MANAMANATU ko e Kerisiano a koe ne moui he senetenari fakamua. Ko e moua laia he fakapotopotoaga ha mutolu e tohi mai he aposetolo ko Paulo. He fanogonogo a koe he totou mai e tohi, ne mailoga e koe kua lagaloga e fatiaki mai a Paulo he “tau Tohi Tapu,” ko e tau Tohiaga Tapu Heperu a ia. (2 Timoteo 3:15) ‘Manako lahi au ke kitia e tau kupu ne fatiaki mai e ia,’ he manatu hifo e koe. Ka e liga nakai mukamuka e mena ia. Ko e ha?

Manamanatu la, na fēfē e tau tohi fakamau tuai he “tau Tohi Tapu” ne moua he vahā ha Paulo. Kua fakakite i lalo e taha tohi pihia​—ko e taha vala he tohi ha Isaia mai he tau Tohi Vakai he Tahi Mate. Ko e heigoa haau ne kitia? Ko e tau matatohi ni! Nakai fai fakaila po ke tau fakamailoga pihia. Ai fai numera e tau veveheaga mo e tau kupu, tuga ne fakaaoga e tautolu he magaaho nei.

Ne nakai vevehe he tau tagata tohia Tohi Tapu e fekau ha lautolu ke he tau veveheaga po ke tau kupu. Ko e ha lautolu ni ke tohi hifo e fekau katoa ne age he Atua, ke maeke he tau tagata totou ke maama e fekau katoa ia, ka e nakai ko e tau vala ikiiki ni. Manako pihia nakai a koe ka moua e tohi uho mai he tagata ne ofania e koe? Kua totou e koe e tohi katoa, nakai totou ni he falu vala.

Ka kua fai lekua he nakai fai veveheaga po ke tau faahi kupu. Ne maeke ni a Paulo ke fakakite e tau kupu ne fatiaki e ia he talahau “tuga he tohi mai” po ke “tuga foki he tala mai tuai e Isaia.” (Roma 3:10; 9:29) Ti uka mooli ke moua e tau kupu nei ne fatiaki, ka e to moua ni he tagata ne iloa lahi e “tau Tohi Tapu” oti.

Lafi ki ai, ko e tau “Tohi Tapu” ia ne nakai taha ni e fekau mukamuka mai he Atua. He matahiku he senetenari fakamua V.N., kua fakaputuputu e tau tohi ne putoia ai e 66 e tohi kehekehe! Ko e mena haia ne laulahi he tau tagata totou Tohi Tapu mogonei, ne fiafia he fakanumera e tau veveheaga mo e tau kupu, ke lagomatai a lautolu ke moua e tau vala tala pauaki, tuga e tau kupu loga ne fatiaki he tau tohi ha Paulo.

Liga hūhū a koe, ‘ti ko hai ne tuku e tau veveheaga mo e fakanumera e tau kupu he Tohi Tapu?’

Ko e akoako Igilani ko Stephen Langton, ne eke a ia he mogo fakamui mo Pisopo ne Mua ha Canterbury, kua talahaua he tuku e tau veveheaga ke he Tohi Tapu. Taute e ia e mena nei he kamataaga he senetenari ke 13 aki V.N., he faiaoga a ia ke he University of Paris i Falani.

Ato hoko ke he vahā ha Langton, kua fitā e tau tagata pulotu he lali ke he tau puhala loga ke tuku e Tohi Tapu ke he tau vala ikiiki po ke tau veveheaga, ne liga taute pauaki ke fakaaoga mo kumikumi. Liga manamanatu a koe to mukamuka lahi ke moua e lautolu e tau kupu he kumi ni he taha e veveheaga, ka e nakai ke he tohi katoa, tuga e tohi ha Isaia ne 66 e veveheaga.

Ka e fai lekua agaia e tau puhala ia. Ne loga e tau fakatokaaga kehekehe mo e nakai lautatai ne taute he tau tagata iloilo. He taha tohi, ne vevehe e Evagelia ha Mareko ke he kavi 50 e veveheaga, nakai 16 tuga ha tautolu mogonei. I Paris he magahala ha Langton, ne tokologa e tau tagata fakaako ne o mai he tau motu kehekehe, ti tamai e lautolu e tau Tohi Tapu he tau  motu ni ha lautolu. Ti kua nakai maeke e tau faiaoga mo e tau tagata fakaako ke moua e tau kupu ka kumi. Ko e ha? Kakano ha kua nakai fetataiaki e tau veveheaga i loto he tau tohi fakamau tuai ha lautolu.

Ti taute e Langton e puhala foou ma e tau veveheaga. Ko e puhala nei haana ne “loto e tau tagata totou mo e tau tohikupu ki ai,” he talahau he The Book​—A History of the Bible, ti “holofa lahi ki Europa katoa.” Ne fakanumera e ia e tau veveheaga ne moua e tautolu ke he laulahi he tau Tohi Tapu he vahā nei.

Kavi 300 tau he mole, lotoga he senetenari 16, ko e pulotu talahaua he lolomi tohi ko Robert Estienne mai i Falani ne taute fakamukamuka atu foki. Ko e haana foliaga ke fakaholo ki mua e fakaako ke he Tohi Tapu. Mailoga e ia e aoga ke fetataiaki e fakanumera he tau veveheaga mo e fakanumera he tau kupu.

Nakai ko Estienne e tagata fakamua ne vevehe e tau tohi he Tohi Tapu ke he tau kupu. Kua fitā he taute pihia he falu. He tau senetenari fakamua atu, ko e tau tohikupu Iutaia, ma e fakatai, ne vehevehe e Tohi Tapu Heperu katoa, po ke vala he Tohi Tapu ne mahani mau ke fakahigoa Ko e Maveheaga Tuai, ke he tau kupu ka e nakai ke he tau veveheaga. Pihia foki, he tuku e tau veveheaga, kua nakai fetataiaki e tau puhala.

Ne vehevehe e Estienne e Tau Tohiaga Tapu Heleni Kerisiano, po ke fakahigoa Ko e Maveheaga Fou, ke he puhala foou he fakanumera e tau kupu mo e tuku auloa mo e tau kupu kua fitā i loto he Tohi Tapu Heperu. He 1553, ne lolomi e ia e Tohi Tapu katoa fakamua (he fufuta faka-Falani) ti tatai mo e tau veveheaga mo e tau kupu ne fakaaoga he laulahi he tau Tohi Tapu mogonei. Ko e falu tagata ne tuhituhi mo e pehē ko e fakanumera he tau kupu tohi kua vehevehe e Tohi Tapu, ti tuga ko e tau vala tala takitaha ne kua nakai matutaki mitaki. Ka kua mafiti e falu matakau lolomi tohi ke fakaaoga e puhala haana.

Ko e fakatokaaga mukamuka he fakanumera e tau veveheaga mo e tau kupu. Ti maeke he tau kupu he Tohi Tapu ke moua e “tuaga”​—tuga ko e numera pauaki. Mooli, ko e fakanumera he tau veveheaga mo e tau kupu tohi kua nakai omoomoi he agaaga he Atua, ti fa vevehe e tau talahauaga he Tohi Tapu he falu mena ne nakai lata. Ka e fakamukamuka ma tautolu ke moua e tau kupu ne fatiaki, mo e ke fakamailoga po ke fakakite e tau kupu takitaha ne fai kakano uho ki a tautolu​—tuga ni ka fakamailoga e tautolu e tau talahauaga po ke tau kupu, ne manako pauaki a tautolu ke manatu i loto he tohi po ke pepa.

Pete he fakamukamuka he tau veveheaga mo e tau kupu, kua mua atu ke moua e uho manatu he tala katoa​—ke maama e fekau katoa ne foaki mai he Atua. Fakamahani ke totou e tohi katoa ka e nakai ko e falu kupu hokoia ni. He taute pihia ka lagomatai a koe ke mahani mo e iloa mitaki e “tau Tohi Tapu, kua maeke ke fakailoilo a koe ke moua ai e moui.”​—2 Timoteo 3:15.