Tlen nesi ipan tlaixkopinajli teititia tlen miyekej kinemiliaj panos ijkuak toTajtsin teyolkuitis. Kinemiliaj ika melak miyekej nemiskej ixpan toTajtsin niman ijkon kinyolkuitiskej ipampa tlen okichiujkej: sekimej kimijliskej mauiyan ipan iluikak, niman oksekimej mauiyan ipan infierno. San ika, Biblia techijlia ika ijkuak toTajtsin teyolkuitis, kipopolos tlen xkuajli nochiua ipan tlaltikpaktli (Salmo 96:13). ToTajtsin yokitlali Jesús ken Juez akin kinyolkuitis tlaltikpakchanejkej (xpoua Isaías 11:1-5; Hechos 17:31).

Kachtopa tlakatl, Adán, xokitlakamat toTajtsin Jehová. Ika yejon nochimej ikoneuan tlajtlakouaj, tlajyouiyaj niman mikij (Romanos 5:12). Pampa Jesús kineki kiyektlalis yejon tlen xkuajli onochiuj, kinyolitis melak miyekej tlaltikpakchanejkej akin yomijkej. Ipan amoxtli Apocalipsis noso Revelación, kijtoua ika yejon panos ipan mil xiuitl ijkuak Jesús tekiuajtis (xpoua Apocalipsis 20:​4, 11, 12).

Akin yoliuiskej kinyolkuitiskej, san ika, xkinyolkuitiskej ipampa tlen okichiujkej achto ika mikiskiaj, yejuamej kinyolkuitiskej ika tlen uajnesis ipan rollos tlen noteneuaj ipan capítulo 20 de Apocalipsis (Romanos 6:7). Apóstol Pablo otlajto itech “yejuan yolmelajkej niman yejuan xyolmelajkej” niman ijkon kinteneuas akin oksejpa yoliuiskej niman uelis kinmachtiskej itech toTajtsin (xpoua Hechos 24:15).

Akin omijkej niman xokixmatkej toTajtsin Jehová, uelis kixmatiskej niman kitlakamatiskej. Tla ijkon kichiuaj, kipiyaskej nemilistli “yejuan para nochipa”. San ika, akin yoliuiskej niman xkinekiskej kitlakamatiskej toTajtsin kintlajtlakolmakaskej (xpoua Juan 5:​28, 29; Isaías 26:​10; 65:20).

Jehová teyolkuitis mil xiuitl, ijkuakon kichiuas ika tlaltikpakchanejkej oksejpa kuajli manemikan (1 Corintios 15:24-​28). ¡Melak kualtsin tlateochiualistli kiseliskej akin tetlakamatiskej! Sakin ika Satanás tsauktos mil xiuitl, toTajtsin kimakauas san achijtsin tiempo. Satanás melak nokojtilis niman ijkon kichiuas ika sekimej makitlalkauikan Jehová (xpoua Isaías 25:8; Apocalipsis 20:​1, 7-9).

Biblia tlajtoua itech okse tonajli ijkuak toTajtsin teyolkuitis. Yejuin nochiuas ijkuak kipopoloskej nochi tlen xkuajli panotika aman niman ijkon nochiuas ijkuak xakaj kinemilis, ken ipan itonaluan Noé, ijkuakon, nochimej akin xkuajkualtin oamimijkej. Sa achijtsin poliui ika kinpopoloskej nochimej akin xkuajkualtin, ijkuakon, san nemiskej akin kichiuaj tlen kuajli niman nochimej nemiskej ika inyojlo (xpoua 2 Pedro 3:​6, 7, 13).