Gahuahua Fefe e Agaga he Atua he Vaha Nei?
Gahuahua Fefe e Agaga he Atua he Vaha Nei?
KUA kulikuli a ia tali mai he manava he hana matua fifine. He tau aho oti, kua nofo a ia he gutuhala he faituga ne ui ko e Fulufuluola ke ole mena fakaalofa ki a lautolu ne huhu atu ke he faituga. Ka e he taha magaaho, ne moua he tagata kulikuli nofogati nei e mena fakaalofa ne kua mahomo atu ke he tau tupe ikiiki. Kua fakamalolo a ia!—Gahua 3:2-8.
Pete ni ko e tau aposetolo ko Peteru mo Ioane ne “fakamatike a ia” ati “malolo ai agataha hana tau hui,” ne nakai talia a laua ke fakamatalahi. Ko e ha ne nakai ai? Ne fakamaama mai e Peteru: “Ko e tau tagata Isaraela na e, ko e ha ne ofo ai a mutolu ke he tagata nai? ko e ha foki ne mataono mai ai a mutolu kia maua, kua tuga ne mana ha maua mo e mahani Atua ha maua kua fano ai a ia.” Maali ai, kua mailoga e Peteru mo Ioane ko e, nakai ha ko e malolo ha laua, ka ko e agaga tapu he Atua ne taute ai e tau mena ia.—Gahua 3:7-16; 4:29-31.
He magaaho ia, ko e “tau mena kehekehe” pihia kua taute ai ke fakakite kua ha ha he fakapotopotoaga Kerisiano fou e papaleaga he Atua. (Heperu 2:4) Ka e he mole e kakano ne taute ai e tau mena ia, ti ‘fakaotioti ai,’ he talahau he aposetolo ko Paulo. (1 Korinito 13:8) Ko e mena ia ne kua nakai kitia e tautolu mogonei he fakapotopotoaga Kerisiano moli ha fakamaloloaga mai he Atua, tau fekau fakaperofeta, po ke vega he tau temoni.
Kua pehe mogoia kia e mena nei, kua nakai tuai liu gahuahua e agaga tapu he Atua? Mamao mai he mena ia! Kia onoono atu a tautolu ke he falu puhala ne gahuahua ai e agaga he Atua he senetenari ke fakamua aki mo e hane gahuahua he vaha ha tautolu.
“Ko e Agaga ke Tupu e Kupu Moli”
Ko e taha matagahua he agaga tapu he Atua ko e fakailoa, ke fakamaama fakaagaga, ke fakakite e kupu moli. Nakai leva ato matulei a ia, ne tala age a Iesu ke he hana tau tutaki: “Loga gaia e tau mena ia au ke tala atu e au kia mutolu, ka kua nakai maeke ke talia e mutolu ke he vaha nai. Ka haele mai a ia, ko e Agaga ke tupu ai e kupu moli haia, ti takitaki e ia a mutolu ke he tau kupu moli oti.”—Ioane 16:12, 13.
“Ko e agaga ke tupu e kupu moli” kua liligi hifo he Penetekoso 33 V.N. he magaaho ne fakapotopoto e 120 he tau tutaki ke he poko i luga i Ierusalema ati papatiso he agaga tapu. (Gahua 2:1-4) Ko e aposetolo ko Peteru foki ne haia mo lautolu ma e galue ia he tau. Kua puke he agaga tapu, ne “tu ai” a Peteru mo e fakalaulahi atu, po ke fakamaama, falu kupu moli hagaao ki a Iesu. Ne talahau e ia, ke fakatai ki ai, e puhala ne “kua fakatokoluga a [‘Iesu ko e Nasareta ke’] he lima matau he Atua.” (Gahua 2:14, 22, 33) Ne omoi foki he agaga he Atua a Peteru ke fakamatala fakamalolo ke he tau tagata fanogonogo Iutaia hana: “Kia iloa māli he faoa oti ni a Isaraela, ko Iesu ia ni ne fakasatauro e mutolu, kua eke he Atua a ia mo Iki mo e Keriso.” (Gahua 2:36) Ti ko e fua he matafekau omoi agaga ha Peteru, ne kavi ke tolu e afe tagata ne “talia hana kupu mo e fiafia” mo e papatiso ai. He puhala nei, ne lagomatai he agaga tapu he Atua ke takitaki a lautolu ke he kupu moli.—Gahua 2:37-41.
Kua eke foki e agaga tapu he Atua mo faiaoga mo e fakamanatuaga. Ne talahau e Iesu: “Ko e Lagomatai, ko e Agaga Tapu haia, ko ia ke fakafano mai he Matua ke he haku a higoa, to fakaako e ia a mutolu ke he tau mena oti kana; to fakamanatu foki e ia kia mutolu e tau mena oti kua tala atu ai e au kia mutolu.”—Ioane 14:26.
Puhala fe ne gahuahua e agaga tapu ke tuga e faiaoga? Ne hafagi he agaga he Atua e tau manamanatuaga he tau tutaki ke he tau mena kua logona fakamua mai ia Iesu ka kua nakai maama katoatoa. Ke fakatai ki ai, ne iloa he tau aposetolo Ioane 18:36; Gahua 1:6) Kitia maali ai, kua nakai la maama katoatoa he tau aposetolo e kakano he tau kupu a Iesu ato mole e liligiaga he agaga tapu he Atua he Penetekoso 33 V.N.
ko e magahala he hana kamatamata, ne tala age a Iesu ke he kavana Roma, ko Ponotio Pilato: “Nakai ko e kautu he lalolagi nai haku a kautu.” Ka ko e magaaho ne haele hake a Iesu ke he lagi he molea 40 aho, ne ha ha agaia he tau aposetolo e maamaaga hehe to fakatu e Kautu he lalolagi nei. (Kua eke foki e agaga he Atua mo fakamanatuaga he liuaki ke he tau manamanatuaga e tau fakaakoaga kehekehe a Iesu. Ko e tau perofetaaga hagaao ke he matulei mo e liu fakatu mai a Keriso, ke tuga ia, kua moua e kakano fou ha ko e lagomatai he agaga tapu. (Mataio 16:21; Ioane 12:16) Ko e liu manatu e tau fakaakoaga a Iesu ne fakamalolo aki e tau aposetolo ke lalago e tuaga ha lautolu ki mua he tau patuiki, tau hopo fakafili, mo e tau takitaki lotu.—Mareko 13:9-11; Gahua 4:5-20.
Lafi ki ai, ne lagomatai he agaga tapu he Atua ke takitaki e tau Kerisiano fakamua atu ke he tau matakavi fua mitaki he fekafekauaga. (Gahua 16:6-10) Ne omoi foki he agaga he Atua e tau Kerisiano fakamua atu ke fakalataha ke he tohiaaga he Kupu he Atua, ko e Tohi Tapu, ma e aoga he tau tagata oti kana. (2 Timoteo 3:16) Maali ai, mogoia, nukua gahuahua e agaga tapu ke he tau puhala kehekehe he senetenari ke fakamua aki. Kua nakai foaki mai hokoia ke taute e tau mana.
‘To Eke a Mutolu mo Tau Talahau Haku’
Ne fakakite foki e Iesu taha fakakiteaga he agaga tapu he Atua he magaaho ne tala age a ia ke he tau tutaki hana: “To moua e mutolu e malolo, ka haele hifo e Agaga Tapu ki luga ia mutolu; to eke foki a mutolu mo tau talahau haku . . . ke hoko ni ke he fakaotiaga he lalolagi.” (Gahua 1:8) Ko e maveheaga a Iesu ke foaki e “malolo” mo e “Agaga Tapu” ke he tau tutaki hana ke maeke ke taute e tau gahua ne kotofa he Atua ha lautolu kua gahuahua agaia he vaha nei.
Ko e matakau, kua talahaua lahi e Tau Fakamoli a Iehova ha ko e tau gahua fakamatala ha lautolu. Moli, kua vagahau he Tau Fakamoli a Iehova e fekau he kupu moli ke molea e 230 e motu mo e tau atu motu. I lalo he tau tuaga oti kua mailoga, fakalataha mo e fakahagahaga kelea e tau momoui ha lautolu he tau kavi felakutaki, ne fakamalolo a lautolu ke fakalahi e tau leo ha lautolu he lalago e Kautu he Atua. Ko e fakamakutukutu ha lautolu ma e fekafekauaga Kerisiano kua foaki e fakamoliaga malolo lahi kua hane gahuahua e agaga tapu he vaha nei. Ti kua nakai taumaleku ko Iehova ko e Atua hane fakamonuina e tau laliaga ha lautolu.
He tau kua mole, ke fakatai ki ai, kua molea lahi e taha piliona he tau matahola ne fakaaoga ke fakamatala e kupu mitaki he Kautu he Atua. Ti ko e heigoa e fua? Kua fakamailoga he tau tagata ne 323,439 e tukuleleaga ha lautolu ke he Atua he foaki ni e lautolu a lautolu ke papatiso he vai. Ke lafi ki ai, kua takitaki fakafahitapu ke 4,433,884 e tau fakaakoaga Tohi Tapu he tau kaina mo lautolu ne fiafia fou mai. Ke he tau mena oti, kua 24,607,741 he tau tohi, 631,162,309 he tau mekasini, mo e 63,495,728 he tau porosua mo e tau tama tohi ikiiki ne kua tufa. Ko e fakamoliaga malolo ha ia ke he gahuahuaaga he agaga he Atua!
Agaga he Atua mo Koe
He magaaho ka talia fiafia he tagata e kupu mitaki, fakapiki hana moui ke he tau tutuaga he Atua, mo e fakakite e tua hana ke he foakiaga he lukutoto, kua hafagi ai e puhala ma e tuaga mea ke he Atua. Kia lautolu pihia ne pehe e aposetolo ko Paulo: ‘Kua foaki mai he Atua hana Agaga Tapu kia mutolu.’—1 Tesalonia 4:7, 8; 1 Korinito 6:9-11.
He moua e agaga he Atua ka fua mai e tau monuinaaga loga. Tau monuina fefe? Taha mena, ne talahau e Kupu omoi agaga he Atua: “Ko e fua he Agaga ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” (Kalatia 5:22, 23) Ko e mena ia, ko e agaga tapu he Atua ko e malolo ne mua ma e mitaki, kua taute e tagata ke fakakite e tau fua he mahani Atua.
Ke lafi ki ai, kaeke totou e koe e Tohi Tapu mo e fakagahuahua e mena ne ako e koe, maeke he agaga he Atua ke lagomatai a koe ke tupu hake he pulotu, iloilo, lotomatala, fifili, mo e manamanatu mitaki. Ne moua he Patuiki ko Solomona e “iloilo mo e pulotu lahi mahaki ni, mo e loto ke hoko ke he tau mena loga” ha kua eketaha a ia ke fakafiafia e Atua nakai ko e tau tagata. (1 Tau Patuiki 4:29) Ha kua foaki e Iehova hana agaga tapu ki a Solomona, moli ni to nakai lamakai e ia hana agaga tapu mai ia lautolu ne kumi ke fakafiafia a ia he vaha nei.
Ne lagomatai foki he agaga tapu he Atua e tau Kerisiano ke tau ki a Satani mo e tau temoni, ke he fakatokaaga kelea nei, mo e tau hagahaga hala he tau tino agahala ha lautolu. Maeke fefe e mena ia? Ne tali he aposetolo ko Paulo: “Kua maeke ia au e tau mena oti kana ke he fakamalolo mai a Keriso kia au.” (Filipi 4:13) Liga kua nakai utakehe he agaga tapu e tau matematekelea mo e tau kamatamataaga; pete ia, kua maeke ke lagomatai a tautolu ke fakauka ki ai. He falanaki ke he agaga he Atua, maeke ia tautolu ke moua e “lahi ue atu he malolo” ke fakafehagai ke he ha lekua po ke fakaatukehe.—2 Korinito 4:7; 1 Korinito 10:13.
He magaaho ka kitia e koe e tau fakamoliaga oti, to temotemoai e tuaha kua hane gahuahua e agaga tapu he Atua he vaha nei. Ne fakamalolo he agaga a Iehova hana tau fekafekau ke fakamatala hagaao ke he tau finagalo ne mua hana. Kua tumau ai ke fakakikila e maama fakaagaga, mo e puipui e tua ha tautolu, lagomatai a tautolu ke tumau e mahani fakamoli ke he Tufuga ha tautolu. Kua fakaaue ha tautolu ha kua fakamoli tumau e Atua ke he hana maveheaga he foaki e agaga tapu ke he tau fekafekau hana he vaha nei!
[Tau Fakatino he lau 9]
Kua fakaako fakaagaga he agaga tapu he Atua a tautolu,
. . . tanaki e tau fua Kerisiano mitaki,
. . . mo e lagomatai a tautolu he gahua fakamatala ke he lalolagi katoa