Achu oororomeleya annacicimihiwa ti asitiithi, asinthamwene ni asipwiya aya. Anniiwelela malamulo, annakhwaaniherya malakano aya ni annaloca eparipari.

Ikwaha sincipale otaphuwa muchu onakhaleiyeno onarweela wa ororomeleya wawe.

“Wi asitiithi anyu yoororomelekeni munaphwanela okhala awiichwelavo ni oohaakakhanyeya, ohiya pahiru eri vakhiviru vanyu nyenya tho eri ocai.”—Sarahi.

PIIPILIYA ONI: “Mwivarerye mukhatinyu.”—2 Korinto 13:5.

Waakhanle wi munnachuna ororomeliwaka ti akina, mweererye ikano iha inacharela:

Locani eparipari. Sawootha inahaala oweeriha akina ohiya woororomelaani. Wakhala wi munnataphuwa oloca eparipari, xaxaxa vooloca sa soohesa sanyu, achu anahaala woororomelaani.

“Ti wookhweya oloca eparipari wakhala wi ichu sinneeca phaama. Nto oloca eparipari mu ichu seiyo sinoonyemulihaani teni yaaceererye ororomeliwa wanyu.”—Caiman.

PIIPILIYA ONI: “Ninnakhwela wetxa ni wokololowa mwa sothene.”—Ahebri 13:18.

Khalani oororomeleya. Mu otholathola weeriweno o Estatu Unitu anamalapa awaakhwana 78% a nikhuuru nookhaviherya aaloca wi ‘ororomeleya mukhalelo woochuneyaxa wi muchu aphwanye muteko.’ Ohuserya okhala oororomeleya hiihaano enamookhaviheryaani muhoolo.

“Asitiithi aka annoona waakhanle wi ka muchu oororomeleya ni ophara miteko ohiri woochuneya olamuleliwa. Vaavaa kineeraaka yeela, awo annakiliva ni okiroromela waya.”—Sarah.

PIIPILIYA ONI: “Kinnorepela kiroromelaka wiwelela wà, kisuwelaka wi onamwera opwaha yeyo kivenkaka.”—Filémone 21.

Mpixe murima. Ti wookhweya akina woona wunnuwa woomwiilini, nto ennachuneya elukuluku yincipale wi akina yoone wunnuwa wanyu wa mmuupuwelo.

“Asitiithi anyu naari akina heni yoororomelekeni pahiru nthowa na echu emoha yaphaama mwenraanyu. Koma munahaala ororomeliwa wakhala wi munnaroromeleya ikwaha soothene.”—Brandon.

PIIPILIYA ONI: “Warani murima . . . womala.”—Kolosi 3:12.