¿KEMANTIKA yotikixnamijka se tlauejli niman otikmachili ika xakaj omitspaleui? Aman tinemij ipan tonaltin kampa panoua tlen melak xkuajli, niman yejon uelis kichiuas san toselti matomachilikan niman matajmanakan, san ika, xsan tejuamej noneki tikixnamikiskej yejon tlaueltin (2 Tim. 3:1). Biblia kijtoua ika akin kuajli imiuan touikaj uelis techpaleuiskej ijkuak onka ajmantli (Prov. 17:17).

Apóstol Pablo okinpix itlasojkaikniuan akin okuikakej ijkuak okintlajpaloto tlanechikoltin niman melak okipaleuijkej (Col. 4:​7-11). Ijkuak yejua tsauktoya Roma, itlasojkaikniuan okichiujkej tlen yejua xueliya kichiuaya. Sejpa, Epafrodito okitkili tlen tokniuan de Filipos okititlanilijkej (Filip. 4:18). Tíquico okimitkili tlanechikoltin cartas tlen Pablo okimijkuilouilijka (Col. 4:7). a Pablo ouel okinyolchikauj tokniuan ijkuak tsauktoya ichan niman ijkuak oksekan okitsakuatoj pampa akin kuajli imiuan nouikaya okipaleuijkej. ¿Niman tejuamej? ¿Kenijki uelis tikinpaleuiskej akin kuajli imiuan touikaj?

Aman miyekej tokniuan kiteititiaj ika melak tlasojtij akin melauak tetlasojkaikniuan. Matikitakan tlen ipan opanok Elísabet, se precursora regular akin chanti España. Ijkuak inan okinextilijkej cáncer tlen xkipiya pajtli, se tokniuj okititi ika yemelak itlasojkaikniuj katka pampa komontitlaniliaya textos itech Biblia ipan mensajes. Elísabet kijtoua: “Yejon mensajes okichiuj maka san noselti maninomachili niman mojmostla melak nechyolchikauayaj” (Prov. 18:24).

Uelis más kuajli touikaskej imiuan tokniuan tla tikinpaleuiyaj ipan tlanechikoltin noso tla imiuan titenojnotsaj. Ueliskia tikijliskej se tokniuj akin yeueyi ika uelis tikuikaskej tlanechikoltin noso iuan titenojnotsaskej. Ijkuak ijkon tikchiuaj, imiuan toyolchikauaj (Rom. 1:12). San ika, sekimej tokniuan xuelij kisaj. ¿Kenijki uelis tikimititiskej ika melauak totlasojkaikniuan?

Miyekej tokniuan xueli yauej tlanechikoltin pampa kipiyaj se kokolistli noso itlaj okse kixnamikij. Ijkon ipan opanok David, akin okijlijkej ika kipiya cáncer niman chikuasen metstin okiseli quimioterapia. Ipan yejon metstin, yejua niman isiuauj, Lidia, san kinkakiyaj tlanechikoltin ipan videoconferencia.

¿Kenijki okinpaleuijkej tokniuan akin nemiyaj ipan intlanechikol? Ijkuak tlamiyaj tlanechikoltin, sekimej tokniuan akin ompa nemiyaj kixelouayaj tiempo niman ijkon imiuan tlajtouayaj ipan videoconferencia. Noijki, ijkuak David niman Lidia tlanankiliayaj,  tokniuan kintitlaniliayaj mensajes para kinyolchikauaskej. ¿Niman tlenon opanok? David niman Lidia melak kuajli onomachilijkej pampa akin imiuan nouikayaj okimititijkej ika melak kintlasojtlayaj.

¿Tleka xtitenojnotsaj imiuan tokniuan akin xuelij kisaj? Tla ijkon tikchiuaj, tikimititiskej ika xtikimilkauaj (Prov. 3:27). Ueliskia imiuan titenojnotsaskej ika carta noso ipan teléfono. Noijki, tlayekankej uelis kitaskej tla uelis kikakiskej ipan videoconferencia tlanechikojli tlen nochiua ijkuak titenojnotsaj. David niman Lidia melak kitlasojkamatij pampa tlayekankej ouel ijkon okichiujkej. David kijtoua: “Maski san tikakiyaj tlen noijtouaya ipan tlanechikojli tlen nochiua ijkuak titenojnotsaj niman teoyotl, melak tiyolchikauiyaj”. Niman tla yakaj tikmachtiaj itech Biblia, ueliskia tikijliskej mauiya ichan tokniuj niman ijkon ompa tikmachtiskej. San ika, kachtopa noneki tiktlajtoltiskej tokniuj tla xtlaj tlenon tla ijkon tikchiuaj.

Ijkuak tinemij imiuan tokniuan akin xuelij kisaj, tikimitaj inkualneskayouan niman peua más imiuan touikaj. Ijkuak tikinkakij kenijki kimachtiaj yakaj itech iTlajtol toTajtsin niman kenijki kipaleuiyaj más manonisiui itech Jehová, más tikintlakaitaj. Tla ijkin tikinpaleuiyaj tokniuan, uelis más tikinpiyaskej totlasojkaikniuan (2 Cor. 6:13).

Pablo melak oyolseuj pampa nochipa iuan onen Tito, akin iuan nouikaya (2 Cor. 7:​5-7). Yejuin techmachtia ika xsan noneki tikinyolchikauaskej tokniuan ika totlajtoluan, noijki uelis imiuan tinemiskej niman ijkon tikinpaleuiskej (1 Juan 3:18).

Tokniuan akin chantij Rusia kuajli techititiaj kenijki noneki topaleuiskej. Matikitakan tlenon ipan opanok tokniuj Serguéi iuan isiuauj Tatiana. Sejpatipan, policías okalakkej inchan niman ijkon tlatejtemoskej niman sakin okinuikakej niman ijkon kintlatlatoltiskej. Kachtopa okimakaujkej Tatiana, niman oyaj ichan. Serguéi techijlia tlenon opanok sakin ika isiuauj onokuep inchan: “Se tokniuj siuatl akin melak yolchikauak okitato. Sakin, miyekej tokniuan noijki okitatoj niman okipaleuijkej matlayektlalikan tochan”.

Serguéi noijki kijtoua: “Nochipa onikuelitak tlen kijtoua Proverbios 17:17: ‘Sen tetlajsojkaikniu nochipa tenotski, niman ijkuak onkaj ajmantli nochiua ken sen melauak teikniu’. Aman, más kuajli nikajsikamati yejuin tlajtoltin pampa techtlaueltokatokej; kuajli nikmatstika ika san noselti xueliskia nitlaxikos. Jehová yonechinmakak notlasojkaikniuan akin melak yolchikaujkej niman xkeman nechkauaj”. b

Ipan yejuin tonaltin más ouijtika ken tinemij, ika yejon, noneki tikinpiyaskej totlasojkaikniuan akin matechpaleuikan. Niman ipan ueyi tlajyouilistli más nonekis matechpaleuikan. Ika yejon, desde aman matikchiuakan nochi tlen tiuelij niman ijkon tiyeskej se melauak tetlasojkaikniuj (1 Ped. 4:​7, 8).