Ika espíritu santo, Pablo okijkuilo ika tokniuan siuamej kemantika noneki nokuatlapachoskej ijkuak kitekichiuiliskej Jehová. ¿Kemanon noneki ijkon kichiuaskej, niman tleka? Matikitakan tlenon okijto Pablo ipan 1 Corintios 11:3-16 tlen techpaleuis tikitaskej kenon noneki noueyichiuas toTajtsin. Pablo kijtoua yeyi tlemach tlen noneki tikilnamikiskej: 1) itech tlenon tekitl noneki manokuatlapachokan; 2) kemanon niman kanon kichiuaj yejon tekitl, niman 3) tleka noneki ijkon manochiua.

Itech tlenon tekitl. Pablo tlajtoua itech ome: kichiuas teoyotl niman kiteijlis teotlajtojli (tlaxelojli pitentsin 4, 5). Ken tikmatij, ijkuak tikchiuaj teoyotl, ijkon noijki tikueyichiuaj Jehová; niman tikteijlis teotlajtojli kijtosneki ijkuak tlakamej niman siuamej akin kichiuaj ken Cristo temachtiaj itech Biblia. Kuakon, ¿okijtosnek Pablo ika tokniuan siuamej noneki nochipa nokuatlapachoskej ijkuak kichiuaj teoyotl noso temachtiaj itech Biblia? Ka. Xnochipa, san kipiya kanon. Ika yejon matikitakan kemanon niman kanon noneki kichiuaskej.

Kemanon niman kanon. Pablo kiteneua ojkan: itech ichanejkauan niman ipan tlanechikojli. Yejua okijkuilo yejuin: “Tlakatl yejua tlayekanki itechika isiuau. [...] Pero tla se siuatl xnokuatlapachoua ijkuak kichiua oración noso ijkuak kiteijlia on tiotlajtojli [...] xkitlakaita iueuentsin [kipinaujtia itsontekon, TNM]” (tlaxelojli pitentsin 3, 5). Itech ichanejkauan, Jehová yokitlali matlayekana iueuentsin. Ika yejon, ¿tlenon panoua tla yejua kichiua tekitl tlen Jehová yokimakak iueuentsin makichiua? Tla xkiteititia ika kitlakaita tlanauatijkayotl tlen kipiya iueuentsin, kipinaujtis. Matikitakan kanon uelis panos. Se tokniuj siuatl yauj iuan iueuentsin konmachtis se akin kimachtia itech Biblia. Pampa kitlakaita tlanauatijkayotl tlen kipiya iueuentsin, noneki nokuatlapachos. Niman noijki ijkon noneki makichiua tla iueuentsin xnoapolaktia noso kema, pampa yejua tlayekana itech ichanejkauan. * ¿Niman tla se tokniuj siuatl kipiya ika kichiuas  teoyotl noso temachtis ixpan ikoneuj akin yonoapolakti? Maski ikoneuj xyejua tlayekana itech ichanejkauan, inan noijki noneki nokuatlapachos. ¿Tleka? Pampa kiteititia ika kitlakaita tekitl tlen yokiselijkej ipan tlanechikojli tokniuan tlakamej akin yonoapolaktijkej.

Pablo tlajtoua aman itech oksekan, ipan tlanechikojli, ijkuak okijkuilo: “Pero tla yakaj kixnamikisneki on tlen nikijtoua, ma kimati ika nion tejuamej yejuan tiapóstoles, nion on tlaneltokakej [tlanechikoltin, TNM] xtikpiaj okse costumbre” (tlaxelojli pitentsin 16). Ipan tlanechikojli, Jehová yokintlali matlayekanakan tlakamej akin yonoapolaktijkej (1 Timoteo 2:11-14; Hebreos 13:17). Ijkon, san kintlalia tlakamej ken tlayekankej niman tlapaleuijkej makitlajpiyakan tlanechikojli (Hechos 20:28). San ika, kemantika noneki se tokniuj siuatl makichiua seki tekitl tlen kichiuaskia se tokniuj tlakatl akin yonoapolakti niman ueltika kichiua. Se neskayotl, kanaj nonekis kiyekanas tlanechikojli ijkuak kisaj tenojnotsaj pampa xnemi nion se tokniuj tlakatl akin uelis kichiuas. Yejuin tlanechikojli noijki ijkon ken tlanechikoltin kampa tomachtiaj. Ika yejon noneki kiyekanas se tokniuj tlakatl. Niman noijki ijkon panoua ijkuak se tokniuj siuatl kipiya ika ontemachtis itech Biblia iuan se tokniuj tlakatl akin yonoapolakti. * Yejua noneki nokuatlapachos niman ijkon kiteititis ika kitlakaita tekitl tlen kichiuaskia se tokniuj tlakatl.

San ika, tokniuj siuatl xnochipa kipiya ika nokuatlapachos ijkuak kiueyichiuas toTajtsin. Se neskayotl, ijkuak tlanankilia ipan tlanechikojli, ijkuak tenojnotsa techajchan (maski yauj iuan iueuentsin noso okse tokniuj tlakatl akin yonoapolakti) niman ijkuak kichiua teoyotl noso nomachtia iuan ikoneuan akin xnoapolaktiaj. Aman, tla yejua ometlamati itech okseki tekitl niman xkimati tlenon kichiuas, uelis kitejtemos okseki ipan Biblia niman amatlajkuiloltin. * Niman tla maski yokitejtemo, itlamachilis kijlia manokuatlapacho, uelis kichiuas ken nesi ipan tlaixkopinajli.

 Tleka. Ipan tlaxelojli pitentsin 10 tiknextiaj ome ipampa tlen kipaleuis tokniuj siuatl makichiua yejuin tlen notlajtlani: “San impampa on iluikakteitkej, on siuatl noneki nokuatlapachos para kiteititis ika kinokauilia ma kiyekana[kan]”. Kachtopa, ipampa yejuin tlajtoltin “kiteititis ika kinokauilia ma kiyekana[kan]”. Kema, tlakentli tlen ika nokuatlapachoua kiteititia ika kitlakaita tlanauatijkayotl tlen Jehová kinmaka tlakamej akin yonoapolaktijkej ipan tlanechikojli. Kuakon, ijkon kiteititia tlasojtlalistli itech toTajtsin niman yolmelaujkanemi itech. ¿Katlejua ika ome? Ijkon ken kijtoua tlaxelojli pitentsin, “impampa on iluikaktekitkej”. San ika ¿kenon uelis kinpaleuis yejuin iluikaktekitkej ijkuak se tokniuj siuatl nokuatlapachoua?

Iluikaktekitkej kimitstokej nochimej akin nemij ipan ikalpan Jehová ipan iluikak niman ipan tlaltikpaktli. Yejuamej kuajli kitstokej kenon kiteititiaj tlakaitalistli itech itlanauatijkayo toTajtsin. Niman kinpaleuiya ijkuak kitaj kenon tlaltikpakchanejkej tlajtlakolejkej tetlakamatij. Kema, yejon iluikaktekitkej noijki noneki kiteititiskej ika kitlakamatij itlanauatil toTajtsin, tlen sekimej xokichiujkej yeuejkaui (Judas 6). Ipan yejuin tonaltin, melak kinmachtia iluikaktekitkej ijkuak kitaj se tokniuj siuatl akin melak kimati miyek noso melak tlamachilise xijkon ken se tokniuj tlakatl akin yonoapolakti, ika iyojlo kitlakaita tlanauatijkayotl tlen yokiseli. Niman yejuin tlen kitaj ok melak kimojkaitaj tla ijkon kichiua se tokniuj siuatl akin tlapejpenijli. ¿Tleka? Pampa ika tlayekapan yejuin tokniuj teuan nopouas itech akin tlanauatiskej iuan Cristo ipan iluikak, se tekitl melak ueyi xijkon ken tekitl tlen kipiyaj iluikaktekitkej. Ken tikitaj, tokniuan siuamej kipiyaj se kualtsin tlateochiualistli, pampa ika inyolmelaujkanemilis niman ika tetlakamatij imixpan melak miyekej iluikaktekitkej, temachtiaj yolyemanilistli niman kiteititiaj ika tetlakamatij.