ATO liu a Iesu ke he lagi ne tala age a ia ke he tau tutaki haana: “To eke foki a mutolu mo tau talahau haku . . . ke hoko ni ke he fakaotiaga he lalolagi.” (Gahua 1:8) To maeke fēfē a lautolu ke fakamatala ke he lalolagi katoa?

Ko Martin Goodman ko e porofesa he Oxford University, ne pehē “ko e logonaaga ke he matafekau ne vevehe kehe e tau Kerisiano mai he falu matakau fakalotu, putoia e tau Iutaia he pule atu motu Roma fakamua.” Fano a Iesu he taha matakavi ke he taha matakavi ke fakamatala. Ne lata e tau Kerisiano mooli ke muitua ke he fakafifitakiaga haana mo e fakamatala e “vagahau mitaki he kautu he Atua” ke he tau matakavi oti. Lata ia lautolu ke kumi e tau tagata ne manako ke iloa e kupu mooli. (Luka 4:43) Kakano haia he senetenari fakamua, ne ha ha ai e “tau aposetolo” (NW), ko e tau kupu ne hagaao ki a lautolu ne fakafano ke taute e taha mena. (Mareko 3:14) Poaki e Iesu ke he tau tutaki haana: “Hanei, kia o atu a a mutolu ke eke e tau motu oti kana mo tutaki.”​—Mataio 28:18-20.

Ko e tau aposetolo toko 12 ha Iesu ne nakai ha ha ai he lalolagi, ka e tokologa e fekafekau ha Iehova kua muitua ke he fakafifitakiaga ha lautolu he gahua fakamatala. Mogo ka uiina a lautolu ke fakamatala ke he matakavi ne manako lahi ke he lagomatai, pehē a lautolu: “Ko au hanai, kia fakafano atu e koe au.” (Isaia 6:8) Falu tuga e totou afe ne kautū mai he Aoga Kiliata kua hiki ke he tau motu mamao. Falu kua hiki ke he taha matakavi he motu ni ha lautolu. Tokologa kua fakaako e vagahau foou ke lagomatai e fakapotopotoaga po ke matakau. Nakai mukamuka tumau ai, ka ko e tau matakainaga oti nei ne makai ke taute e tau foakiaga ke fakakite e  fakaalofa ha lautolu ma Iehova mo e tau tagata. Ti pulega fakamitaki a lautolu mo e fakaaoga ha lautolu a magaaho, malolō, mo e tupe ke lagomatai ke fakamatala he tau matakavi ne manako lahi ke he lagomatai. (Luka 14:28-30) Ko e mena ne taute he tau matakainaga nei kua uho lahi.

Nakai maeke a tautolu oti ke hiki ke he matakavi ne manako lahi ke he lagomatai po ke fakaako e vagahau foou. Ka e maeke a tautolu oti ke eke mo tau misionare he tau fakapotopotoaga ni ha tautolu.

He senetenari fakamua, ne makutu e tau Kerisiano he gahua fakamatala pete he laulahi ia lautolu ne nonofo ni he tau taone ha lautolu ti nakai ko e tau misionare foki. Tala age a Paulo ki a Timoteo: “Kia eke e gahua he tagata fakamatala vagahau mitaki, kia fakakatoatoa ni hāu a feua.” (2 Timoteo 4:5) Hagaao e tau kupu nei ke he tau Kerisiano fakamua, ti kua hagaao agaia ki a tautolu mogonei. Kua lata he tau Kerisiano oti ke omaoma ke he poaki ke fakamatala e fekau he Kautu mo e taute tutaki. Ti pihia ni ke he tau fakapotopotoaga ha tautolu, loga e puhala kua maeke a tautolu ke tuga e tau misionare.

Ma e fakatai, ka hiki e tau misionare ke he taha motu, kehekehe lahi e tau tuaga, ti lata ia lautolu ke kumi e tau puhala ke hikihiki ke he tau puhala foou he moui. Pete ka nakai maeke a tautolu ke hiki ke he matakavi ne manako lahi ke he lagomatai, maeke nakai a tautolu ke kumi e tau puhala foou ke fakamatala ke he tau tagata? Ma e fakatai he 1940, ne fakamalolō fakamua e tau matakainaga ke fakamatala he puhalatū taha e aho he tau faahi tapu takitaha. Kua fakatai nakai e koe e gahua fakamatala he puhalatū? Kua fakaaoga nakai e koe e tau peleō fakatātā he tau tohi? Ko e manatu, Kua makai nakai a koe ke fakatai e tau puhala foou he fakamatala e tala mitaki?

Ka moua e koe e aga mitaki, to makutu mo e hakahakau a koe ma e gahua fakamatala. Ko lautolu ne hiki ke he matakavi ne manako lahi ke he lagomatai po ke ne fakaako e vagahau foou ne fa mahani ko e tau tagata fakailoa lotomatala lahi ti kua eke mo lagomatai lahi ke he fakapotopotoaga. Ma e fakatai, ne takitaki e lautolu e gahua fakamatala. Fa mahani foki e tau misionare ke takitaki e fakapotopotoaga ato hokotia e tau matakainaga taane ke he lotomatala ke taute pihia. Kaeke ko e matakainaga taane papatiso a koe, kua “foli” nakai a koe, kakano  ai, makai nakai a koe ke fekafekau ke he tau matakainaga he fakapotopotoaga haau ko e fekafekau lagomatai po ke motua?​—1 Timoteo 3:1.

Maeke foki a tautolu ke lagomatai e fakapotopotoaga ha tautolu he falu puhala. Ko tautolu oti, fuata mo e momotua, tau matakainaga taane mo e fifine, ka eke “mo fakamafanatia” ke he tau matakainaga ne lata ke lagomatai.​—Kolose 4:11.

Ka manako a tautolu ke lagomatai e tau matakainaga ha tautolu, lata ia tautolu ke iloa mitaki a lautolu. Fakamafana he Tohi Tapu a tautolu ke “manatu foki a tautolu ko e taha ke he taha,” po ke manamanatu ke he tau manako he tau matakainaga ha tautolu ka fakalataha auloa a tautolu. (Heperu 10:24) Nakai kakano e mena nei kua lata ia tautolu ke lali ke iloa fakamatafeiga e tau momoui fakatagata he falu. Kakano ai kua lata ia tautolu ke lali ke maama ha tautolu a tau matakainaga mo e ha lautolu a tau manako. Liga lata a lautolu mo e lagomatai aoga, logonaaga mafanatia, po ke fakamalolōaga mai he Tohi Tapu. Mooli he falu tuaga ko e tau motua mo e tau fekafekau lagomatai ni kua maeke ke lagomatai a lautolu. (Kalatia 6:1) Ka e igatia a tautolu oti mo e maeke ke lagomatai e tau matakainaga momotua, po ke tau magafaoa katoa hane fehagai mo e tau lekua.

Moua e Salvatore e lagomataiaga pihia. Ha kua kelea lahi e tau lekua fakatupe, lata a ia ke sela e pisinisi, kaina, mo e tau koloa loga ne moua he magafaoa haana. Tupetupe lahi a ia hagaao ke he magafaoa haana. Taha e magafaoa he fakapotopotoaga ne kitia kua lata a lautolu mo e lagomatai. Fai tupe ne age e lautolu ki a Salvatore ti lagomatai a ia mo e hoana haana ke kumi e gahua. Loga foki e afiafi ne fakalataha a lautolu mo e magafaoa haana he fanogonogo ki a lautolu mo e fakamafana a lautolu. Ati eke a lautolu mo tau kapitiga mitaki lahi. Mogonei ko e tau magafaoa tokoua ne moua e tau manamanatuaga fiafia he fai magaaho auloa mo lautolu he mogo uka lahi ia.

Nakai fakauaua e tau Kerisiano mooli ke tala age e tau taofiaga ha lautolu ke he falu. Lata ia tautolu ke fifitaki ki a Iesu mo e tala age ke he tau tagata oti hagaao ke he tau maveheaga homo ue atu kua taute he Atua. He maeke po ke nakai maeke a tautolu ke hiki, maeke a tautolu oti ke eketaha fakalahi ke lagomatai e falu he tau fakapotopotoaga ni ha tautolu. (Kalatia 6:10) Ka foaki atu a tautolu ke he falu to fiafia a tautolu mo e “fua mai ai a [ta]utolu ke he tau gahua mitaki oti.”​—Kolose 1:10; Gahua 20:35.