Komatimej ayoʼ monechkowaj pan irreligión iga ompa ayá̱ kine̱xtiliáj kén manemikan ken Dios kineki wan ompa ayá̱ kiyo̱lta̱liáj. Inó̱n iga, ¿té íga xaj ka̱n monechkowaj yej tajto̱lmoya̱waj de Jehová? ¿Te̱ tikasis ompa?

Tiá tonoti wan yej moye̱ʼwi̱gaj wan yej mopale̱wiáj. Pan achto siglo yej kitokayaj Cristo seka̱ntitoyaj pan tanechko̱lismej wan kua̱ monechkowa̱yaj kiweychi̱wayaj Dios, momachtia̱yaj Itajto̱l Dios wan moyo̱lketsayaj (Hebreos 10:24, 25). Kua̱ monechkowa̱yaj moitayaj ken ikni̱mej wan ken melaʼ amigojmej iga monekiáj (2 Tesalonicenses 1:3; 3 Juan 14). Nejeme̱n no̱ ijko̱nsan nikchi̱waj wan nipa̱kij.

Timomachti̱s kén welij mitspale̱wiá yej kijtowa Biblia. Itajto̱l Dios kijtowa iga ikia tajta̱gamej, siwa̱tkej wan chogotsitsin monechkowa̱yaj, a̱man ijko̱nsan no̱ nimonechkowaj. Ompa nikakij sekin tajta̱gamej yej ne̱nextiliáj kén maninemikan ken kijtowa tano̱no̱tsalis yej onoʼ pan Biblia (Deuteronomio 31:12; Nehemías 8:8). Nochi welij kitajto̱lkuepaj tajtanilis yej ompa mochi̱wa wan welij titakuikaj, wan ijkí̱n welij tikweymakaj wan tikweyichi̱waj Dios (Salmo 35:18).

Welij kichi̱wa iga matikpiakan ma̱j fe pan Dios. Pan itiempoj del apóstol Pablo kijkuilowilij iyikni̱wan: «Pux nimitsitasnekij [...] iga anmejeme̱n xine̱yo̱lketsakan wan anmofé wan nej manimitsyo̱lketsakan wan nofé» (Romanos 1:11, 12). Kua̱ nitajtowaj wan nokni̱wan ka̱n nimonechkowaj, ne̱pale̱wiáj iga manikpiakan ma̱j fe wan maninemikan ken Dios kineki.

¿Té íga ayá̱ tiá ka̱n nimonechkowaj iga xikita kén nikchi̱waj? Ompa pa̱kiskej iga xi-asi. Wan ayá̱ mitstajtaniliskej tomin iga xikalaki niga kua̱ tonos taijtiʼ.

• ¿Kén mochi̱wa tanechko̱lis?

• ¿Kén te̱pale̱wiá tanechko̱lismej?