Winston nkanleele mukhalelo ophwannyaawe eparipari.

Amusi aka hiyaarino malapelo. Hiyaano naakhala omaca, ocai wo Queensland, Australiya, miyaano pahiru kaalocihana ni achu a veemusini vaka. Vaavaa kaaryaakano iyaakha sawaakhwana khumi napiili, kaahipacerya ochuna osuwela sincipale vooloca sa Muluku. Kaahipaka nivekelo nave kaahimveka Muluku wi akikhaviherye ohuserya eparipari vooloca sa yene. Voocharela kaahikhuma omaca nave kiphwanya muteko o Adelaide, makupa Oohico a Australiya. Kirino iyaakha makhumi meeli nammoha, kaahikhuma ifeeriya kiya o Sydney, nave ti weiwo kimusuwenlaakawo Pam. Nave owo aahikileela sa israelismo-britânico, nikhuuru na malapelo neemererya wi achu o pritaaniko ta muyareriwo oniichaniwa “maloko khumi oorimeela a Isarayeli.” Mwawiiwanana ni malapelo yaawo, maloko khumi oorimeela ti maloko khumi a omwene woohico wa Isarayeli, yaawo yaakele wookapuroni variyari va iyaakha 800 ni 700 ehaakumve elukuluku ya Kristu. Vaava kaachikenlaaka o Adelaide, kaahiloca mwaha yoowo ni nthamwene aka oomutekoni. Owo iiha apacenrye omuhuserya Piipiliya ni Anamoona a Yehova, nave naahimaliha iwora sincipale nchekulaka xaxaxa vooloca sa soororomela sa Anamoona a Yehova. Ti vaava kiiwexenxaaka wi nivekelo nenle kaapankaaka kiri mwaana naamwaakhuliwa. Miyo kaahuserya eparipari vooloca sa Mpatuxa ni vooloca sa Omwene awe! Waari ntoko wi kaaphwanya nluku “noowalamelasha.”—Mat. 13:45, 46.

Pam weyaano tho waapacenrye waavya nluku nenlo ovinyerya ori mwaana. Waphwannye hai?

Miyo kinnunwe mu emusi yaapaka makupa mmalapelo. Naakhala o Coffs Harbour, elapo yeeyo eri o Nova Kales makupa Oohico. Asitiithi aka ni asivovo aka yaachara miruku sa israelismo-britânico. Miyaano, munnaka mukhaani ni murokora aka mutokweene, ophitaanyerya asipirimo aka, woosiilo ene  naahusihiwe wi Muluku onaapwacha achu yaawo anarweela mu nloko na o pritaniko. Nyenya miyo nkaalekechen’ye ni yeeyo. Miyo kaachuna osuwela sincipale vooloca sa Muluku. Vaavaa kaaryaakano iyaakha khumi nasese, kaaya mu ikerexa sincipale sa vamucecheni: ekerexa ya anklikaana, patista, ativentista setimu tia ni ikina. Naamwi hiiha nlelo kaahikhalano etala yoomunepani.

Voocharela emusi ahu yaahithaamela o Sydney. Ti weiwo kaamusuwenlaakawo Winston, yoowo aakhumme ifeeriya. Ntoko olonceiye, hiyo naanavaanela mu elukuluku yawaaca vooloca sa malapelo, nave eyo yaahimuceenyerya omuhuserya Piipiliya ni Anamoona a Yehova. Ikaarata seiho aakirumiheleiye saanakhalano soorepa sincipale sa Piipiliya! Woopaceryani, kaahikhala awuukhuwa—ophiyerya wi kaahikhala oonyeenyeya. Nyenya vakhaani vakhaani kaanoona waarya wa eparipari.

Mu 1962, kaahithameela o Adelaide wi kikhale vakhiviru va Winston. Owo aahirehererya nipuro wi miyo kikhalekevo—vachekoni va Thomas ni Janice Sloman, mutheli mmoha a Anamoona a Yehova yaawo yaarumeenle ntoko mamisiyonaariyo o Papuwa Nova Kine. Awo yaahikikhaliha phaameene. Pahi kaarino iyaakha khumi nathanu nararu, nave awo yaahikikhaviherya vancipale wunnuwa omunepani. Miyaanotho kaahipacerya omuhuserya Piipiliya nave moohilekela kaahilekecheya wi kaahiphwanya eparipari. Nimanle opaka othela miyo ni Winston, moohilekela naahiveleela ikumi sahu mmuteko wa Yehova yoowo oniruuhenle mareeliho mancipale. Eparipari wi mukhalelo yoola wa ekumi waahikhalano makacamiho, nyenya wooneeriha osivelaxa nluku noowalamela nenlo naaphwannyaahu.

Winston, onleele vooloca sa iyaakha sanyu soopacerya mmuteko wa Yehova.

Mu elukuluku vakhaani nimanle opaka othela, Yehova aahipacerya ‘ohula milako mitokweene wi nlape.’ (1 Kor. 16:9) Munna yoowo aanoonihenre mulako woopacerya aari Jack Porter. Mu elukuluku yeele, owo ari oweherya a ekulucu ahu. (Olelo, nnarumeela vamoha mu nikhuuru na efiliyale yo Peteli yo Australiya.) Jack ni mwaariye, Roslyn, yaahiniceenyerya okhala mapiyoneero ookilaatheya. Nahikhalano ekari ya okhala mmuteko woopiyoneero iyaakha thanu. Vaavaa kaaryaakano iyaakha makhumi meeli nathanu nasese, naahiwompwa orumeela mmuteko wa weeceeca o ivilivili so Pasifiko oohico, mu elukuluku yeele saakhapeleliwa ni Epeteli yo Fiji. Ikulucu sahu saaphitaanyerya o Samowa Amerikana, Samowa, Kiripati, Nawuru, Niue, Toquelau, Tonka, Tuvalu ni Vanuwatu.

Mu elukuluku yeele, achu a ivilivili soorakamela yaanaakhwa minikwa Anamoona a Yehova. Mwa yeeyo, naaphwanela okhala oovyaka ni oomaaleleya. (Mat. 10:16) Miloko saari mikhaani, nave tahi wi ilukuluku soothene anna yaanakhalano nipuro na onihaiha. Wa nthowa nenlo, naanaveka nipuro noohayavo wa achu a vamucecheni, nave awo ikwaha soothene yaanakhala oreera murima ni hiyaano.

Winston weyo wookhalano nchuno ntokweene ni muteko wootaphulela. Tiheeni yeerinhe nchuno nenlo?

Mu elukuluku yeele, anna a evilivili yo Tonka pahi yaarino ifolyeto ni aliivuru vakhaani mu elocelo ya tonkanes, elocelo ya muceche wo Polinesiya. Wi yeecihe soohuserya, yampharihela liivuru A Verdade Que Conduz à Vida Eterna a Enklesi. Vano, naahikhalano esikola ya atokweene ya isumana sese. Anna araru yaawo yaahaasuwenle enklesi phaama yaheemererya omutaphulela liivuru A Verdade mu elocelo ya tonkanes. Pam aahimurepa mu ekhankoonya liivuru oothene yoowo aataphuleliwe ni mata, nave naahimurumihela o Peteli yo Estatu Unitu wi imprimiiriwe. Muteko woothene waamalinhe isumana thanu nararu. Naamwi mukhalelo liivuru owo aataphuleliweiye wahaari wookwakwaleyaxa, liivuru aahaakhaviherya achu ancipale yaawo yaaloca etonkanes ohuserya eparipari. Pam ni miyaano tahi na alipa ootaphulela, nyenya yaweereya yeela yooneeriha okhalano nchuno ni muteko yoola.

Pam, tuuvi waari mukhalelo wa okumi o Ivilivili nalikanyiha ni wo Australiya?

Waari woohiyana! Mwawiiwanana ni muceche, naaphwanela ovilela ni nikhuuru na atupusi, oviha woopwahererya, oriirya, makhule, ireca navetho ikwaha ikina othowa wa yoolya. Wi nchuwale seiya, omakuchuwelo wa nihiku naaphwanela wiichuwa nivareryaka oreera wa eniya. Hiyo naakhala mu fale—nsina na elocelo yo samowa, xaxaxa vooloca sa empa yo Polinesiya yaachuneliwa ni manasi ehirino  exiri. Ohiyu, mweeri waaryaka, naanawerya woona ocikinyeya wa miri sa ikokho ni waarya wa mweeri mu eniya. Saakhala ilukuluku soohakalaliha saaneeriha wuupuwelela ni ovekela. Naanawerya ohiya muupuwelo woonanara okhwipi ni otikitheryeya mu ichu saphaama.

Hiyo naanaasivela anamwane! Awo yaari oochekuleyano nave yaanakhalano nchuno na osuwela ichu sincipale vaava yaanoonaaya, akhopela eeli, akunya. Mu ekwaha emoha, vavaa naasekuryaahu o Niue, mwaana mukhaani aahiphiya ni aaparerya moono wa Winston yoowo waarino mapururu, nave aloca: “Miyo koosiveliwa ni mapururu aa.” Kinoona wi mwaana ole hantonko woona moono woosareya mapururu ntoko yoole nave haasuwenle mukhalelo woothariha!

Echu yaanithananiha waari woona mikhalelo soonanara achu yaakhalaaya. Awo yaarukureryiwe ni mapuro ooreera, nyenya yaarino mukhalelo wa ekumi wookotakota nave yaarino maahi aphaama vakhaani. Nyenya annihu hiyooniherya wuukhuwa. Ichu seiho saari sawaakhwanela wa yaawo. Pahi okhalano emusi vakhiviru, okhalano nipuro wi emulapeleke Yehova ni owerya omurumeela yoowo saanaweeriha okhala oohakalala. Yootakiheryaaya yoonikhaviherya woonaka yeeyo eri yoochuneyaxa ni otitelela okhalano ekumi yookhweya.

Pam, weyaano ilukuluku ikina waanarika maahi mukhataa wi orehererye yoolya mmikhalelo soohiyana seiyo wahaakhovelenlaawe. Waawenrye hai opaka yeeyo?

Miyaano kinnaathamalela vancipale atiithi aka. Awo yaakihusiha ichu sincipale soophara muteko. Ntoko yootakiherya, mukhalelo wa wiiseela mooro, waapeya ni mukhalelo wa opharihela ichu savakhaani. Vaavaa naapankaahu oxekurya o Kiripati, naahikhala mu empa ekhaani yeeyo yaachuneliwe ni manasi, nave vathi vaya waahiheliwavo koral nave exiri yaari ya mithala. Wi niwerye waapeya, miyaano kaaphwanela okaca nlici ni wiiseela mooro. Kaanavonyeravo vaikho makate a ikokho wi mooro otitelele ovarela. Wi kikhaleno maahi, kaaphwanela okhala mpiixani ni athiyana akina wi kirike maahi veehimeni. Awo yaarika maahi epharihelaka echu yaalikana ni ekopo ya omesano: Ekopo ya meeturu meeli ni mukoi mukhaani yoowo waamakeleliwa okhomoni wa ekopo. Nyenya opwaha omuhelawo nancoolo okhomoni wa mukoi, awo yaamakelelawo elaata. Muthiyana ti muthiyana aanakhalano elukuluku wi avonyeremo mukoi awe mweehimeni, nave mu elukuluku yoophwanelela aanatannya moono mwawaakuveya. Elaata yaanarukunuwa nave esareya maahi. Miyo kaahuupuwela: “Yootepa okhweya!” Ophiyerya wi yaaphiya elukuluku aka. Kaahivonyeramo mukoi ikwaha sincipale, nyenya ikwaha soothene elaata yoona omana maahi nave hiyaapwina! Voocharela athiyana oothene emanle okitheya, muthiyana mmoha aarwa akikhaviherya. Achu aweiwo toothokororya ni ooreera murima.

Oopiili anyu mwaanasivela muteko anyu mu ivilivili. Apwanne mwanwerya onleela ilukuluku savameekhaaya mwaaraanyuno weiwo?

Winston: Naahimaliha elukuluku wi nihuserye sookhovelela ikina. Ntoko yootakiherya, vaavaa anna yaapakaaya yoolya, awo yaananivaha yoolya yoothene. Nyenya hinaasuwenle wi yookhovelela yaari wi nihiyemo wi awotho elye. Nave, hiyaano naanalya yoolya yoothene awo yaanivahaaya! Evelevelo wi, voocharela naahisuwela mukhalelo ichu seecaaya, nave naanahiyamo yoolya wa yaawo. Moohipwacha soohesa sahu, anna yaananiiwexexa. Nave vaavaa yaanoonaaya nikookaka wi naasekurye sivinre miyeeri mithanu nammoha, awo yaanatepa oohakalala. Mweeparipari, pahiru naari Anamoona a Yehova yaawo yaasuwenlaaya ophitaanyerya ni achu a mmulokoni mwaya.

Osekurya wahu waanavaha onamoona waphaama mmicecheni. Achu ancipale a vamucecheni yuupuwela wi malapelo a anna yaari echu awo yaapacerinhaaya. Nyenya vaavaa yaamoonaaya murummwa a elapo ekina vamoha ni mwaariye esekuryaka muloko, achu yaaniiwexexa wi muloko yoole waari vapooma hiwaari yooleru pahi, nave yaanakhala ootikhiniheya.

Pam: Yaweereya emoha kihinacuwalaaka, yeeren’ye o Kiripati. Muloko wa weiwo waarino anna a vakhaani ni mutokweene mmoha, yoowo iichaniwa Itinikai Matera. Owo aanapaka soothene wi anikhapelele phaama. Nihiku nimoha, owo aarwa ni ephace mummo waarimo pahiru nooce nimoha. Owo aaloca: “Tinawinyu.” Ophwanya nooce na mwanakhu  mmukuma yoole yaari yoovila. Yoovaha yeele ekhaani ya wooniherya mahala yaatannya vancipale murima ahu.

Iyaakha ohoolo waya, Pam, orupanle erukulu yaamoramo. Tiheeni yookhavihenrye ovilela nnikacamiho nenlo?

Miyaano kaahirupala mu 1973 elukuluku naaryaahu o Pasifiko Oohico. Naahikookela o Australiya, nyenya ivinrevo miyeeri misese naahiyeleela nikwiya nahu. Winston aahithanana; mweeparipari, aari mwanawe tho. Osooseya waka waahivukuwa moovira wa elukuluku, nyenya osooseya iwo pahiru waamanle mwawaakhwanela vaavaa naamwaakhenlaahu Mulipeleli 15 a Apirili a 2009 (a ekunya). Mwaha waari mu “Makoho a Alipa Waalakhanya” waahikhalano nikoho: “Existe esperança de ressurreição para um bebê que morre no ventre da mãe?” Mwaha wahinuupuserya wi eyo eri mmatani mwa Yehova, nave owo ilukuluku soothene onapaka yeeyo eri yawookololowa. Owo onahaala omulamulela Mwanawe “wi anyaanye miteko ya musaserya” nave avolihe makhwaca oothene elapo yeela yootakhala enruuhenlaaya. (1 Yoh. 3:8) Mwaha yoowo woonikhaviherya ovaha esisapo “nluku” noowalamela nenlo pahiru nri ni achu a Yehova. Tiheeni yaahaala weereya ni hiyo waakhanle wi hinaano ewehereryo yeeyo Omwene onavahaaya?

Nimanle omuyeleela mwanihu, naahikookela mmuteko wa elukuluku yoothene. Naahikhala miyeeri vakhaani o Peteli yo Australiya nave voocharela naahikookela wanawiili mmuteko ahu wa weeceeca. Mu 1981, sivinre iyaakha sese ntoko alipa aweececa o Nova Wales Oohico ni o Sydney, naahiwompwa oya o Peteli yo Australiya, nave ti weiwo nryaahuwo ophiyerya olelo.

Winston, apwanne elukuluku orumenlaawe o Ivilivili so Pasifiku Oohico, yohookhaviherya mmuteko aa ntoko mmoha a Nikhuuru na Efiliyale yo Australiya?

Aai, nave mmikhalelo soohiyanahiyana. Yoopacerya, Australiya aahithanliwa wi akhapeleleke muteko wo Samowa o Amerika ni Samowa. Voocharela, waahikhalawo opweseheryiwa wa ifiliyale so Australiya ni Nova Selantiya. Vano, ekulucu enakhaviheryiwa ni Epeteli yo Australásia enaphitaanyerya Australiya, Samowa o Amerika ni Samowa, ivilivili Kook, Nova Selantiya, Niue, Timor-Leste, Tokelawu, ni Tonka—mapuro yaawo kaaryaakano ekari ya osekurya ntoko aweemelela a efiliyale. Saweereya kaaryaakano variyari va olapa ni anna ni arokora yaala oororomeleya mu ivilivili seiha sookikhaviherya vancipale, vano kinaweryaaka waarumeela yaawo orweela o Peteli nno.

Kihaakumve okuchula, kaamusiveliwa oloca wi, hiihaa ntoko yeeren’yaaya ni Pam vamoha ni miyaano, tahi pahiru achu awunnuwelavo tanamwaavya Muluku. Amiravo ni asimwali annachuna tho ‘nluku noowalamelasha’—naamwi achu a veemusini ehooniheryaka nchuno. (2 Mam. 5:2, 3; 2 Math. 34:1-3) Moohikhwa minikwa, Yehova Muluku oosivela, nave owo onachuna wi oothene, amiravo ni asimwali, vamoha ni awunnuwelavo ephwanye ekumi!

Vaavaa miyo ni Pam naapacenryaahu waavya eparipari opwaha iyaakha makhumi mathanu muculi, hinaasuwela mpuro taani waavya iwo waahaalaaya onikerihawo. Mweeparipari, eparipari ya Omwene nri nluku na esisapo yoowalamela. Nave hiyo nri oolekecheya opharelela nluku nenla na esisapo ni ikuru sahu soothene!