1. ¿Tleka Jehová uelis kijtos ika nochi tlen onka yejua iyaxka? (Xkita tlaixkopinajli kampa peua tlen tomachtijtokej).

NOCHI iyaxka Jehová: “Iyaxka iluikamej, hasta iluikamej tlen melak uejueyimej, niman tlaltikpaktli iuan nochi tlen ipan onka” (Deut. 10:14; Apoc. 4:11). Niman pampa yejua okinchijchiuj tlaltikpakchanejkej, tejuamej noijki tiiyaxkauan (Sal. 100:3). Maski ijkon, itech nochimej tlaltikpakchanejkej akin yonenkej, toTajtsin yokintlapejpeni seki grupos niman ijkon manochiuakan iyaxkauan.

2. ¿Tlen grupos kijtoua Biblia ika iyaxkauan Jehová niman ika melak tlasojtij?

² Se neskayotl, ipan Salmo 135 noijtoua ika itekipanojkauan toTajtsin akin yolmelaujkej katkaj niman yeuejkaui onenkej ipan kalpan israel, iyaxkauan katkaj niman melak tlasojtiyaj (Sal. 135:4). Noijki, amoxtli Oseas okijto ika sekimej akin xisraelitas yeskiaj noijki nemiskiaj iuan ikalpan Jehová (Os. 2:23). Yejuin teotlajtojli onochiuj ijkuak toTajtsin opeuj kinselia akin xjudíos katkaj niman ijkon noijki matekiuajtikan iuan Jesús ipan iluikak (Hech. 10:45; Rom. 9:23-26). Yejuin akin okintlapejpenijkej ika espíritu santo onochiujkej iyaxkauan toTajtsin niman akin melak tlasojtij (1 Ped. 2:9, 10). Niman, ¿tlenon uelis tikijtoskej itech akin kuajli kitekichiuiliaj toTajtsin ipan yejuin tonaltin niman kichiaj  nemiskej ipan tlaltikpaktli? ToTajtsin noijki kimita ken ikalpan niman ken itlapejpenijkauan (Is. 65:22).

3. a) ¿Akinomej kimita Jehová ika melak tlasojtij ipan yejuin tonajli? b) ¿Tlenon tikitaskej ipan yejuin tlamachtijli?

³ Ipan yejuin tonajli, akin kichiaj yaskej iluikak, akin xmiyekej, niman akin kichiaj chantiskej ipan tlaltikpaktli noso “oksekimej borregos”, san sekan nemij niman san sekan kitekichiuiliaj Jehová (Luc. 12:32; Juan 10:16). Tinochimej tiknekij tikititiskej toTajtsin ika melak tiktlasojkamatij pampa techita ken akin melak tlasojtij. Yejuin tlamachtijli tlajtos itech kenon uelis tikteititiskej ika tiktlasojkamatij ika toTajtsin ijkon techita.

4. a) ¿Kenon uelis tiktlasojkamachiliskej Jehová ika techkauilia iuan matouikakan? b) ¿Kenon Jesús okichiuj yejuin?

⁴ Ijkuak tosentemakaj itech Jehová, tikititiaj ika tiktlasojkamachiliaj. Ijkuak toapolaktiaj, tikteititiaj ixpan oksekimej ika aman tonemilis iyaxka Jehová niman ika tiknektokej tiktlakamatiskej (Heb. 12:9). Jesús noijki okichiuj yejuin ijkuak onoapolakti, pampa ijkon kentla kijlitoskia iTaj: “Nikchiuas tlen tejua tikneki, noTajtsin, melak nechyolpaktia” (Sal. 40:7, 8). Ijkon okiteititi ika kichiuaskia tlen kinekiya toTajtsin, maski ijkuak otlakatka yejua inemiya ipan se kalpan tlen yonosentemakaka itech toTajtsin.

5, 6. a) ¿Kenon onomachili Jehová ijkuak Jesús onoapolakti? b) Xkijto se neskayotl tlen kiteititia kenon nomachilia Jehová ijkuak itech tosentemakaj.

⁵ ¿Kenon onomachili Jehová ijkuak Jesús onoapolakti? Biblia kijtoua: “Nimantsin on iluikak otlapou, niman yejua okitak iEspíritu Dios uajtemouaya ken itlaj paloma ipan. Kemaj okakistik se tlajtojli ne iluikak yejuan okijtoj: ‘Yejua in yejua notlajsojkaKonetsin yejuan itech nipaktikajʼ” (Mat. 3:16, 17). Jehová melak okiyolpakti ijkuak okitak ika iKoneuj, akin maski iyaxka katka, kinektoya san yejua kitekichiuilis. Noijki ijkon, Jehová melak kiyolpaktia ijkuak itech tosentemakaj, niman yejua techteochiuas (Sal. 149:4).

⁶ Matikitakan se neskayotl tlen techkauilis kuajli matikasikamatikan kenon nomachilia Jehová ijkuak itech tosentemakaj. Xnemili ika se tlakatl kitoka miyek xochimej tlen kualtsitsintin ikiyauak ichan. Se tonajli, iichpokatsin kiteki se xochitl niman kitlayokolia. Maski nochi xochimej itlatkiuan, melak kuelita ika iichpokatsin kimaka yejon xochitl pampa kita ika kitlasojtla. Tikmatstokej ika tajtli melak kuelita yejon xochitl maski kipiya okseki xochimej. Noijki ijkon, Jehová melak yolpaki ijkuak tiktlapejpeniaj san itech yejua tosentemakaskej (Éx. 34:14).

7. ¿Kenon techpaleuiya Malaquías matikasikamatikan tlenon kimachilia Jehová itech akin kitekichiuiliaj ika inyojlo?

⁷ (Xpoua Malaquías 3:16). * Akin ok xnosentemakaj niman xnoapolaktiaj noneki matlanemilikan itech kenon melak ueyi kijtosneki tikchiuas yejuin. Tikmatstokej ika maski ok xtiuajtlakatij itiiyaxkauan Jehová. Maski ijkon, matiknemilikan kenon melak yolpaki Jehová ijkuak tikitaj ken toTekiuaj niman ijkuak itech tosentemakaj niman tikchiuaj tlen yejua kineki (Prov. 23:15). Yejua, noijki kimixmati akin kitekichiuiliaj ika inyojlo niman kijkuiloua intokayo ipan “amoxtli tlen tetlalnamiktia”.

8, 9. ¿Tlenon kintlajtlanilia Jehová akin ijkuiliujtika intokayo ipan “amoxtli tlen tetlalnamiktia”?

 ⁸ Tla tiknekij ika totokayo maonia ipan “amoxtli tlen tetlalnamiktia” tlen kipiya Jehová, noneki tikchiuaskej seki tlemach. Malaquías okijto ika noneki tikmojkaitaskej toTajtsin niman titlanemiliskej ipan itokayo. Tla tikueyichiuaj itlaj noso yakaj okse, Jehová kipopolos totokayo itech “amoxtli tlen tetlalnamiktia” (Éx. 32:33; Sal. 69:28).

⁹ Kuakon, tosentemakaskej xsan kijtosneki tikijliskej Jehová ika tikchiuaskej tlen kineki niman toapolaktiskej. San sejpa tosentemakaj niman toapolaktiaj, niman yejon nimantsin panotikisa. Ijkuak tikijtouaj ika tinemij iuan Jehová niman tiktekichiuiliaj, kijtosneki ika tiktlakamatij ipampa tlen mojmostla tikchiuaj (1 Ped. 4:1, 2).

10. ¿Kenon nimantsin nesi akinomej kitekichiuiliaj toTajtsin niman akinomej ka?

¹⁰ Ipan okse tlamachtijli otomachtijkej itech Caín, Salomón niman israelitas. Nochimej kijtouayaj ika kitekichiuiliayaj toTajtsin, san ika, xsan yejua okiueyichiujkej. Yejuin neskayomej kuajli techititiaj ika akin iyaxkauan Jehová noneki nochipa kichiuaskej tlen melajki niman kimapeuaskej tlen xkuajli (Rom. 12:9). Ijkuak Malaquías yokiteneujka “amoxtli tlen tetlalnamiktia”, Jehová otlajto itech “kenon xsan noijki akin yolmelaujki itech se xkuajli tlakatl, itech se akin kitekichiuilia toTajtsin niman se akin xkitekichiuilia” (Mal. 3:18).

11. ¿Tleka oksekimej noneki nimantsin kitaskej ika san tiktekichiuiliaj Jehová?

¹¹ Melak tiktlasojkamatij ika Jehová otechtlapejpeni niman techkauilia matinemikan ipan ikalpan. Ika yejon, noneki ika akin techitaj nimantsin makitakan ika tiktekichiuiliaj Jehová (1 Tim. 4:15; Mat. 5:16). Matotlajtoltikan: “¿Kitaj oksekimej ika yemelak nimelajkanemi itech toTajtsin? ¿Nikyejyekoua ika oksekimej manechixmatikan ken se iteixpantijkauj Jehová?”. ToTajtsin melak kiyolkokoskia tla tipinauiskiaj tikimijliskej oksekimej ika tiiyaxkauan toTajtsin (Sal. 119:46; xpoua Marcos 8:38).

12, 13. ¿Tleka kemantika xuelis tikmatis tla sekimej Teixpantijkej yemelak kitekichiuiliaj toTajtsin?

 ¹² Teajman ika sekimej Teixpantijkej kixkopinaj “tlaltikpaktlakamej” niman kuakon san noijki nesij ken akin xkitekichiuiliaj toTajtsin (1 Cor. 2:12). Akin kichiuaj ken yejon “tlaltikpaktlakamej” akin xkitekichiuiliaj Jehová, san tlanemiliaj itech tlen yejuamej kinekij (Efes. 2:3). Se neskayotl, maski melak miyekpa yotechilnamiktijkej matotlakentikan niman matokualnextikan ken kinamiki, sekimej xkichiuaj. Kitlaliaj tlakentli tlen inpan tetstitiuj niman tlen xkuajli kintlapachoua, niman hasta ijkon yauej tlanechikoltin. Oksekimej kitekij intson noso notsonmelauaj ijkon ken akin xkitekichiuiliaj toTajtsin (1 Tim. 2:9, 10). Kuakon, ijkuak nemij imiuan oksekimej, xnesij akinomej iteixpantijkauan Jehová niman akinomej ka (Sant. 4:4).

¹³ Sekimej Teixpantijkej kichiuaj okseki tlen kiteititia ika xnokojtiliaj kimapeuaskej tlen xkuajli nochiua ipan tlaltikpaktli. Se neskayotl, ijkuak yauej ipan se iluitl, nijtotiaj niman kichiuaj tlen xkipiya kichiuaskej akin kitekichiuiliaj toTajtsin. Kitlaliaj ipan redes sociales intlaixkopinaluan niman kijtouaj tlen xkijtoskiaj akin chikauak intlaneltokil. Kanaj xkinchikajkanotsaj ipan tlanechikojli pampa xkichiujtokej se ueyi tlajtlakojli, san ika, uelis kimijtlakoskej akin nokojtiliaj nemiskej ken kitlajtlani Jehová (xpoua 1 Pedro 2:11, 12).

14. ¿Tlenon noneki tikchiuaskej niman ijkon nochipa touikaskej iuan Jehová?

¹⁴ Yejuin tlaltikpaktli kichiua ika manotejtemo “on xkuajli eleuilistli yejuan tonakayo kipia, niman on tlen xkuajli yejuan tikixpakaitaj, niman nochi on tlajtlamach tlen tikpiaj yejuan kichiua para yejua ika ma titoueyimatikan” (1 Juan 2:16). San ika, tejuamej tiiyaxkauan Jehová, niman yejua technauatia “ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli”, niman noijki “techmachtia ma titonauatikan kuajli, ma tiyolmelajkanemikan niman ma tiyeknemikan ipan in tlaltikpaktli” (Tito 2:12). Nochi tlen tikchiuaj ipan tonemilis, ken titlajtouaj, ken titlakuaj niman ken titlaonij, ken totlakentiaj niman ken tokualnextiaj, niman ken titekitij, kipiya ika kuajli kimititis akin techitaj  ika yemelak yotosentemakakej itech Jehová (xpoua 1 Corintios 10:31, 32).

15. ¿Tleka noneki kuajli tikinnotsaskej niman tikintlasojtlaskej tokniuan?

¹⁵ Noijki tikteititiaj ika tiktlasojkamatij ika kuajli touikaj iuan Jehová ijkuak tikinchiuiliaj tokniuan tlen kuajli. Yejuamej noijki iyaxkauan toTajtsin. Tla xkeman tikilkauaj yejuin, nochipa kualtsin tikinnotsaskej niman tikimititiskej ika tikintlasojtlaj (1 Tes. 5:15). Jesús okimijli akin kitokayaj: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:35).

16. ¿Tlen neskayotl tlen onka ipan Tlanauatijli tlen okimakakej Moisés techmachtia ika Jehová kintlasojtla itekipanojkauan?

¹⁶ Matikitakan se neskayotl tlen techpaleuis matikasikamatikan kenon noneki touikaskej imiuan oksekimej ipan tlanechikojli. Ipan teopan tlen okichijchiuilijkej Jehová, onkatka seki tlajtlamach tlen san notekitiltiaya ijkuak kiueyichiuayaj Jehová. Tlanauatijli tlen okimakakej Moisés kuajli kitetomiliaya kenon nonekiya kintlajpiyaskej, niman akin xijkon kichiuaya nonekiya kimiktiskej (Num. 1:50, 51). Tla Jehová ijkon kintlajpiaya yejon tlajtlamach tlen notekitiltiaya ijkuak kiueyichiuayaj, tikmatij ika melak kuajli kintlajpiyas itekipanojkauan akin itech yonosentemakakej niman yolmelaujkanemij. Se tonajli, okijli ikalpan: “San akinon mechkitskia nejua noixtololo kikitskia” (Zac. 2:8).

17. ¿Tlenon kitstika niman kikaktika Jehová?

¹⁷ Noijki noneki matikitakan ika Malaquías kijtoua ika Jehová kita niman kuajli kikaki kenon itekipanojkauan nouikaj imiuan oksekimej (Mal. 3:16). Kuajli tikmatij ika Jehová kimixmatstika akin iyaxkauan (2 Tim. 2:19). Yejua kimatisneki nochi tlen tikijtouaj niman tlen tikchiuaj (Heb. 4:13). Ijkuak tikinchiuiliaj tokniuan tlen xkuajli, Jehová kita yejon. San ika, kuajli matikmatstokan ika noijki kita niman kilnamiki ijkuak titetlapopoluiyaj, ijkuak kuajli titeseliaj, ijkuak tikinmakaj oksekimej tlen tikpiyaj niman ijkuak tikinchiuiliaj tlen kuajli (Heb. 13:16; 1 Ped. 4:8, 9).

18. ¿Kenon tiktlasojkamachiliaj Jehová pampa otechtlapejpeni matinemikan ipan ikalpan?

¹⁸ Tikmatij ika melak tiknektokej tikititiskej Jehová ika tiktlasojkamatij pampa otechtlapejpeni matinemikan ipan ikalpan. Tikmatij ika melak kuajli tlen otikchiujkej ijkuak otiktlapejpenijkej tikmakaskej nochi tonemilis. Maski tinemij “intlajkotian on xkuajkualtin tlakamej”, tiknekij ika tlaltikpakchanejkej makitakan ika chipauak tonemilis, niman ika tipetlanij itlajkotian tlaltikpakchanejkej (Filip. 2:15). Tikmapeuaj nochi tlen xkuajli (Sant. 4:7). Niman tikintlasojtlaj niman tikintlakaitaj tokniuan, pampa tikmatstokej ika yejuamej noijki iyaxkauan Jehová (Rom. 12:10).

19. ¿Kenon kinteochiuas Jehová akin iyaxkauan?

¹⁹ Biblia kuajli techijlia yejuin: “Jehová xkitlalkauis ikalpan, nion xkikauas tlen iyaxka” (Sal. 94:14). Yejua kichiuas tlen yotechijli maski san tlenon topan manochiua. Niman maski tla timikij, Jehová xtechilkauas (Rom. 8:38, 39). “Tla tinemij, tinemij para toTeko [Jehová], niman tla timikij, timikij para toTeko [Jehová]. Tla tinemij noso tla timikij, titeyaxkauan itech toTeko [Jehová]” (Rom. 14:8). Melak tiknekij ika mayejko tonajli ijkuak Jehová oksejpa kinyolitis akin iuan nouikaj niman akin itech oyolmelaujkanenkej (Mat. 22:32). Niman hasta amantsin tikpiyaj miyek tlateochiualistin. Ken Biblia kijtoua, “yolpaki se país akin iTajtsin Jehová, se kalpan akin yejua okitlapejpeni itlatki yes” (Sal. 33:12).