1 Akorintu 5:1-13
5 Echu eneereya ti yawi ennalociwa wi variyari va nyuwo wookhalavo ocapaheya,* ocapaheya* yoowo ohintonko ophwanyeya variyari va maloko: Mulopwana mmoha onakhala ni* amwaara a apapa awe.
2 Nave nyuwo muniirumiha ni yeeyo? Vano himwaaphwanela othananaka, wi muchu yoowo eenreno yeeyo aviihiwevo veeri vanyu?
3 Naamwi kihiri ni nyuwo mwa mwiili, kiri ni nyuwo mwa munepa, nave koomala omuthoriha mulopwana yoowo eenreno yeeyo, ntoko wi kiri ni nyuwo weiwo.
4 Vaavaa munathukumanaanyu mu nsina na Apwiya ahu Yesu, musuwelaka wi kiri ni nyuwo mwa munepa ni owerya wa Apwiya ahu Yesu,
5 mumveleele mulopwana owo wa Satana ntakhara otoloxiwa wa mwiili, wi munepa ovuluxiwe mu nihiku na Apwiya.
6 Mathowa anyu awiirumiha tahi aphaama. Hamusuwenle wi yooruruvaliha* vakhaani ennaruruvaliha ephepa yoothene yaweetheiwa?
7 Mviihevo yooruruvaliha yakhalai, wi mukhale ephepa yaweetheiwa evyaani, ehirino yooruruvaliha hiiha ntoko muhiryaanyu chiri. Mweeparipari, Kristu, epucepuche ahu ya Paska, ooveleeliwa mukucho.
8 Mwawiihiiha nilye efesta ohiya ni yooruruvaliha yakhalai, naari ni yooruruvaliha yoonanara ni yootakhala nto ni ipaau ihirino yooruruvaliha, yawookololowa ni yeeparipari.
9 Mu ekaarata aka kihoorepelaani wi mmaale okhala vamoha ni* achu oocapaheya,*
10 kihichunaka oloca wi muhikhaleke ni achu a elapo yeela yaawo anacapaheya,* naari a nrima, naari awiiphwanyerya, naari oolapa soophwaniherya. Yaari hiihaa, nyuwo mwaaphwanela ovinyamo mweelaponi.
11 Nto vano, kinnoorepelaani wi mmaale okhala vamoha ni* oothene yoole oneeriwa munna, ari capaheya,* a nrima, naari oolapa soophwaniherya, ooloca moonanara,* oohapaliwa, awiiphwanyerya, naari olya mano ni muchu ntoko yoowo.
12 Apwanne ti wawaka waathoriha ahiri a mmulokoni? Mano, tahi nyuwo munaathoriha a mmulokoni,
13 aniiha Muluku aathorihaka yaale ahiri a mmulokoni? “Mumviihevo muchu oonanara variyari vanyu.”
Inoota
^ Mu Ekriki, porneiya. Moone Masu Atharihiwe.
^ Mu Ekriki, porneiya. Moone Masu Atharihiwe.
^ Mu Ekriki, “onaakoniha.”
^ Naari: “livirina.”
^ aari: “waataana ni.”
^ Moone Masu Atharihiwe, “Ocapaheya.”
^ Moone Masu Atharihiwe, “Ocapaheya.”
^ Naari: “waataani ni.”
^ Moone Masu Atharihiwe, “Ocapaheya.”
^ Naari: “oophuca.”
