Timoteo se telpochtli katka akin melak kiyolpaktiaya kinpaleuis tlaltikpakchanejkej. Yejua oyaj miyekan okinpaleuito oksekimej. Ika yejon, onen ika yolpakilistli. ¿Tikuelitaskia tikmatis okseki itech yejuin telpochtli?...

Timoteo onoskalti ipan se ueyikalpan itoka Listra. Ijkuak pitentsin katka, iabuela Loida niman inanaj Eunice, opeujkej kimachtiaj itech Jehová. Ika yejon, maski yejua pitentsin katka, kinekiya kinpaleuis oksekimej makixmatikan Jehová.

Ijkuak Timoteo ok telpochtli katka, Pablo okijli tla kinekiya iuan yas ontlajtolmoyauas ipan oksekimej kalpamej. Timoteo okinankili Pablo: “¡Kema, mouan nias!”. Yejua ika iyojlo kinekiya yas ontlapaleuis.

 Timoteo oyaj iuan Pablo ipan ueyikalpan Tesalónica tlen nokaua Macedonia. Melak uejka onejnenkej niman sakin otlejkokej ipan se barco, niman ijkon oajsikej Tesalónica. Ijkuak oajsikej ompa, melak miyekej okinpaleuijkej makixmatikan Jehová. San ika, sekimej tlaltikpakchanejkej melak okualankej niman kinekiyaj kinchiuiliskiaj tlen xkuajli. Kuakon, Pablo niman Timoteo okiskej ipan yejon kalpan niman oksekan otlajtolmoyauatoj.

Ijkuak yopanoka seki metstin, Pablo okijli Timoteo manokuepa Tesalónica niman makinmitati kenon nemij tokniuan. ¡Nonekiya kipiyas ueyi yolchikaualistli tla oksejpa nokuepaskia ipan yejon xkuajli ueyikalpan! San ika, Timoteo oyaj pampa najmanaya inpampa tokniuan akin ompa chantiyaj. Sakin, ijkuak onokuep itech Pablo, okijli nochi tlen kuajli ipan onochiuj. ¡Tokniuan akin chantij Tesalónica opeujkej kichiuaj tlen kuelita Jehová!

Timoteo miyek xiuitl otekit iuan Pablo. Se tonajli, Pablo okijkuilo ika xnemiya okse ken Timoteo akin ueliskia kontitlanis matlapaleuiti ipan tlanechikoltin. Timoteo okitlasojtlak Jehová niman noijki tlaltikpakchanejkej.

¿Tikintlasojtla tlaltikpakchanejkej niman tikneki tikinpaleuis makixmatikan Jehová?... ¡Tla tikintlasojtla, uelis tinemis ika yolpakilistli ijkon ken Timoteo!