Olocihana waphaama oneereya vaavaa nyuwaano ni mwaninyu munaakhulelanaanyu mukumiheryaka vaate muupuwelo anyu.

Onnakhala woovila olocihana ni amiravo. Liivuru mmoha ooloca wi ‘mwaana akhala mukhaani onnaaleela makholo awe ichu soothene. Nave vaavaa onakhaleiye mmiravo onakhala woovila waaleela.’ Wakhala wi mmiravo onakhala ntoko hanachuna oloca, eyo elukuluku yoophwanela olocano!

Mucharihe elukuluku mwaninyu onataphuweiye oloca. Mweereno ela naamwi evolowelaka ochekula ohiyu eriyari.

“Muchu onnachuna wi, ‘vano tonachunaawe oloca? Ki tho naari vamoha nihiku noothene!’ Tahi woophwanela onyeenyeya mwanihu achunaka oloca ni hiyo. Teechu yaphaama tiithi ochekula ni mwanawe.”—Lisa.

“Okisivela waakuvela okona, nto kinnuupuwela ikwaha kaachekunlaaka phaama ni mwanaka, wi waari ohiyu eriyari.”—Herbert.

PIIPILIYA ONI: “Ahikhale oni asyeke ophama waweru, nto wa akhweiye.”—1 Korinto 10:24.

Musepe waakanyeryeya. Tiithi mmoha ooloca: “Vakina vaya kinnuupuwela ichu ikina anamwane aka erikimuloca. Awo annawerya woona wi kinnuupuwela ichu ikina yaalocaka!”

Wakhala wi ela enneereya ni nyuwaano, munwale TV nave muxipihe ikhankoonya soothene. Nwiriyane yeeyo mwaninyu onaloceiye nave mucicimiherye muupuwelo awe naamwi akhweya okhalaka ntoko hiwaano mphurelo.

“Niweerihe anamwane ahu woona wi ninnacicimiha muupuwelo aya. Wakhala wi hannathokororya, anahaala ocukucheryaka sawuukhula saya naari waavya nikhaviheryo makupa makina.”—Maranda.

“Muhinyeenyeye naamwi muupuwelo wa mwaninyu ohiri wawookololowa.”—Anthony.

PIIPILIYA ONI: “Onani phama miwelo anyu.”—Luka 8:18.

Mpharihele ekari yoothene. Vakina vaya anamwane anakhala ootaphuwa ekiranthe ehiwehanaka ethoi ni ethoi ni asitiithi aya.

“Ninnapharihela elukuluku ya mukwaha. Okiraathi nihiwehanaka ethoi ni ethoi ennanikhaviherya ochekula phaama.”—Nicole.

Elukuluku ya olya ennavaha tho ekari ya ochekula mootaphuwa.

“Mweelukuluku ya yoolya yooxekuwa muchu ti muchu onnaloca ichu saphaama naari soonanara simweerenle nihiku nenle. Ela ennaniiwananiha ni ororomela wi nnahaala okhaviheryana mu sookacamiha.”—Robin.

PIIPILIYA ONI: Muchu “akhale òmalelene wiwa, nto òhakuvela olotxa.”—Tiyako 1:19.