“Maka xkomatstiakan on tlen mostla nochiuas, pampa cada tonajli ye onkaj tlen nenkiseliskej yejuan ika nemokauaskej” (MATEO 6:34).

Tlen kijtosneki: Yemelak ika nochipa onka tlen techajmana. San ika, xkuajli tla noijki timajmana ipampa tlen mostla panos. Xyejyeko maka melak mamitsajmana tlen panos ika tlayekapan.

• Tla tiajmankamiki, uelis kichiuas melak xmojkamiki. Kuakon, ¿tlenon uelis tikchiuas? Kachtopa, noneki tikselis ika nochipa onias itlaj tlen mitsajmankamiktis, san ika, tla melak timajmana ipampa tlen xueli tikyektlalia, más tiajmankamikis. Niman ika ome, xkilnamiki ika kemantika kuajli onkisa tlen tikchiuaj maski kanaj xijkon tikchiayaj.

“Tlamachilistli tlen ualeua itech toTajtsin [...] teasikamati” (SANTIAGO 3:17, TNM).

Tlen kijtosneki: Maka xnemili ika xkeman timopopolos. Nion maka xnemili ika nochi uelis tikchiuas noso ika oksekimej nochi uelis kichiuaskej.

• Noneki tiyolyemanki yes, xchiua san tlen tiuelis niman xmati ika san onka tlen ueli tikchiua niman ika oksekimej noijki xueli nochi kichiuaj. Tla ijkon tikchiua, tejua niman oksekimej akin imiuan timouika kuajli nomachiliskej niman uelis kichiuas nochi kuajli makisati. Noijki, nochipa xtejtemo tlen ika tiuetskas. Ijkuak tiuetskaj, maski itlaj xkuajli onkisa, xok tiajmankamikij niman kuajli tomachiliaj.

“Yejuan tlamachilisyejkej xniman kualanij” (PROVERBIOS 17:27).

Tlen kijtosneki: Tla tiknemilia tlen xtepaleui, xtiuelis kuajli titlanemilis. Kuakon, xyejyeko xmoyolseui.

• Xkita tlenon mitsajmankamiktia niman tlenon tikchiua ijkuak ijkon panoua. Kuajli xkita tlenon tiknemilia, tlenon tikmachilia niman tlenon tikchiua ijkuak tiajmankamiki. Hasta uelis tikijkuilos yejon. Tla tikmati tlenon tikchiua ijkuak tiajmankamiki, uelis tikchiuas tlen kinamiki. Noijki maka sa xchiua yejon tlen mitsajmankamiktia. Tla xueli tikchiua yejon, xtejtemo tlen mitspaleuis ijkuak ijkon timomachilis. Uelis tikijkuilos kemanon niman kenon tikchiuas motekiyo.

• Xtinochimej san noijki tlen techajmankamiktia, pampa xsan noijki ken titlanemiliaj. Ika yejon, xyejyeko tikpatlas ken titlanemilia. ¿Tleka xtikchiua yejuin?

  1. Maka nimantsin xnemili tlen xkuajli intech oksekimej. Tla kampa tinemi yakaj mitspanauijtikisa niman tejua tiknemilia ika xkuajli tlen okichiuj, nimantsin tikualanis. Kuajli yeskia tla tiknemilia ika xyejon tlen kinekiya kichiuas. Kanaj... yemelak xkinekiya mitspanauijtikisas.

  2. San xtlanemili itech tlen tepaleui. Tla noneki uejkauis tikchias mapano carro noso mamitsita tepajtiketl, uelis tikpouas itlaj noso tikchiuas okseki tlen noneki.

  3. Xkita nochi tlen panoua. Xmotlajtolti: “¿San noijki nikitas yejuin tlauejli on okse semana?”. Xkita katlejua tlauejli xmás ueyi kijtosneki niman katlejua kema.

“Nochi xchiuakan ken kitocaroua, niman maka sa kenijki xchiuakan” (1 CORINTIOS 14:40).

Tlen kijtosneki: Xmokojtili kuajli tikyekanas tlen tikchiua.

• Noneki ika tinochimej kuajli matikyekanakan tonemilis. Nimantsin matikchiuakan totekiyo, pampa tla xijkon tikchiuaj, uelis kichiuas matiajmankamikikan niman topan nosentlalis tekitl. Uelis tikchiuas yejuin:

  1. Xkijkuilo tlen noneki tikchiuas niman ijkon xchiua.

  2. Xkita tlenon kichiua maka nimantsin xchiua itlaj.

“Más kuajli titekitis ken [...] kitokaroua, niman tikpiyas achitsin neseuijli, xken sanoyej tichikajkatekitis [...]. Yejua in [...] ken tla se kinekiskia kajsis ikan ima on ajakatl” (ECLESIASTÉS 4:6).

Tlen kijtosneki: Kanaj akin sajnoye tekitij xok uelij nion xkipiyaj tiempo tlen ika noyolpaktiskej.

• Xkita tekitl niman tomin ijkon ken kinamiki. Tla tikpiya miyek tomin, xkijtosneki ika yejon melak mitsyolpaktis noso xok tiajmankamikis. Akin kipiyaj miyek tomin xyolpakij niman noijki melak ajmankamikij. Ken kijtoua Eclesiastés 5:12, “sen rico, xkaman iyolika kochi”. Ika yejon, maka sajnoye xtejtemo tomin.

• Xkita kemanon uelis achijtsin timoseuis. Tla tikchiua tlen tikuelita, xok sajnoye tiajmankamikis. Maski miyekej kimachiliaj xok más ajmankamikij ijkuak kitaj televisión noso kichiuaj itlaj kampa san yeuatokej, yejuin xmelak tepaleui.

• Maka san xkitsto mocelular noso motableta. Noijki xkuajli tla san nochipa tikimitstok mensajes de texto noso redes sociales. Tla xmelak noneki, maka xkita itlaj itech motekiyo.

“Tla tikchiua ejercicio, achijtsin mitspaleuiya ipan motlalnakayo” (1 TIMOTEO 4:8).

Tlen kijtosneki: Melak mitspaleuis tla nochipa tikchiua ejercicio.

• Xchiua tlen mitspaleuis. Tla tikchiua ejercicio, uelis mitspaleuis maka sa xajmankamiki. Xkua tlen kipaleuis motlalnakayo niman xtlakua ijkuak nonekis. Xmokojtili kuajli xkochi.

• Maka xnemili ika mitspaleuis tla tipoki, tla titlauani noso tla tijkui drogas, pampa yejon kichiuas más xajmankamiki, kichiuas xkualo niman maka sa xpiya tomin.

• Xuiya itech tepajtiketl tla tikmachilia ika melak tiajmankamiki. Tla tiauj itech tepajtiketl, xkijtosneki ika xotitlaxiko.

Kuajli xkitakan “on tlen más kuajli” (FILIPENSES 1:10).

Tlen kijtosneki: Kuajli xkita katlejua motekiyo noneki nimantsin tikchiuas.

• Xkijkuilo tlenon xuelis sakin tikchiuas. Yejuin mitspaleuis xkita tlenon melak noneki niman tlenon ka, tlenon uelis titepanoltilis niman tlen tekitl xok nonekis tikchiuas.

• Xkijkuilo tlenon tikchiua ipan se semana niman kech tiuejkaui. Sakin, xnemili kenon uelis xmás tiuejkauis. Tla tikmatstok tlenon tikchiuas, xsajnoye tiajmankamikis.

• Xkita kemanon timoseuis, maski san achijtsin. Yejuin uelis mitspaleuis maka sajnoye xajmankamiki.

“Sen ueyi ajmantli xkauilia sen tlakatl ma nemi iyolika, pero ijkuak kaki sen kuajli tlajtojli, yejua noyoleua” (PROVERBIOS 12:25).

Tlen kijtosneki: Tla yakaj mitsijlia itlaj tlen kualtsin, uelis kichiuas kuajli xmomachili.

• Xkijli yakaj akin iuan timouika kenon timomachilia. Yakaj akin itech titlaneltoka uelis mitspaleuis xpatla ken titlanemilia noso hasta mitspaleuis xyektlali tlen mitsajmana. Maski san tikijtos nochi tlen mitsajmana, uelis mitspaleuis.

• Xtlajtlani mamitspaleuikan. ¿Uelis titepanoltilis seki motekiyo noso tiktejtemos akin mamitspaleui ika motekiyo?

• Tla yakaj akin iuan titekiti mitsajmankamiktia, xyejyeko xyektlali yejon tlauejli. Ika tlakaitalistli niman ika kuajli tlajtojli uelis tikijlis tlen kichiua maka kuajli xmomachili (Proverbios 17:27). Tla yejon xtepaleuiya, ¿uelis tikyejyekos xok sajnoye iuan titlajtlatos?

“Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua” (MATEO 4:4).

Tlen kijtosneki: Tlaltikpakchanejkej xsan noneki kipiyaskej tlen kikuaskej, kanon chantiskej niman intlaken. Noijki noneki kichikauaskej intlaneltokil itech toTajtsin. Tla tiknekij tiyolpakiskej, noneki tikasikamatiskej yejuin niman ijkon tikchiuaskej.

• Melak mitspaleuis tla tikchiua teoyotl. ToTajtsin kineki xkijli nochi tlen mitsajmana, pampa yejua kineki mitspaleuis (1 Pedro 5:7). Tla tikchiua teoyotl niman tiknemilia tlen tepaleui, tinemis ika moyojlo (Filipenses 4:6, 7).

• Xpoua tlen mitspaleuis xnisiui toTajtsin. Tlen otikitakej ipan yejuin revista onka ipan Biblia, niman Biblia techpaleuiya matikchikauakan totlaneltokil. Tlen onka ipan Biblia noijki techpaleuiya matikpiyakan tlamachilistli niman asikamatilistli (Proverbios 3:21). ¿Tleka xtikpoua Biblia? Uelis tipeuas ika libro tlen itoka Proverbios.