Armagedón kijtosneki ijkuak toTajtsin nouisokis imiuan tekiuajkej akin tlayekanaj ipan yejuin tlaltikpaktli. Yejuin tekiuajkej niman akin kinpaleuiyaj kixnamikij toTajtsin pampa xkinekij kintlakamatiskej itlanauatiluan (Salmo 2:2). On guerra tlen itoka Armagedón kinpopolos nochimej tekiuajkej (Daniel 2:44).

 Tlajtojli Armagedón noijki noijkuiloua Har–Magedón, niman san sejpa uajnesi ipan Biblia ipan Revelación noso Apocalipsis. Ipan se teotlajtojli kijtoua ika kinsentlaliskej “nochimej on reyes [...] para nouijsokiskej iuan Dios yejuan nochi ueli kichiua”. Yejuin guerra nochiuas ne kampa ika tlajtojli hebreo itoka Har–Magedón (Apocalipsis 16:14, 16).

 ¿Akinomej tlauijsokiskej ipan Armagedón? Jesucristo niman angéles kinpopoloskej itlauelikniuan toTajtsin (Apocalipsis 19:11-16, 19-21). Akin kixnamikiskej iTekiuajyo toTajtsin niman akin xkitlakaitaskej toTajtsin noijki teuan popoliuiskej (Ezequiel 39:7).

 ¿Kanon nouijsokilos? Ijkuak nouijsokilos ipan Armagedón, nochiuas ipan nochi tlaltikpaktli xsan ipan se kalpan (Jeremías 25:32-34; Ezequiel 39:17-20).

 Tlajtojli Armagedón (ika hebreo, Har Meghiddóhn) kijtosneki tepetl tlen onka Meguidó. Meguidó katka se kalpan tlen nokauaya Israel. Ixtlamatkej kijtouaj ika ipan yejon kalpan miyekej ompa onnouijsokiyaj. Biblia seki kinteneua (Jueces 5:19, 20; 2 Reyes 9:27; 23:29). San ika, xuelis tikijtoskej ika Armagedón nokaua ipan kalpan Meguidó pampa ompa xonokej tepemej. Noijki ipan valle de Jezreel tlen nokaua nisiuj Meguidó, xonakiskiaj nochimej akin nouisokiskej iuan toTajtsin. Armagedón kijtosneki ijkuak nochimej tekiuajkej nosentlaliskej niman ijkon kixnamikiskej iTekiuajyo toTajtsin.

 ¿Tlenon panos ipan Armagedón? Xtikmatij kenon kitekitiltis ikojtilis toTajtsin, san ika, kanaj oksejpa kitekitiltis tlen ika yotlapopolojka yeuejkaui ken: tesiujtli, tlalolinalistli, apachiuilistli, tlitl, tlapetlanalistli niman kokolistli (Job 38:22, 23; Ezequiel 38:19, 22; Habacuc 3:10, 11; Zacarías 14:12). Pampa xkimatiskej tlenon panotos sekimej itlauelikniuan toTajtsin san no yejuamej nomiktiskej. San ika, sakin, kasikamatiskej ika toTajtsin yejua akin kimixnamiktika (Ezequiel 38:21, 23; Zacarías 14:13).

 ¿Popoliuis tlaltikpaktli ipan Armagedón? Ka, pampa toTajtsin okichijchiuj tlaltikpaktli para nochipa ompa machantilo (Salmo 37:29; 96:10; Eclesiastés 1:4). Ika yejon, uelis tikijtoskej ika ijkuak panos Armagedón xnochi popoliuis ijkuakon, yej makisaskej “sanoyej miyek tlakatl” akin melajkanemij itech toTajtsin (Apocalipsis 7:9, 14; Salmo 37:34).

 Miyekpa Biblia kikui tlajtojli tlaltikpaktli para kiteneuas tlaltikpaktli tlen ipan tichantij, san ika, kemantika kikui para kinteneuas tlaltikpakchanejkej akin xkitlakamatij toTajtsin (1 Juan 2:15-17). Nikan tlajtojli “tlatlalpoliuis” nokui para noijtos ika popoliuiskej akin xkuajkualtin (Mateo 24:3).

 ¿Kemanon peuas Armagedón? Ijkuak Jesús tlajtojtoya itech ueyi tlajyouilistli tlen tlamiskia ijkuak peuaskia Armagedón, okijto: “Pero on tonajli niman on hora para tlatlalpoliuis xakaj kimati, nion yejuamej on ángeles ne iluikak nemij, nion nejua yejuan niiKoneu Dios. Yej san Dios toTajtsin kimati” (Mateo 24:21, 36). San ika, Biblia kema kijtoua ika Armagedón panoskia ijkuak Jesús tekiuajtitoskia ne iluikak niman yejua opeuj tekiuajti ipan 1914 (Mateo 24:37-39).