YEUEJKAUI, ijkuak se tlakatl niman se siuatl kinekiyaj nonamiktiskej, on tlakatl nonekiya kontlaxtlauas inovia. On novio ueliskia tlatlaxtlauas ika itlaj tlen patioj, ika yolkamej, tomin noso noijki ueliskia tekitis ipampa inovia. Ijkon ken okichiuj Jacob ijkuak nonamiktiskia iuan Raquel. Yejua okijli imonta ika tekitiskia ipampa Raquel chikome xiuitl (Gén. 29:17, 18, 20). ¿Tleka se israelita kitlaxtlauaya inovia?

Se ixtlamatki itech Biblia, akin itoka Carol Meyers, kijtoua: “Pampa on novia xok kipaleuiskia ifamilia, tlen kitlaxtlauaskia on tlakatl kipaleuiskia ifamilia inovia. Yejuin melak kinpaleuiaya familias akin san tokayaj”. Ijkuak on tlakatl tlatlaxtlauaya, kinpaleuiaya on ome familias más kuajli manouikakan. Niman ijkuak kixnamikiyaj tlen ouijtika, on ome familias san sekan nopaleuiayaj. Noijki, kiteititiaya ika on siuatl inonamiktiskia, ika itaj xok kitlajpiyaskia niman aman iueuentsin kitlajpiyaskia.

Ijkuak kitlaxtlauayaj novia, xkijtosnekiya tla kinkouayaj noso kinnemakayaj siuamej. Amoxtli Instituciones del Antiguo Testamento, kijtoua: “Ijkuak tikitaj ika se israelita kitlatlaxtlauiliaya ifamilia inovia, nesiskia kentla kikoujtoskia on siuatl. San ika, xyejon kijtosneki, ijkuak tlatlaxtlauaya, kichiuaya para kinyolseuis niman kinpaleuis ifamilia inovia”. *

Ipan yejuin tonaltin, ipan seki países, tlakamej ok kintlaxtlauaj innovias. Tla tokniuan xueyi kitlajtlanij ipampa imichpoch, oksekimej kitaskej ika yejuamej teasikamatij (Filip. 4:5; 1 Cor. 10:32, 33). Ijkon kiteititiskej ika yejuamej xsan notomintisnekij (2 Tim. 3:2). Noijki, tla xueyi kitlajtlanij nimantsin nonamiktiskej pampa on novio xuejkauis tekipanojtos para tlatlaxtlauas. Niman tla precursor, xnonekis kikauas itekiyo san para tekitis niman ijkon uelis tlatlaxtlauas.

Ipan seki países tekiuajkej kijtouaj kech noneki tlatlaxtlauas se novio. Ompa, tokniuan kintlakamatij yejon tlanauatiltin. Ijkon kichiuaj pampa kimatij ika toTajtsin kineki makintlakamatikan tekiuajkej akin kinyekanaj. Tokniuan kintlakamatij ijkuak kinnauatiaj makichiuakan itlaj tlen toTajtsin xkitlauelita (Rom. 13:1; Hech. 5:29).