara heeni nnaphwanelaahu okhalano ekaasoope wa yeeyo nnuupuwelaahu? (Moone tho iruku.)
13 Nnaphwanela tho okhapelela muupuwelo ahu. (Muk. 20:17) Akina anuupuwela wi tahi yoonanara wiisaanyiherya epakaka echu yoonanara, woona wi tahi wi anamweerano mweelukuluku ene yeeyo. Nto muupuwelo yoola ti woonanara. Muchu yoowo onatitelela wuupuwelela ichu soonanara onahaala ochuna weerano yeeyo onuupuweleiye. Wakhala wi owo onneerano yeeyo, onneeriha okhala woovila olakelela ohipaka yeeyo eri yoonanara. Mweeparipari, ikwaha ikina miyuupuwelo soonanara inanwerya onirweela mmuupuweloni. Wakhala wi eyo yoheereya, echu yoochuneya weera ori ohiya wuupuwela ichu seiho mwawaakuveya ni oraaceeliha ni muupuwelo waphaama. Wakhala wi ninneerano yeela, hineeriha wi muupuwelo woonanara wunnuwe ophiyerya okhala nchuno ntokweene nenlo nnahaala okhala noovila owaniha nave akhweya ophiyerya oneeriha opaka yoocheka etokweene.—Afi. 4:8; Ako. 3:2; Tiy. 1:13-15.
Nnaphwanela osepa echu vyakala yeeyo enooneya ntoko wi enahaala oneeriha wi neehiwe (Moone eparakrafu 13)
14. Echu taani ekina eni enikhaviherye wiivareryela wa yoohesa?
14 Echu taani ekina nnaphwanelaahu weera wi niwerye wiilipelela wa saweeha? Nnaphwanela olekecheya moomalela wi ilukuluku soothene ti yaphaama wa hiyo wiiwelela malamulo a Yehova. Ikwaha ikina onnakhala woovila wa hiyo wuupuwela mukhalelo Yehova onachuneiye, nto wakhala wi nohiilipixerya weerano, nnamukhala oohakalala chiryeene.
15. Ti mwawiihai wunnuwiha nchuno naphaama oneeraaya onikhaviherye wiilipelela wa yaaweeha?
15 Nnaphwanela wunnuwiha nchuno naphaama. Wakhala wi noohuserya ‘wiica yoonanara nave nnachuna yaphaama,’ nnahaala olipiha yoolakelela ahu ya opaka yeeyo eri yaphaama ni osepa mikhalelo seiho saahaala oneeriha ocheka. (Amo. 5:15, PMM) Nchuno noophwanelela, nnanwerya oniceenyerya otitelela okhala oolipa vaavaa nnahoolelaahu mikhalelo saweeha seiho nahaawehereryaahu naari waanyiherya.
16. Ti mwawiihai miteko soomunepani ineeraaya inikhaviherye otitelela wiilipelela? (Moone tho iruku.)
16 Nni niwerye hai wunnuwiha nchuno noophwanelela? Nnanwerya weerano yeeyo moorweela wa okhala ooweiwa nipakaka miteko seiho inalipiha osivela wahu ntakhara Yehova. Vaavaa nnakhalaahu mmithukumano Seekristu naari mmuteko woolaleerya, honakhala wookhweya weehiwa wi nipake yeeyo eri yoonanara. Ohiya yeeyo, ninnalipiha nchuno nahu na omuhakalaliha Yehova. (Mat. 28:19, 20; Ahe. 10:24, 25) Moorweela wa waalakhanya ni ohuserya Masu a Muluku ni wuupuwelela yeeyo nnahuseryaahu, ninnalipiha osivela wahu yeeyo eri yaphaama ni wiica wahu yeeyo eri yoonanara. (Yos. 1:8; Sal. 1:2, 3; 119:97, 101) Muupuwele wi Yesu aahaaleela oohuserya awe ariki: “Mvekeleke moohihiyererya, wi muhuuwele mu weehiwani.” (Mat. 26:41) Vaavaa nnavekelaahu wa Tiithi ahu a wirimu, ninnamvaha ekari wi anikhaviherye nave ninnalipiha yoolakelela ahu ya omuhakalaliha yoowo.—Tiy. 4:8.
Opaka ichu seiho sinanaacameliha wa Yehova moohihiyererya, onnanikhaviherya osepa saweeha (Moone eparakrafu 16) c
NTITELELE OKHALA AWIILIPELELA
17. Yoocecheiha taani yeeyo yaatitelenle okhala nikacamiho wa Petru?
17 Akhweya nnanwerya ovootha sooceecheiha sahu ikina moomalela. Nto sookhalavo sooceecheiha ikina seiho nnaphwanelaahu owaniha mu elukuluku yincipale. Mutokororye yootakiherya ya murummwa Petru. Wa nthowa na owoova achu, owo aamukhooca Yesu ikwaha raru. (Mat. 26:69-75) Yaakhala ntoko wi Petru aavootha woova yoola vaavaa aavanheiye onamoona moolipa murima vamiithoni va Sineetriyu. (Saw. 5:27-29) Nyenya iyaakha ohoolo waya, “awoovaka yaale a nikhuuru na oothikiliwa”, owo mu elukuluku vakhaani aahiya olya ni Akristu yaawo yaahaari Ayuta. (Aka. 2:11, 12) Woova wa Petru waamukookela. Akhweya owo haavoonthe woova iwo moomalela.
18. Tiheeni eneereya ni oceecheya wahu okina?
18 Moolikana ni Petru, hiyaano tho ilukuluku ikina ninnawaniha ni oceecheya yoowo nuupuwelaahu wi noovootha. Ntoko yootakiherya, munna mmoha onneemererya: “Kaahiya woona ichu seepitikiri mu iyaakha khumi nave kaalekecheya wi nikacamiho naka noovira moomalela. Nto oceecheya waka waari ntoko mwaaxinama yoowo iipinthe aweheryaka elukuluku yaphaama wi ahiphele.” Moohakalaliha, owo haaceechen’ye. Owo aahoona wi onaphwanela weerakavo echu nihiku ti nihiku wi awanihe oceecheya wawe ni wi akhweya onahaala weerano yeela mu okumi awe woothene, mu elapo yeela yootakhala. Nnikhaviheryo na mwaariye ni atokweene a muloko awe, owo onnawerya okhalano ikuru sa ovootha woona epwitikiri.
19. Tiheeni nnaphwanelaahu weera wakhala wi nookhalano yooceecheiha yeeyo nlelo nihivoonthaahu?
19 Tiheeni nnaphwanelaahu weera waakhala wi yooceecheiha yeeyo nlelo nihivoonthaahu henaneeriha opaka echu yoonanara? Nnaphwanela ochariha ekano ya Yesu vooloca sa weehiwa yawi: “Mutitelele olipelela.” Ophiyerya mu ilukuluku seiho muniisoonaanyu wi mwa muchu oolipa, mutitelele osepa mikhalelo seiho saahaala oweerihaani omorela mu yaweeha. (1 Ako. 10:12) Mutitelele opaka ichu seiho sinookhaviheryaani owaniha ni oceecheya. Masiposipo 28:14, PMM oni: ‘Ooreeriwa ti yoole oniilipelela ilukuluku soothene.’—2 Pet. 3:14.
MIPHURELO SA OTITELELA OLIPELELA
20-21. (1) Miphurelo taani nnahaalaahu opuha wakhala wi nootitelela wiilipelela wa saweeha? (2) Wakhala wi noopaka makupa ahu, tiheeni Yehova onahaaleiye oneerela? (2 Akorintu 4:7)
20 Nnanwerya ororomela wi otitelela wiilipelela wa saweeha, ilukuluku soothene ti waphaama wa hiyo. Yoocheka enavaha pahiru “opuha wa elukuluku vakhaani” nto okhala mwawiiwanana ni malakiheryo a Yehova onahaala oneeriha okhala oohakalala mu elukuluku yawaaca. (Ahe. 11:25; Sal. 19:8) Ela eneereya nthowa nawi hiyaano naapakiwe wi nikhaleke mwawiiwanana ni iphiro sawe. (Map. 1:27) Naaneerano yeela, nnahaala opuha moorweela wa okhalano yawuupuxerya ya murima yaphaama nave muhoolo, nnahaala owerya okhalano okumi woohimala.—1 Tim. 6:12; 2 Tim. 1:3; Yuta 20, 21.
21 Eparipari wi “mwiili ti wooceecheya.” Nto ela henooniherya wi hinni niwerye weeravo echu wa sooceecheiha sahu. Yehova ori ooreheryeya onivaha ikuru seiho nnachunaahu. (Mwaalakhanye 2 Akorintu 4:7.) Mwawiihiiha, mooneke wi ikuru seiho Yehova onavahereryeiye ti soopwahaxa. Nto woopaceryani, hiyaano nnaphwanela weera soothene nnaweryaahu wi niwanihe ni saweeha. Wakhala wi noopaka makupa ahu, nroromele wi Yehova onahaala waakhula mavekelo ahu a onaaceererya ikuru vaavaa nnachunaahu seiho. (1 Ako. 10:13) Aai, nnikhaviheryo na Yehova, nnanwerya otitelela wiilipelela wa saweeha.
NCIPO 47 Vekelani wa Yehova Mahiku Oothene
a MASU ATHARIHIWE: Vaavaa Yesu aalonceiye sa “munepa” mu Mateyu 26:41, owo aataphulela nchuno nahu na opaka ichu saphaama. Vaavaa aalonceiye sa “mwiili” owo aataphulela wi woona wi naachu oohiphaameya navetho oocheka wiiliwiili ninnuupuwela ni opaka ichu soonanara. Mwawiihiiha, naamwi mu ilukuluku seiho nnachunaahu opaka yeeyo eri yaphaama wakhala wi haniikasoompe, muupuwelo ahu woohiphaameya onanwerya onirweela nave nipake yeeyo eri yonanara.
b Muchu yoowo opanke yoocheka etokweene onanwerya ophwanya nikhaviheryo mu liivuru Mpuhe Okumi Okhala Wookhala!, yoohuserya 57 iponto 1-3 ni mwaha “Miitho aa Eweheke Ohoolo” mu Mulipeleli a Novempuru a 2020, ipaax. 27-29, ipara. 12-17.
c OTHARIHIWA WA ERUKU: Munna aalakhanyaka yoorepa ya nihiku woosiiselo, aamwaalakhanyaka Piipiliya elukuluku ya almoosu nave ari mmithukumano sa veeri va esumana osekuwa.
