ICHANEJKAUAN John chantiyaj ipan se pitentsin kalpan tlen onkatka Gujarat (India). Ikipiya 60 xiuitl, itaj onoapolakti ken iteixpantijkauj Jehová. San ika, John, inan niman makuiltin ikniuan tlakamej niman siuamej melak católicos katkaj niman xkuelitayaj ika intaj Teixpantijketl katka.

Se tonajli, itaj John okitlajtlanili makitkili se amatl se akin iuan nouika ipan tlanechikojli. Ipan yejon kualkan, John melak onomajpilkoko ijkuak okitlapo se bidón tlachijchiujtli ika tepostli. Maski ijkon, pampa kinekiya kitlakamatiskia itaj, okitlapacho imajpil ika se tlakentli niman onejnentiaj kampa chanti akin itaj iuan nouika.

Ijkuak ompa oajsik, isiuauj yejon tokniuj, akin katka iteixpantijkauj Jehová, okiseli amatl. Ijkuak okitili imajpil, tokniuj nimantsin okipaleui. Okikixti kampa kipiya tlen ika tepajtis, okichipauili kampa onokoko niman okisalouilij imajpil. Sakin okichijchiuili se té, niman opeuj kinojnotsa itech Biblia.

Ken John kintlauelitaya iteixpantijkauan Jehová opeuj popoliui. Kuakon okinek kichiuilis seki tlajtoltilistin tokniuj. Yejua kineltokaya ika Jesús katka toTajtsin niman ika nonekiya kichiuilis teoyotl María, san ika, itaj xijkon tlanemiliaya. Tokniuj siuatl, akin onomachtijka gujarati, okitlapo Biblia niman ika itlajtol John okitomili tlen Biblia temachtia itech yejuin ome tlemach. Sakin, okimakak amatlajkuilojli “Estas buenas nuevas del reino”.

Ijkuak otlan kipoua yejuin amatlajkuilojli, John okimat ika yejuin katka tlen melauak. Okitato teopixki ipan teopan kampa yaya niman okitlajtolti tlen okitlajtoltijka tokniuj siuatl. San ika, yejon teopixki okualan, okontlajkalili se Biblia niman okitsajtsili: “¡Yotimokuep Satanás! ¿Kanon kijtoua Biblia ika Jesús xtoTajtsin? ¿Kanon kijtoua ika xnoneki tikchiuiliskej teoyotl María? ¿¡Kanon!?”. John xueliya kineltokaya ika teopixki ijkon kinankilijtoya niman okijli: “Xok keman nikalakis ipan se teopan católica”. Niman ijkon okichiuj.

John opeuj nomachtia iuan iteixpantijkauan Jehová, okiseli tlen melauak niman opeuj kitekichiuilia Jehová. Oksekimej ichanejkauan noijki ijkon okichiujkej. Ok nestok kampa John onomajpilkoko niman, ijkuak kita, kilnamiki ika tlasojtlalistli tlen kuajli ipan onochiuj, tlen ikipiya 60 xiuitl niman tlen okipaleui makixmati tlaneltokijli tlen melauak (2 Cor. 6:4, 6).