Betel se̱ tajto̱l hebreo yej kijto̱sneki «Ikal Dios» (Génesis 28:17, 19, nota). Pux ye̱kti iga ijkí̱n mamoto̱ka̱wi iní̱n kajlimej yej kipiáj yej tajto̱lmoya̱waj de Jehová pan nochi ta̱jli. Pan iní̱n kajlimej kiyaka̱naj tajto̱lmoya̱walis wan te̱pale̱wiáj iga matikchi̱wakan. Comité yej Kiojkuiltiá yej Tajto̱lmoya̱waj de Jehová onoʼ Betel, pan a̱ltepe̱ʼ Nueva York (Estados Unidos) wan desde ompa kitaj ken nemi tekipanowaj pan seuʼmej kajlimej Betel yej onoʼ pan miak pai̱smej. Nochi tokni̱wan yej ompa tekipanowaj moi̱xmatij ken familiaj Betel. Ijko̱nsan ken se̱ familiaj, yejeme̱n sentakuaj, sencha̱ntitokej, sentekipanowaj wan mosenmachtiáj Biblia (Salmo 133:1).

Se̱ kajli kan nochimej motekitiliáj iga maye̱ʼtekipanokan. Pan nochi familia Betel tekipanowaj tajta̱gamej wan siwa̱tkej yej kipiáj miak fe pan Dios, yej ompa tekipanowaj motekitiliáj iga makichi̱wakan yej kineki Dios wan te̱pale̱wiáj iga matitajto̱lmoya̱wakan de Irreinoj Dios. (Mateo 6:33). Kimakajsan achi tomin iga makikowakan sekin tejté̱ wan kimakaj te̱ makikua̱kan, kan makochikan pero ayá̱ kitaniáj tomin. Nochimej kipiáj kan matekipano̱kan: sekin pan oficinas wan sekin kichi̱waj takual; seuʼmej pan la imprenta o kan kichi̱waj iga a̱matajkuilo̱l maki̱sa ken se̱ folleto o libro, sekin tapojpowaj, tapa̱kaj wan kiye̱ʼtaliáj iní̱n kajlimej wan seuʼmej kichi̱waj seuʼ tejté̱.

Se̱ kajli kan tekipanowaj iga wel matapale̱wikan iga seuʼmej maki̱xmatikan Irreinoj Dios. Pan Betel pux motekitiliáj iga ma̱j gente maki̱xmati yej kijtowa Itajto̱l Dios, inó̱n iga mochij iní̱n a̱matajkuilo̱l. Comité yej Kiojkuiltiá yej Tajto̱lmoya̱waj de Jehová kita’ kén mochij iní̱n a̱matajkuilo̱l wan kipano̱ltilij pan internet yej yawij kipatatij pan seuʼ tajto̱l, ini̱nmej equipos onokej pan nochi ta̱jli, wan pan miak pai̱smej moimprimiroj pan makinas yej imanin kiki̱xtiá a̱mamej wan de ompa kiti̱tan (o gojmagilij) ma̱j de ciento diez mil tanechko̱lismej. Pan nochi iní̱n tejté̱ yej kichijtokej, yej tekipanowaj pan Betel tapale̱wiáj iga mamochi̱wa se̱ tekipanol yej ma̱j ye̱kti: iga wel matitajto̱lmoya̱wakan de ye̱kti tajto̱lmej (Marcos 13:10).

• ¿A̱ʼ yéj tekipanowaj pan Betel, wan te̱ kimakaj yej ompa tekipanowaj?

• Iga nochi yej mochi̱wa pan cada Betel ¿te̱ tekipanol yej ma̱j ye̱kti wel mochi̱wa?