Mateyu 9:1-38
-
Yesu onnampenuxa mulipa oorakala (1-8)
-
Yesu onnamwiichana Mateyu (9-13)
-
Nikoho vooloca sa wiinanela olya (14-17)
-
Mwaana amwaamuthiyana a Xairo; muthiyana onnatannya niveru na yoowara ya Yesu (18-26)
-
Yesu onnaapenuxa eevaasi ni oohiloca (27-34)
-
Muteko wa ohaca wootepa waaca, nyenya anamuteko ene ari avakhaani (35-38)
9 Mwawiihiiha, Yesu aanwela mwaaceya alapuwela okhopela nave aya epooma aakhaleiyewo.
2 Moohilekela, yaamuruuhela mulopwana oorakala aateleliwe vantetheni. Oonneiye nroromelo naya, Yesu aahi wa mulipa oorakala: “Olipe murima, mwanaka! Soocheka saa sooleveleliwa.”
3 Va wiiwa yeela, alipa oorepa akina yaaniilocela eriki: “Mulopwana ola onnamunyemula Muluku.”
4 Yesu, asuwelaka muupuwelo aya, aaloca: “Ntakhara heeni munuupuwelaanyu ichu soonanara mmurimani mwanyu?
5 Ntoko yootakiherya, tiheeni eri yookhweya oloca, ori wi: ‘Soocheka saa sooleveleliwa,’ naari wi: ‘Vinya nave weece’?
6 Nyenya, wi musuwele wi Mwaana a muchu oovahiwa owerya veelaponi yavathi wa olevelela soocheka . . .” voocharela owo aaloca wa mulipa oorakala: “Vinya, oteexe ntethe naa, nave oroweke.”
7 Nave owo aavinya arowa.
8 Vaavaa muloko* woonnaaya yeela, waapacerya woova, nave waamucicimiha Muluku, yoowo aavanhe achu owerya ntoko yoola.
9 Voocharela, Yesu aamoona mulopwana awiichaniwa Mateyu akiranthe va nipuro na olivavo muxokho, nave aalocano: “Okhale oohuserya aka.” Moohilekela, owo aavinya anamuchara.
10 Ohoolo waya, Yesu alyaaka* vaate va Mateyu, yaahiphiya alipa a muxokho ancipale ni alipa oocheka nave epacerya olya* ni Yesu vamoha ni oohuserya awe.
11 Nto Afarisi* yoonnaaya yeela, yaahaakoha oohuserya a Yesu eriki: “Ntakhara heeni muhusiha anyu onalyeiye ni alipa a muxokho vamoha ni alipa oocheka?”
12 Yesu iiwaleiye, aawaakhula ariki: “Achu ahiniiceliwa hanamwaavya mulipa a murece, nyenya yaale aniiceliwa tanamwaavya.
13 Mwawiihiiha, haweni mwahuserye yootaphulela ya masu ala: ‘Kinachuna ikharari, ohiya mukucho.’ Nkirweenle owiichana achu awookololowa, nyenya alipa oocheka.”
14 Voocharela, oohuserya a Yohani yaamwaacamela Yesu, emukoha: “Ntakhara heeni hiyaano vamoha ni Afarisi ninniinanela olya, nyenya oohuserya anyu haniinanela?”
15 Yesu aaloca wa yaawo: “Apwanne asinthamwene a mulipa oothela anninla aniiha mulipa oothela ari ni yaawo? Nyenya anamphiya mahiku yaawo mulipa oothela oneereiye aviihiwevo, vaavaanto anamwiinanelaka olya.
16 Haavo onaxonela* epetaasu ya ekuwo evyaani va yoowara yakhalai, woona wi evyaani enahaala ocucha yoowara yakhalai nave waahuwa waya onahaala okhala otokotoko.
17 Achu hanahela eviinyu evyaani mmirupa sa ixapala* sakhalai. Yeerano hiiha, mirupa sinahaala ophuleya nave eviinyu enahaala oyeeheya, nave mirupa sene inammala muteko. Nto achu anahela eviinyu evyaani mmirupa mivyaani, nave soopiili sinnakhapeleleya.”
18 Arikimuloca ichu seiha, aaphiya mutokweene mmoha a onipuro na malapelo,* amwaacamela Yesu nave amukokhorela* ariki: “Elukuluku yeela, kinoona wi mwanaka amwaamuthiyana ookhwa, kinnoovekaani wi murwe mmukuherye ntata nanyu wi akookele okhala mukumi.”
19 Mwawiihiiha, Yesu aavinya vamoha ni oohuserya awe, enamuchara.
20 Nave onani, muthiyana aamalinhe iyaakha khumi napiili ahooxeyaka ni ereca ya okhuma nikhami,* aamwaacamela Yesu oculi wawe, nave atannya niveru na yoowara awe,
21 woona wi aanuupuwela mmurimani mwawe, ariki: “Pahiru wakhala wi kootannya yoowara awe, kinahaala openuwa.”
22 Yesu aarukunuwa, nave aamoonneiye aalocano: “Olipe murima, mwanaka! Nroromelo naa nohoopenuxa.” Ovinyerya elukuluku yeele, muthiyana aapenuwa.
23 Vaavaa aaphiyaleiye vaate va mutokweene a onipuro na malapelo,* awoona alipa oowiipa anamviiro ni muloko wa achu winlaka,
24 Yesu aaloca: “Mvinyevo vaava, ntakhara nahano hakhwile nyenya onamurupa.” Mwa yeeyo, achu yaapacerya omutheya mwa munyemu.
25 Yaakhumenlaaya vaate, Yesu aavolowa mpa nave aphara ntata na nahano, nave nahano aavinya.
26 Michaka vooloca sa yeela, saamwaramwaxeya muceche woothene.
27 Yesu acimulaka vaavale, alopwana apiili eevaasi yaanamuchara ekhuwelaka eriki: “Onimorele ikharari, Mwaana a Tavite.”
28 Aaphiyaleiye vaate vakina, alipa eevaasi yaamwaacamela yoowo, nave Yesu aahaakoha ariki: “Munnaroromela wi kinanwerya woopenuxaani?” Awo yaamwaakhula: “Aa, Pwiya.”
29 Mwawiihiiha, owo aatannya miitho aya ariki: “Yeereye mwawiiwanana ni nroromelo nanyu.”
30 Hiihaa, miitho aya yaapacerya woona. Nave owo aahaalopola ariki: “Muhimuleele muchu mukina sa yeela.”
31 Nto, yaavinnyaaya vaavale, yaanalokoha sa yeela mmakupa oothene a muceche yoole.
32 Alopwana ale erowaka, aakerihiwa wa Yesu mulopwana oohiloca aarino nsololo;
33 Yesu amanle wiikara nsololo, mulopwana ole aapacerya oloca. Muloko wa achu waatepa otikhina oriki: “Hetonko wooniwa echu ntoko yeela o Isarayeli.”
34 Nto Afarisi yaahi: “Owo oniikara masololo nnikhaviheryo na mutokweene a masololo.”
35 Nave Yesu aapacerya weeceeca mmicecheni ni mu ipooma soothene, aahusihaka achu mmapuro aya a malapelo,* alaleeryaka michaka saphaama sa Omwene ni apenuxaka ireca soothene vamoha ni masooso a mukhalelo woothene.
36 Oonneiye muloko wa achu, aamoriwano ikharari, woona wi yaari oohasuwa nthowa na ohipwachiwa ntoko ipucepuche ihirino mukukhula.
37 Voocharela, Yesu aaloca ni oohuserya awe ariki: “Muteko wa ohaca wootepa waaca, nyenya anamuteko ene ari avakhaani.
38 Mwawiihiiha, mumveke Mwaneene a ohaca wi aarumihe anamuteko mmuteko awe wa ohaca.”
Inoota
^ Naari: “mucici.”
^ Naari: “ahaamenle meesa.”
^ Naari: “ohaamela meesa.”
^ Moone masu a vathi mu Mateyu 3:7.
^ Naari: “anapareya.”
^ Naari: “nnyapara nawuuma.”
^ Mu Ekriki, “sinakooka.”
^ Naari: “amucicimiha.”
^ Naari: “okonamo; okhala vamweerini.”
^ Mu Ekriki, “sinakooka.”
^ Mu Ekriki, “mmasinakooka mwaya.”
