Pablo, itlatitlankauj Cristo, kuajli kimatstoya kenon melak teijtlako tlakajkayaualistli tlen nosemoyaua tlen ualeua itech Satanás. San ika, oksekimej akin kichiuayaj ken Cristo ipan tonaltin ijkuak yejua onen xijkon kitayaj. Se neskayotl, ipan Corinto sekimej melak tlaneltokayaj san intech niman kinemiliayaj ika intlaneltokil melak chikauak katka niman xkeman uetsiskiaj (1 Cor. 10:12). Ika yejon, Pablo okimijli: “Pero ninomojtia ika nemotlamachilis mechkajkayauas ken on kouatl okajkayau Eva ikan iistlakayouan, niman xok nenkitlajsojtlaskej Cristo ikan nochi nemoyojlo” (2 Cor. 11:3).

Tlen okijto Pablo techmachtia ika noneki titlatlachixtoskej. Noneki tikneltokaskej ika tlakajkayaualistli tlen nosemoyaua tlen ualeua itech Satanás melak teijtlako niman noneki totlajpiyaskej itech, niman ijkon xkijtlakos totlanemilil.

Tlakajkayaualistli tlen nosemoyaua kichiua ika tlaltikpakchanejkej matlanemilikan niman makichiuakan tlen kimijliaj. Amoxtli itoka Propaganda and Persuasion kijtoua ika tlakajkayaualistli tlen nosemoyaua kipiya xkuajli tlanemilijli, tlen teijtlako niman tlen xmelajki. Tlaltikpakchanejkej kichiuaj yejuin ika tlajtoltin, tlen tlakajkayauaj, tlen kipatlaj ken se tlanemilia niman tlen kinyekanaj intlanemililuan.

¿Tleka melak teijtlako tlakajkayaualistli tlen nosemoyaua? Pampa yejuin ijkon ken  se gas tlen tepajuiya, tlen xuelis tikitas nion xuelis tikijnekuis. Maski xtikmatij, tikijnekuij niman kijtlakoua totlamachilis ika yolik. Vance Packard, se ixtlamatki itech ken toyekanaj, kijtoua ika miyekej kinpatilia ken tlanemiliaj niman nion xkimatij kenon panoua. Okse ixtlamatki kijtoua ika tlakajkayaualistli tlen noijtoua kinchiualtia tlakamej niman siuamej “makichiuakan itlaj tlen melak teijtlako, ken melak manomiktikan, guerras, tlauejli itech raza, maka manotekauili se religión niman miyek okseki tlen xkuajli nochiua” (Easily Led—A History of Propaganda).

Tla san tlaltikpakchanejkej uelis techkajkayauaskej ika tlen nosemoyaua, ¿xuelis nimantsin noijki kichiuas Satanás? Yejua youejkauj kualitstiuj kenon noyekana se tlaltikpakchane. Niman uelis kitekitiltis san tlenon ika tekajkayauas, pampa yejua kiyekana yejuin tlaltikpaktli (1 Juan 5:19; Juan 8:44). Satanás yokintlamachilispolo miyekej tlaltikpakchanejkej. Biblia kijtoua ika “okajkayau nochi tlakatl chanej ipan in tlaltikpaktli” (2 Cor. 4:4; Apoc. 12:9). ¿Kenon uelis totlajpiyaskej itech ken techixnamiki Satanás?

Jesús okijto tlen uelis nochiuas niman ijkon noixnamikis tlakajkayaualistli tlen nosemoyaua: “Nenkixmatiskej tlen melauak, niman on tlen melauak yejua mechmanauis” (Juan 8:31, 32). San ika, pampa tlen melauak yejon tlen miyekpa kachtopa kipopoloua ipan se guerra, ijkon ken se soldado akin tlaixnamiki, tejua noneki tikmatis tlenon melauak niman ijkon xuelis mitskajkayauaskej. Jehová yotechmakak itlaj tlen uelis techpaleuis matikmatikan tlen melauak, iTlajtol Biblia. Ompa uelis tiknextiskej nochi tlen techpaleuis maka techkajkayauas tlen kisemoyaua Satanás (2 Tim. 3:16, 17).

Kema, Satanás, akin kisemoyaua tlakajkayaualistli, kimati yejuin. Ika yejon kitekitiltia tlen onka ipan tlaltikpaktli ika kinteltis maka makipouakan nion manomachtikan Biblia. ¡Maka mamitskajkayaua! (Efes. 6:11). Matochikauakan tikasikamatiskej kuajli tlen melauak (Efes. 3:18). Xtlanemili itech tlen okijto se tlamachtijketl itoka Noam Chomsky: “Xaka kikalaktis tlen melauak ipan totsontekon. Yejuin noneki tejuamej tiknextiskej”. Kuakon, melak noneki moselti xnexti tlen melauak ijkuak kuajli timomachtis Biblia mojmostla (Hech. 17:11).

Maka xkilkaua ika Satanás xkineki kuajli matitlanemilikan nion matikitakan tlenon yemelak. ¿Tleka? Pampa ijkon ken kijtoua se amoxtli, tlakajkayaualistli tlen nosemoyaua melak teijtlakoua  ijkuak tlaltikpakchanejkej nion xnoteltia kinemiliskej (Media and Society in the Twentieth Century). Ika yejon, maka nimantsin xneltoka nochi tlen tijkaki (Prov. 14:15). Noneki xtlanemili niman xtekitilti motlamachilis tlen toTajtsin yomitsmakak niman ijkon kuajli tikmatstos ika tlen tikmati kema melauak (Prov. 2:10-15; Rom. 12:1, 2).

Akin tlaixnamikij ipan guerra noijki kitekitiltiaj tlakajkayaualistli tlen nosemoyaua niman ijkon kinmojtiaj intlauelikniuan. Kanaj uelis kichiuaskej ika akin kimixnamikij sa no yejuamej manoixnamikikan noso manoxelokan. Se tlayekanketl itech soldados, chanej Alemania, okasikamat ika ipampa yejuin, ipaís okitlankej ipan Kachtopa Guerra ipan nochi tlaltikpaktli. Yejua okijto ika tlaltikpakchanejkej “okinkochitij tlakajkayaualistli tlen kisemoyauaj akin teixnamikiyaj, ijkon ken se kouatl kikochitia se tochtli”. Satanás noijki ijkon kichiua pampa kineki matoxelokan itech tokniuan niman techtlanis. Kuakon uelis kichiuas ika maonia tlauejli noso manokualanikan tokniuan. Noijki uelis kichiuas makimachilikan ika kinchiuiliaj tlen xkinamiki niman ijkon makitlalkauikan ikalpan Jehová.

¡Maka xmokauili mamitskajkayauakan! Mamitsyekana itlajtol toTajtsin. Biblia nochipa techijlia matotlapopoluikan niman totoka matoyolseuikan. Tla ijkon tikchiuaj, san sekan tinemiskej (Col. 3:13, 14; Mat. 5:23, 24). Noijki kuajli techijlia ika tiktlalkauiskej tlanechikojli uelis techijtlakos (Prov. 18:1). Ika yejon, xkita tla tikixnamiktika tlakajkayaualistli tlen nosemoyaua niman xmitsijtlajkotika. Uelis timotlajtoltis: “¿Tlenon onikchiuj ijkuak onikixnamik yejon? ¿Onikteititi ika nitlanemilia ken toTajtsin noso ken Satanás?” (Gál. 5:16-26; Efes. 2:2, 3).

Tla se soldado xtlaneltoka itech itlayekankauj, xuelis kuajli tlaixnamikis. Ika yejon, akin teijliaj tlakajkayaualistli tlen nosemoyaua kichiuaj ika soldados makintlalkauikan intlayekankauan. Kanaj uelis kimijliskej itlaj ken yejuin: “Nemotlayekankauan xkinamiki intech xtlaneltokakan” niman “Maka xkinkauili mamechixpolokan”. Kitekitiltiaj nochi itech tlen nopopoloua intlayekankauan soldados ika manesi melauak intlakajkayaualis. Satanás noijki ijkon kichiua. Yejua nochipa kiyejyekoua ika maka ok  matikinneltokakan tokniuan akin Jehová kintekitiltia makiyekanakan ikalpan.

¿Kenon uelis totlajpiyaskej? Xnemili ika maka keman tijkauas ikalpan Jehová niman nochipa xkinpaleui akin yokintlali makiyekanakan, maski yejuamej tlajtlakolejkej (1 Tes. 5:12, 13). Maka xmokauili mamitskajkayauakan akin yokikaujkej kineltokaj toTajtsin noso oksekimej akin kixnamikij ikalpan toTajtsin, maski nesiskia ika melauak tlen kijtouaj (2 Tes. 2:2; Tito 1:10). Xchiua tlajtolpaleuilistli tlen okimakakej Timoteo. Xtlasojtla tlen melauak tlen yotimomachti niman xkilnamiki kanon otikixmat (2 Tim. 3:14, 15). Kuajli nesi ika uelis titlaneltokaskej itech akin Jehová okitlali matechyekana itech tlen melauak akin ikajxiltis 100 xiuitl ika kichiujtok (Mat. 24:45-47; Heb. 13:7, 17).

Xkilnamiki ika Satanás xsan techixnamiki ika tlen xnesi. Kemantika kitekitiltia temojtijli, “se itech ken nosemouaya tlakajkayaualistli tlen melak youejkauj” (Easily Led—A History of Propaganda). Philip Taylor, se tlamachtijketl británico, kijtoua ika asirios okintlankej intlauelikniuan pampa okinmojtijkej niman okitekitiltijkej tlakajkayaualistli. Satanás noijki ijkon, kichiua matikmakasikan tlakatl, ijkuak techtlaueltokaj, mikilistli noso itlaj okse tlen ika kichiua melak matomojtikan niman matijkauakan tiktekichiuiliskej Jehová (Is. 8:12; Jer. 42:11; Heb. 2:15).

Maka xkauili ika Satanás mamitsmojti noso makichiua maka xyolmelaujkanemi. Jesús okijto: “Ma ka xmakajsikan on yejuan uelij kimiktiaj on tlalnakayotl niman kemaj xok uelij itlaj más kichiuaj” (Luc. 12:4). Nochipa xneltoka ika Jehová kichiuas tlen yomitsijli. Yejua mitstlajpiyas ijkuak mitsmakas chikaualistli niman mitspaleuis maka ok xmomojti niman xyolmelaujkanemi itech (2 Cor. 4:7-9; 1 Ped. 3:14).

Kanaj kemantika uelis timomojtis noso tikpolos mokojtilis. San ika, nochipa xkilnamiki tlen Jehová okijli Josué: “Xmoyolchikaua niman xmokojtili. Maka xmojkakui nion maka xmomojti pampa Jehová moTajtsin mouan nemi maski san kanon tias” (Jos. 1:9). Ijkuak xkuajli timomachilis, nimantsin xchiuili teoyotl Jehová niman xkijli nochi tlen mitsajmana. Niman uelis kuajli tikmatstos ika toTajtsin mitsmakas “yolseuilistli [...]. Niman in yolseuilistli kejeuas” moyojlo niman motlamachilis. Ijkon uelis tikmapeuas tlakajkayaualistli tlen nosemoyaua tlen ualeua itech Satanás (Filip. 4:6, 7, 13).

¿Tikilnamiki tlakajkayaualistli tlen okijli ikalpan toTajtsin yejon rabsaqué, akin okontitlan tekiuaj itech Asiria? Okijto itlaj ken yejuin: “Xtlaj uelis mechmakixtis itech Asiria. Nion nemoTajtsin Jehová, xtlaj uelis kichiuas nemopampa”. Niman hasta okijto: “Jehová yejua akin otechijli manikpopoloki yejuin tlajli”. San ika, Jehová okiyolchikauj tekiuaj itech Judá ika yejuin tlajtoltin: “Maka xmomojti ipampa tlajtoltin tlen otijkak, tlajtoltin tlen ika xkuajli otlajtokej notechkopa itlapaleuijkauan tekiuaj Asiria” (2 Rey. 18:22-25; 19:6). Sakin okuajtitlan se iluikaktekitketl akin okinmikti 185,000 asirios san ipan se yeuajli (2 Rey. 19:35).

¿Kanaj yotikitaka se película kampa yakaj nion xkita kenon kikajkayaujtokej? ¿Kanaj hasta otiknek tikijlis: “Maka xneltoka yejon. San mitskajkayaujtokej”? Aman xkonemili kenon iluikaktekitkej techualitstokej niman techijliaj: “Maka xmokauili mamitskajkayaua Satanás”.

Maka xneltoka tlakajkayaualistli tlen nosemoyaua tlen ualeua itech Satanás (Prov. 26:24, 25). Xkaki Jehová niman nochipa itech xtlaneltoka (Prov. 3:5-7). Xchiua yejuin tlen mitstlajtlanilia ika tlasojtlalistli: “Xmochiua titlamachilise, nokoneuj, niman xnechyolpakti” (Prov. 27:11). Tla ijkon tikchiua, tiktlajpiyas motlanemilil niman titetlanis.