Ka manako a koe ke iloa mitaki e taha tagata, kua aoga ke iloa e tau mena ne kua taute mo e tau mena uka ne fehagai a ia ki ai. Pihia foki, ka manako a koe ke iloa mitaki e Atua kua lata a koe ke fakaako ke he tau mena ne kua taute e ia. He fakaako, liga ofo a koe ke iloa e tau mena loga ne taute e ia fakamua ne aoga a tautolu mogonei mo e putoia e vahā anoiha ha tautolu.

Ko Iehova ko e Atua ko e Tufuga Mua Ue Atu mo e “hana tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke.” (Roma 1:20) “Ne eke ai e ia e lalolagi he hana malolo, ne fakatumau e ia e atu motu ke he hana iloilo, ne fofola foki e ia e lagi ke he hana pulotu.” (Ieremia 10:12) Fakakite foki he tau tufugatia ofoofogia e fiafia he Atua ki a tautolu.

Manamanatu ke he puhala ne fakamonuina e Iehova e tau momoui ha tautolu he tufugatia e tau tagata “ke he hana fakatai.” (Kenese 1:27) Kakano ai ne foaki e ia e magaaho ki a tautolu ke fakakite e tau mahani mua ue atu haana. Tufugatia e ia a tautolu ke maama e tau mena fakaagaaga, po ke maeke ke iloa e tau onoonoaga mo e tau mena kua mua ki a ia. He eketaha a tautolu ke momoui fakatatau ke he tau mena nei, kua moua e tautolu e fiafia lahi mo e fai kakano e moui. Ka e mua atu, foaki mai e ia e puhala ke feaki e fakafetuiaga mo ia.

Fakakite he tau tufugatia he lalolagi e logonaaga he Atua ki a tautolu. He tau kupu he aposetolo ko Paulo, ko e Atua “kua nakai toka noa ai e ia ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.” (Gahua 14:17) Foaki mai he Atua e tau mena loga ke maeke a tautolu ke momoui. Loga lahi ti kehekehe e tau tufugatia ke fiafia e tau momoui ha tautolu. Ko e vala ni anei he tau mena loga ue atu kua amanaki a ia ma tautolu.

 Tufugatia e Iehova e lalolagi ke momoui tukulagi e tau tagata i ai. Pehē e Tohi Tapu: “Tuku mai e ia e lalolagi ke he fanau he tau tagata,” ti “nakai eke noa ai e ia, ne eke e ia ke nonofo ai e tau tagata.” (Salamo 115:16; Isaia 45:18) Ko hai ka nonofo ai mo e fiha e leva? “To eke ni e motu ma e tau tagata tututonu, to nonofo muatua ai a lautolu.”​—Salamo 37:29.

Tufugatia e Iehova e tagata taane mo e fifine fakamua ko Atamu mo Eva, ti tuku a laua he lalolagi parataiso “ke gahua ai mo e leoleo ai.” (Kenese 2:8, 15) Age he Atua e kotofaaga ne fakalahi ua e fiafia: “Kia fanau a mo e fakatokologa, kia fakapuke foki e lalolagi, mo e kautu ki ai.” (Kenese 1:28) Ti moua e Atamu mo Eva e amaamanakiaga ke momoui tukulagi he lalolagi. Momoko ai, ne fifili a laua ke nakai omaoma ke he Atua ti galo e amaamanakiaga ke eke mo “tau tagata tututonu” ka “eke ni e motu” ma lautolu. Pete ia, to kitia e tautolu kua nakai la hiki e finagalo he Atua ma tautolu po ke lalolagi ha ko e tau gahua ha laua. Ka e fakamua, manamanatu ke he taha mena ne kua taute he Atua.

Ko e Tohi Tapu kua iloa foki ko e Kupu he Atua. Ko e ha ne foaki e Iehova e Tohi Tapu ki a tautolu? Ke maeke a tautolu ke fakaako hagaao ki a ia. (Tau Fakatai 2:1-5) Mooli ai, nakai tali he Tohi Tapu e tau hūhū takitaha ha tautolu hagaao ke he Atua​—nakai fai tohi kua maeke. (Fakamatalaaga 3:11) Ka ko e tau mena oti i loto he Tohi Tapu kua lagomatai a tautolu ke iloa e Atua. Kitia e tautolu ko hai a ia he puhala ne fehagai a ia mo e tau tagata. Iloa e tautolu e vahega tagata ne fiafia mo e nakai fiafia a ia ki ai. (Salamo 15:1-5) Fakaako a tautolu ke he onoonoaga haana ke he tapuakiaga, mahani, mo e tau koloa he tino. Foaki mai foki he Tohi Tapu e fakamaamaaga maaliali ke he aga ha Iehova ha ko e tau kupu mo e tau gahua he haana Tama ko Iesu Keriso.​—Ioane 14:9.

Taha kakano ati foaki mai e Iehova e haana Kupu ko e Tohi Tapu, ke maeke a tautolu ke iloa e puhala ke fiafia mo e fai kakano e moui. Kua fakakite mai e Iehova he Tohi Tapu e puhala ke fiafia e magafaoa, ke loto fakaaue, mo e ke fehagai mo e tupetupe. To fai vala ka fakamaama he mekasini nei, kua ha ha he Tohi Tapu e tau tali ke he tau hūhū aoga lahi he moui: Ko e ha ne lahi e matematekelea? To fēfē e vahā anoiha? Fakamaama foki e tau mena ne kua taute he Atua ke fakamooli e finagalo haana he kamataaga.

Ko e tohi ofoofogia mooli e Tohi Tapu he Atua ke he tau puhala loga foki. Liga 1,600 e tau tau ne tohi ai he kavi 40 e tagata taane, ka e taha ni e matakupu pauaki ha ko e Atua ne Tohia mooli ai. (2 Timoteo 3:16) Nakai tatai mo e falu tohi i tuai, kua tumau e tonutika ke he loga e tau tau ti fakamooli mai he loga e tau tohi fakamau tuai he Tohi Tapu. Mua atu ai, kua kautū e Tohi Tapu ke he tau laliaga ke ua fakaliliu, tufatufa, mo e totou. He vahā nei ko e Tohi Tapu kua lahi e tufatufa mo e fakaliliu. Ha kua tumau agaia e Tohi Tapu, ko e fakamooliaga a ia “ko e kupu he Atua ha tautolu, kua tumau ia tukulagi ni.”​—Isaia 40:8.

Ko e taha gahua foki he Atua ko e foakiaga pauaki ne taute ke fakamooli e finagalo haana ma tautolu. Totoku he vala tala i mua, na finagalo e Atua ke momoui tukulagi e tau tagata he lalolagi. Ka e fifili a Atamu ke nakai omaoma ke he Atua ti agahala ai mo e galo e amaamanakiaga haana mo e tau fanau ke moui tukulagi. “He hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Ko e agahala ha Atamu ko e totoko ke he finagalo he Atua. Fēfē e tali ha Iehova?

Ko e tau gahua ha Iehova kua lautatai mo e aga haana. Fakahala e ia a Atamu mo Eva ha ko e tau gahua ha laua, ka e fai foakiaga fakaalofa a ia ma e tau fanau ha laua anoiha. Kua pulotu a Iehova ti fifili e ia e puhala ke fehagai ke he totokoaga mo e talahau agataha e tali. (Kenese 3:15) Ko e agahala mo e mate to utakehe he Tama he Atua ko Iesu Keriso. Ko e heigoa ne putoia ai?

Ke laveaki mai e tau tagata kua lauia he totoko ha Atamu, fakafano mai e Iehova a Iesu ke he lalolagi ke fakaako e tau tagata ke moua e moui mo e “foaki  atu foki hana moui mo lukutoto ke hukui aki e tau tagata tokologa.” a (Mataio 20:28; Ioane 14:6) Maeke a Iesu ke foaki e lukutoto ha ko e tagata mitaki katoatoa a ia ke tuga a Atamu. Ka e kehe mai ia Atamu, ne omaoma katoatoa tumau a Iesu ti hoko ke he mate. Ha kua nakai lata a Iesu ke mate, ne fakaliu tu mai e Iehova a ia ke moui he lagi. Maeke a Iesu mogonei ke taute e mena ne kaumahala a Atamu ke taute​—ko e foaki ke he tau tagata omaoma e amaamanakiaga ke moui tukulagi. “Ha ko e mena, tuga he uta mo tau tagata hala e tokologa ha ko e liuliu he tokotaha, to uta pihia foki mo tau tagata tututonu e tokologa ha ko e omaoma he tokotaha.” (Roma 5:19) Ko e poa lukutoto ha Iesu ati maeke e Atua ke fakamooli e maveheaga haana ke moui tukulagi e tau tagata he lalolagi.

Lahi e iloaaga ha tautolu ki a Iehova he puhala ne fehagai a ia mo e tau totokoaga he nakai omaoma ha Atamu. Iloa e tautolu to nakai fakaai ha mena ke taofi a Iehova he fakakatoatoa e gahua haana ne kamata; ko e kupu haana “to monuina foki.” (Isaia 55:11) Fakaaue foki a tautolu ke he lahi ue atu he fakaalofa ha Iehova ma tautolu. “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto [ma e] tau hala ha tautolu.”​—1 Ioane 4:9, 10.

Ko e Atua ne “nakai toka hana ni a Tama, ka e tuku mai a ia ke hukui aki a tautolu oti kana,” ti mauokafua a tautolu to “foaki noa mai e ia kia tautolu e tau mena oti kana” ne mavehe e ia. (Roma 8:32) Ko e heigoa ne mavehe he Atua ke taute ma tautolu? Totou atu foki.