Luka 7:1-50
7 Vaavaa aamalinheiye oloca ni achu, owo aavolowa o Kafarnawu.
2 Weiwe, aakhalawo muhooleli aanakhoco aarino kapuro awe aamusiveleiye, aatempe wiiceliwa anahala vakhaani okokhowa.
3 Muhooleli aanakhoco iiwaleiye sa Yesu, aahaarumiha asitokweene akina a Ayuta wi yamveke wi arwe, ampenuxe kapuro awe.
4 Yaaphiyalaaya wa Yesu, awo yaapacerya omveka mwa nthiti, eriki: “Pwiya, owo onnaphwanela nikhaviheryo nanyu,
5 woona wi onnasivela nloko nahu nave ti yoowo otenke nipuro nahu na malapelo.”*
6 Mwawiihiiha, Yesu aacimula ni yaawo. Nyenya aacamelaka vaate, muhooleli aanakhoco aahaarumiha asinthamwene awe wi yaloce ni Yesu eriki: “Pwiya, muhuukhuwe, woona wi nkiri oophwanelela owaakhelaani owannyaka.
7 Ti nthowa nene koonaaka wi nkiri oophwanelela orwa wa nyuwo. Nto muloce nsu, nave kapuro aka onampenuwa.
8 Miyo tho ka muchu kinalamuleliwa nave kookhalano anakhoco kinaalamulelaaka; nave kaloca wa mmoha: ‘Hawe!’ owo onnayawo, wa mukina: ‘Orwe!’ owo onnarwa, nave kaloca wa namalapa aka: ‘Weere ela!’ owo onneerano.”
9 Vaavaa Yesu iiwaleiye yeela, aatikhina nave aarukunuwela wa muloko* wa achu waamuchara nave aaloca: “Kinnooleelaani: Naari mano o Isarayeli, haavo muchu kimphwannyaaka ni nroromelo si nenla.”
10 Nave yaale yaarummwe, yaakookenlaaya owaani, yaamphwannye kapuro apenunwe.
11 Vahilekenle, Yesu aapaka mukwaha ayaaka epooma yawiichaniwa Nayini, nave oohuserya vamoha ni muloko mutokweene wa achu waari ni yoowo.
12 Aacamelaka va mulako wa epooma, aakumanano achu eteenxe muruchu, mwaana a mwaamulopwana mmoharu* a naamukhwele. Achu ancipale a epooma yeele yaanamuhoola maayi yoole.
13 Vaavaa Apwiya yaamoonnaaya, yaamoriwa ikharari, nave eloca: “Omaale wunla.”
14 Yesu aawaacamela, atannya ntethe, nave yaawo yaatenxe yaaheemela. Voocharela aaloca ariki: “Mmiravo, miyo kinnooleela: Vinya!”
15 Mulipa ookhwa aakiraathi, apacerya oloca nave Yesu aamveleela wa amama awe.
16 Hiihaa, oothene yaasareya woova, epacerya omucicimiha Muluku eriki: “Mwa hiyo ohooneya mulipa a miririmu mutokweene,” nave “Muluku oowuupuwelela achu awe.”
17 Michaka seiha vooloca sa Yesu saamwaramwaxeya o Yuteya woothewene vamoha ni mapuro oothene oorukurerya.
18 Voocharela, Yohani aaleeliwa ichu soothene iha ni oohuserya awe.
19 Mwawiihiiha, Yohani aawiichana oohuserya awe eeli, aaruma wa Apwiya wi yaakohe eriki: “Ti nyuwaano Mwaahaala Orwa, naari wi ninweheryeke mukina?”
20 Alopwana yaale yaamphwannyaaya Yesu, yaalocano: “Yohani Mpatisi ooniruma wi nookoheeni: ‘Ti nyuwaano Mwaahaala Orwa, naari wi ninweheryeke mukina?’”
21 Elukuluku ene yeele, Yesu aahaapenuxa awiiceliwa ancipale, awuukhuwa mmwiilini, ni oophariwa ni minepa soonanara. Aahaavaha tho woona alipa eevaasi ancipale.
22 Awaakhulaka, owo aahi: “Haweni, mwamuleele Yohani soothene monnaanyu ni mwiiwalaanyu: Oohoona vano annoona, oorakala anneeca, a mareca annapenuxiwa, oohiiwa anniiwa, alipa ookhwa annaviihiwa nave michaka saphaama sinnalaleeryiwa wa achu oohaawa.
23 Oohakalala ti yoole ohinaphwanya mwa miyo echu yoomukwachuliha.”
24 Vaavaa anamichaka a Yohani yaarowaaya, Yesu aapacerya oloca ni muloko yoole wa achu vooloca sa Yohani, ariki: “Tiheeni mwaakelaanyu woona otakhwani? Akhweya ehece enatannyiwa ni echeku?
25 Vano tiheeni mwaakelaanyu woona? Muchu owanre soowara sooreeraxa? Nyenya, yaale anawara soowara sooreeraxa nave enapuha anakhala vaate va mamwene.
26 Vano, tiheeni mwaakelaanyu woonawo? Mulipa a miririmu? Chiri kinnooleelaani, owo mutokweene ompwaha mulipa a miririmu.
27 Ola ti yoowo saarempwe sa yoowo wi: ‘Onani! Kinammurumiha namichaka aka ohoolo waa,* yoowo onahaala orehererya ephiro aa.’
28 Kinnooleelaani wi, mwa achu oothene ooyariwa ti athiyana, haavo ori mutokweene ompwaha Yohani, nyenya yoowo ori mukhaani mu Omwene wa Muluku ti mutokweene ompwaha yoowo.”
29 (Vaavaa achu oothene ni alipa a muxokho yiiwalaaya yeela, yaanalaleya wi Muluku teekhaikhai, woona wi yaapatisiwe ni opatiso wa Yohani.
30 Nyenya Afarisi ni alipa oohusiha Malamulo hiyaacicimiha ikano* sa Muluku, woona wi hiyaapatisiwe ni Yohani.)
31 “Vano, muyareriwo ola wa achu kilikanyihe naani, nave onalikana naani?
32 Ari ntoko anamwane akiranthe mmapuro a maroca, ekhuwelaka wa akhwaaya, eriki: ‘Noowiipa anamviiro, nto nyuwo himwinne; nohinla ikucho, nyenya nyuwaano himwinlale.’
33 Moolikana tho, Yohani Mpatisi oorwa ahilyaaka epaau naari owurya eviinyu, nto nyuwo muni: ‘Owo ookhalano masololo.’
34 Mwaana a muchu oorwa alyaaka ni owurya eviinyu, nto nyuwo muni: ‘Mmoone! Namalya, mvona, nthamwene aalipa a muxokho ni alipa oocheka!’
35 Nto, miruku inooneya wi ti seekhaikhai,* moorweela wa anamwane aya oothene.”*
36 Mfarisi mmoha aatitelela omveka Yesu wi alyeno vamoha. Hiihaa, Yesu aaya vaate va Mfarisi nave aahaamela meesa.
37 Muthiyana mmoha aasuweliwe va epooma wi aari mulipa oocheka, aasuwela wi Yesu onalya* vaate va Mfarisi nave aakuxa nipotoro na alapastru yaarimo makhurwa awunkhela.
38 Ari oculi wa Yesu, aakokhora va manaani awe, anlaka aapacerya onaaniha inaani seihe ni miithori, anapupucha ni miihi awe. Nave tho aanapexaara* inaani sa Yesu amiinelaka makhurwa yaale awunkhela.
39 Oonaka yeela, Mfarisi yoowo aanwompe Yesu aaniilocela ariki: “Mulopwana ola aari mulipa a miririmu aamusuwela wi muthiyana yoola onamutannya mulipa oocheka.”
40 Nto Yesu aamwaakhula ii: “Simoni kookhalano echu ya wooleela.” Owo aahaakhula: “Muhusiha locani!”
41 “Alopwana eeli yaapoleya ikhorowa wa muchu mmoha; mmoha arino mankaawu a itenaariyu masana mathanu nave mukina makhumi mathanu.
42 Woona wi oopiili hiyaawenrye omuliva, owo aahaalevelela. Wa yaale eeli taani onahaala omusivelaxa?”
43 Simoni aamwaakhula ii: “Kinoona wi ti yoole oleveleliwe vancipale.” Yesu aahi: “Wohaakhula phaama.”
44 Hiihaa, arukunuwelaka wa muthiyana, aaloca wa Simoni ariki: “Onnamoona muthiyana ola? Koovolowa mpa mwaa nto hokivanhe maahi oorapihano inaani saka. Nyenya muthiyana ola oonaaniha inaani saka ni miithori awe nave oopupucha ni miihi awe.
45 Weyo hokivanhe epeexu, nto muthiyana ola, ovinyerya elukuluku kivolonwaaka hamaanleru ovaha epeexu inaani saka.
46 Weyo homiinenle makhurwa muru aka, nto muthiyana ola oomiinela makhurwa awunkhela mu inaani saka.
47 Wanthowa na yeela, kinnooleela wi, naamwi soocheka sawe saance* sooleveleliwa, woona wi ohooniherya osivela otokotoko. Nto yoole onaleveleliwa tonto, onasivela tonto.”
48 Voocharela owo aahi wa muthiyana: “Soocheka saa sooleveleliwa.”
49 Yaawo yaahaamenle meesa yaapacerya oloca yaawoyaawo eriki: “Taani yoola onawerya tho olevelela soocheka?”
50 Nto owo aaloca wa muthiyana: “Nroromelo naa nohoovuluxa; hawe mmureceleni.”
Inoota
^ Mu Ekriki, “sinakooka ahu.”
^ Naari: “mucici.”
^ Mu Ekriki, “ooyariwa meekheiye.”
^ Mu Ekriki, “vamiithoni vaa.”
^ Naari: “ohoolela wa.”
^ Naari: “seeparipari.”
^ Naari: “wa sookhumelela saya.”
^ Naari: “aahaamela meesa.”
^ Naari: “ananuula.”
^ Naari: “iri itokweene.”
