Maski Biblia xtlajtoua itech kenon noneki topajtiskej, tlen ompa noijtoua uelis kinpaleuis akin melak xkuajli nomachiliaj. Matikimitakan seki textos.

“Para on yejuan xkualoj xnoneki sen tepajtijketl, pero para on yejuan kualoj kemaj” (MATEO 9:12).

Biblia kijtoua ika kemantika kema nonekis tiaskej kampa tlapajtijketl. Miyekej akin melak xkuajli nomachiliaj yokitejtemojkej tleka ijkon nomachiliaj niman yoyajkej kampa tlapajtijketl akin kimatstok de yejon kokolistli, niman yejon yokinpaleui.

“Tla tikchiua ejercicio, [...] mitspaleuiya ipan motlalnakayo” (1 TIMOTEO 4:8).

Tla tokojtiliaj tikchiuaskej ejercicio, kuajli titlakuaskej niman kuajli tikochiskej, techpaleuis maka melak matikualokan niman más kuajli matomachilikan.

“On pakilistli yejuan onkaj ipan iyojlo sen tlakatl, yejua nochiua ken sen kuajli pajtli yejuan tepajtia, pero tla ipan iyojlo yej onkaj ajmantli xitlaj kuajli nochiuas” (PROVERBIOS 17:22).

Tla tikinamapouaj textos ipan Biblia tlen techyolchikauaj niman tokojtiliaj tikchiuaskej tlen ueli tikchiuaj,  uelis techpaleuis más matiyolpakikan. Tla titlanemiliaj itech nochi tlen kualtsin topan nochiua niman tikneltokaj ika ajsis tonajli ijkuak melak kualtsin tinemiskej, techpaleuis kuajli matomachilikan niman maka melak matajmanakan.

“Yejuan noknelia [noso yolyemanki] kipiya tlamatkilistli” (PROVERBIOS 11:2).

Kanaj kemantika nonekis ika oksekimej mamitspaleuikan ika itlaj tlen noneki tikchiuas. Kanaj moamigos niman akin ken tikimita kinekij mitspaleuiskej, san ika, kanaj xkimatij kenon kichiuaskej. Xmokauili mamitspaleuikan niman xkimijli kenon tikneki mamitspaleuikan, san ika, noijki xkimasikamati niman xkintlasojkamachili nochi tlen kichiuaj mopampa.

“Oniaj kampa tlapajtijketl pampa opeuj xkuajli ninomachilia. Yejua onechtomili tlenon nopan nochiujtoya niman yejon onechpaleui manikasikamati ika nikualo. Noijki onechijli kenon ueliskia ninopajtis” (Nicole, a akin kipiya trastorno bipolar).

“Melak nechpaleuiya mojmostla nikamapouas noBiblia iuan nosiuatsin. Yejon kichiua mojmostla manitlanemili itech itlaj tlen kualtsin. Niman yonikitak ika ijkuak sanoyej xkuajli ninomachilia nochipa niknextia se texto tlen melak nechyolchikaua” (Peter, akin kipiya depresión).

“Nipinauiya nikimijlis oksekimej tlen nopan panotoya. San ika, se noamiga melak nechasikamatiya niman melak nechtlasojtlaya, yejon onechpaleui más kuajli maninomachili niman manikita ika xsan noselti ninemi” (Ji-yoo, akin kipiya trastorno alimentario).

“Biblia yonechpaleui manikasikamati ika noneki ninoseuis niman xnochipa san nitekititos. Tlen ompa noijtoua melak yonechpaleui más kuajli maninomachili” (Timothy, akin kipiya trastorno obsesivo compulsivo).