Wupulula 21:1-27
21 Kaahoona erimu evyaani ni elapo yavathi evyaani, ntakhara erimu yakhalai ni elapo yavathi yakhalai saavira, nave ephareya hekhanle.
2 Kaahoona tho epooma yaweela, Yerusalemu muvyaani, akhuruwaka wirimu orweela wa Muluku nave aahiirehererya ntoko mwali iireerinhe ntakhara aiyawe.
3 Mwa yeela kaahiiwa nsu noovuwa orweela omunyukhuni nriki: “Nkoonani! Muxakala wa Muluku ori ni achu; owo oni anakhala ni yaawo, nave awo eni ekhale achu awe. Muluku mwaneene ani akhaleke ni yaawo.
4 Owo onahaala ovuta miithori oothene mmiithoni mwaya, nave horwa okhalavo tho okhwa, naari hokhalavo tho othanana, naari wunla, naari sawiicela. Ichu sakhalai soovira.”
5 Nave Yoole aakiranthe vamunyukhuni aahi: “Nkoona! Kinnapaka ichu soothene ivyaani.” Owo tho aahi: “Orepe, ntakhara masu yaala toororomeleya ni eeparipari.”
6 Owo tho aakileela: “Ala aheereya! Miyaano ka Alfa ni Omeka,* oopacerya ni ookuchula. Wa yoole oni akhaleno nthanana kinammuvaha mahaleene* maahi a ehime ya maahi a okumi.
7 Yoole oni avoothe onahaala waakhela ichu seiha; miyo kinahaala okhala Muluku awe nave owo onahaala okhala mwanaka.
8 Nyenya awoova, oohikhalano nroromelo, oothanyeya mu saweera saya, anamaahita, acapaheya,* awiisaaciherya,* oolapa soophwaniherya, ni anawoothe oothene anamukhalano makupa aya mu nchiya nnasuka ni mooro ni enxofre. Ela enataphulela okhwa wanaawiili.”
9 Aarwa mmoha a ankeelo athanu napiili yaarino itixela thanu napiili isaren’yemo ipahu sookuchula thanu napiili nave akileela ariki: “Orwe, kinanwooniha mwali, mwaara a Mwaasaana Eepucepuche.”
10 Mwawiihiiha, owo aakikuxa mu owerya wa munepa aakikeriha va mwaako mutokweene ni woorekama, nave aakooniha epooma yaweela ya Yerusalemu ekhuruwaka wirimu orweela wa Muluku
11 nave erino ncicimiho na Muluku. Waarya waya waalikana ni nluku nasisapoxa, ntoko nluku na xaaspe nawaarya ntoko kristaale.
12 Yaakhalano exiri* etokweene ni yoorekama nave yaakhalano milako khumi namiili, ni ankeelo khumi napiili yeemenle mmilakoni, nave mmilakoni waarempwamo masina a mahimo khumi napiili a anamwane a Isarayeli.
13 Onakhumawo nsuwa saakhalawo milako miraru, onayawo echeku saakhalawo milako miraru, onakhumawo echeku saakhalawo milako miraru nave onaneelawo nsuwa saakhalawo milako miraru.
14 Exiri ya epooma yaakhalano tho maluku khumi nameeli a mathipelo, nave mmalukuni waarempwamo masina khumi napiili a arummwa khumi napiili a Mwaasaana Eepucepuche.
15 Yoole aaloca ni miyaano aapharela ekopo yoophimano ya ooru wi aphimeno epooma, milako saya vamoha ni ixiri saya.
16 Nave epooma eyo yaamphwanaphwana, orekama waya ni oruku aya waamphwanaphwana. Owo aaphima epooma ni ekopo: Mastatiya macikhwi khumi nameeli;* orekama waya oruku aya ni weemela waya waamphwanaphwana.
17 Owo aaphima tho exiri aya: Miwono* nsana nimoha ni makhumi maxexe ni mixexe, mwawiiwanana ni ophima wa muchu, mu elukuluku emohamoha ori ophima wa munkeelo.
18 Exiri yaapakiwe ni xaaspe, nave muceche waari wa ooru ntoko eviitru ya kristaale.
19 Mathipelo a exiri ya muceche yaapakiwe ni maluku ookhweleya a mukhalelo woothene: Mathipelo oopacerya yaari a xaaspe; anaawiili a safira; aneeraru a kalsetooniya; aneexexe a esmeralta;
20 aneethanu a sortooniku; aneethanu nammoha a saartiyu; aneethanu napiili a krisoolitu; aneethanu nararu a perilu; aneethanu naxexe a topaasiyu; aneekhumi a krisoprasu; aneekhumi nammoha a xasintu; aneekhumi napiili a metista.
21 Nave tho, milako khumi namiili, saari sa maluku asisapo khumi nameeli; mulako ti mulako waapakiwe ni nluku nimoha nasisapo. Nave mphiro wa epooma waari wa ooru aphaama ntoko eviitru yawooneela.
22 Nkonnemo empa ya Muluku, ntakhara Yehova Muluku, Aikuru Soothene, ti empa ya Muluku ya epooma, nave tho ya Mwaasaana Eepucepuche.
23 Epooma eyo honachuneya nsuwa naari mweeri wi waaryelekemo, woona wi ncicimiho na Muluku ninnamwaleelamo nave muthiko aya ti Mwaasaana Eepucepuche.
24 Maloko anahaala weeca moorweela wa omwaleela waya, nave mamwene a veelaponi yavathi anamuruuhelamo ncicimiho naya.
25 Milako hirwa iwaliwa tho othana, woona wi ohiyu horwa okhalawo.
26 Nave awo anamuruuhelamo ncicimiho ni ovuwa wa maloko.
27 Nto mummo horwa ovolowamo echu yooriipiheya naari mano yoole oneera echu yoothanyeya naari yoohuweliha, pahiru yaale arempwale mu eroolu ya okumi ya Mwaasaana Eepucepuche teni evolowemo.
Inoota
^ Ela tiwi, oopacerya ni ookuchula. Naari: “A ni Z ya alfapetu Eekriki.”
^ Naari: “ahilivenle.”
^ Moone Masu Atharihiwe, “Ocapaheya.”
^ Naari: “okhwiri; onamulosiwe.”
^ Naari: “ekintaale.”
^ Echu ya ikiloometro 2.220. Estatiya emoha ti ya ameetro 185.
^ Mu Ekriki, “ikoovatu.” Echu ya ameetro 64.
