ITECH TLEN TLAJTOUA IXPAN
¿Tlenon kinemilia toTajtsin itech guerras?
Miyekej kinemiliaj ika toTajtsin kuajli kita ika onka guerras, pampa yeuejkaui itekipanojkauan tlapaleuiayaj ipan guerras, ken uajnestiuj ipan Biblia. San ika, oksekimej kimatstokej ika Jesucristo, iKoneuj toTajtsin, okinmachti inomachtijkauan ika makintlasojtlakan akin kintlauelitaj (Mateo 5:43, 44). Kinemiliaj ika oyejkok tonajli ijkuak toTajtsin okipatlak ken kinemiliaya niman aman xkuajli kita guerras.
Kuakon, ¿kuelita toTajtsin maonia guerras noso ka? Tla kema, ¿kanon tlapaleuiya ijkuak onka guerras ipan yejuin tonajli? Tikmatis ken nonankilia yejuin uelis mitspaleuis xkita ken tikmachilia niman tlen tiknemilia itech guerras. Xnemili, tla tejua tikmatiskia ika toTajtsin xsan kuajli kita guerras noijki tlapaleuiya mateixnamikikan kampa tejua tinemi, tejua tikmatstoskia ika titetlanis niman ika yejon guerra kuajli tla nochiua. San ika ¿tla tikmatiskia ika toTajtsin kinpaleuiya kampa tejua xtinemi? ¿Tikpatlaskia tlen tiknemilia itech guerras?
Onka tlen melak ueyi kijtosneki itech yejuin. Tikmatis kenon toTajtsin kimita guerras uelis kipatlas tlen tiknemilia itech toTajtsin. ¿Tleka ijkon tikijtouaj? Tla tejua, ijkon ken miyekej tlaltikpakchanejkej, titlajyouiya ipampa guerras, tiknekis tikmatis tla toTajtsin tekauilia, tla kichiua noso tlapaleuiya maonia guerras. Noso kanaj timotlajtoltia tla najmana inpampa akin tlajyouiyaj itech guerras.
Titlamojkaitas tikmatis tlen kijtoua Biblia pampa xkijtoua yejon tlen yotikonitojkej. Niman, kijtoua ika toTajtsin nochipa ijkon kinemilia itech guerras. Matikitakan ipan Biblia tlen yejua kinemiliaya itech guerras tlen yeuejkaui opanokej niman ijkuak Jesucristo onen ipan tlaltikpaktli. Tikmatiskej yejon, techpaleuis matikasikamatikan tlen kinemilia itech guerras tlen onka aman niman tikmatiskej tla ok onias guerras ika tlayekapan.
