Lahi Fefe e Fakaalofa Hau?

“Kia fakaalofa atu a koe kia ia ne katofia a mua, kia tuga foki na koe kia koe.”—MATAIO 22:39.

1. Ka fakaalofa a tautolu ki a Iehova, kua lata foki he ha ia tautolu ke fakaalofa ke he katofia ha tautolu?

HE HUHU ki a Iesu ha fe e poakiaga ne mua atu, ne tali a ia: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” Ti fatiaki e ia e poakiaga ke ua aki, tatai ke he poakiaga fakamua: “Kia fakaalofa atu a koe kia ia ne katofia a mua, kia tuga foki na koe kia koe.” (Mataio 22:37, 39) E, ko e fakaalofa ke he katofia ko e fakamailoga he Kerisiano. Moli, ka fakaalofa a tautolu ki a Iehova, kua lata ia tautolu ke fakaalofa ke he katofia ha tautolu. Ko e ha? Ha kua fakakite e tautolu ha tautolu a fakaalofa ke he Atua he omaoma hana Kupu, ti poaki mai hana Kupu ki a tautolu ke fakaalofa ke he katofia ha tautolu. Ti, ka nakai fakaalofa a tautolu ke he tau matakainaga ha tautolu, kua nakai moli e fakaalofa ha tautolu ke he Atua.—Roma 13:8; 1 Ioane 2:5; 4:20, 21.

2. Ko e heigoa e fakaalofa kua lata ke moua e tautolu ma e katofia ha tautolu?

² He pehe a Iesu kua lata ia tautolu ke fakaalofa ke he katofia ha tautolu, ne tutala a ia nakai ni ke he fekapitigaaki. Ti hagaao a ia ke he fakaalofa kua kehe mai he vahaloto he tau magafaoa po ke vahaloto he tagata tane mo e fifine. Kua vagahau a ia ke he fakaalofa kua ha ha ia Iehova ma e hana tau fekafekau tukulele mo e fakaalofa ha lautolu ma hana. (Ioane 17:26; 1 Ioane 4:11, 19) Ko e tohikupu Iutaia—ne mailoga e Iesu, ke tutala fakailoilo—ne talia mo Iesu ko e fakaalofa ke he Atua kua lata “mo e loto katoa, mo e manatu katoa, mo e agaga katoa, mo e malolo katoa.” (Mareko 12:28-34) Hako a ia. Ko e fakaalofa kua feaki he Kerisiano ma e Atua mo e katofia kua putoia e tau logonaaga mo e maamaaga ha tautolu. Kua logona ai ke he loto mo e kua takitaki he manamanatuaga.

3. (a) Fakaako fefe e Iesu e “taha ako fakatufono” kua lata ia ia ke lahi atu e kitekiteaga ko hai hana katofia? (e) Fakaaoga fefe e fakataiaga ha Iesu ke he tau Kerisiano he vaha nei?

³ He fakamau e Luka, he magaaho ne talahau e Iesu kua lata ia tautolu ke fakaalofa ke he katofia ha tautolu, ne huhu e “taha ako fakatufono”: “Ko hai kia e tagata ne katofia mo au?” Ne tali e Iesu aki e fakatai. Ko e tagata nukua fahi, fofo, mo e toka ke teitei mate he kauhala. Kua hifo fakamua e ekepoa ti ko e tagata Levi. Nakai fakahela tokoua a laua ki a ia. Ka e hifo fakahiku e tagata Samaria, ne kitia e ia e tagata kafokia, mo e fakakite e fakaalofa hofihofi ki a ia. Ha fe mai ia lautolu tokotolu e katofia he tagata kafokia? Kua maaliali e tali. (Luka 10:25-37) Kua liga ofo e taha ako fakatufono ke logona a Iesu he talahau ko e tagata Samaria ko e katofia mitaki mai he ekepoa mo e tagata Levi. Maali ai, ne lagomatai e Iesu e tagata tane ia ke fakaalofa ke he hana katofia ke he puhala lahi atu. Kia fakaalofa foki e tau Kerisiano ke he puhala pihia. Kitekite la ki a lautolu kua tokiofa e fakaalofa.

Fakaalofa i Loto he Magafaoa

4. I fe mua ka fakagahuahua he Kerisiano e fakaalofa?

⁴ Kua fakaalofa e tau Kerisiano ke he tau tagata he magafaoa ha lautolu—fakaalofa e tau hoana ke he tau tane, fakaalofa e tau tane ke he tau hoana, fakaalofa e tau matua ke he tau fanau. (Fakamatalaaga 9:9; Efeso 5:33; Tito 2:4) Moli, ko e pipiaga pauaki he fakaalofa kua kitia ke he laulahi he tau magafaoa. Pete ia, ko e tau hokotaki he tau fakamauaga mavehevehe, fakakelea e hoa mau, mo e tiaki po ke fakakelea e tau fanau kua fakakite e tupetupe he tau magafaoa he vaha nei, ti liga nakai lahi e tau logonaaga pauaki he magafaoa ke pipi fakalataha ai. (2 Timoteo 3:1-3) Ke kautu moli e moui magafaoa ha lautolu, kua lata e tau Kerisiano ke fakagahuahua e fakaalofa ne moua e Iehova mo Iesu.—Efeso 5:21-27.

5. Kia hai ka kumi lagomatai e tau mamatua ma e lagomatai he feaki e tau fanau ha lautolu, ti ko e heigoa e tau fua kua moua he tokologa?

⁵ Kua onoono e tau mamatua Kerisiano ke he tau fanau ha lautolu ko e koloa mai ia Iehova, ti kumi lagomatai atu a lautolu ki a ia ke feaki a lautolu. (Salamo  127:3-5; Tau Fakatai 22:6) He puhala nei kua feaki e lautolu e fakaalofa Kerisiano, nukua lagomatai a lautolu ke puipui ha lautolu a fanau mai he tau fakaohoohoaga kolokolovao ne mokulu ki ai e tau fanau fuata. Ko e fua, tokologa e tau mamatua Kerisiano ne olioli tuga e matua fifine i Netelani. He mole e mamata ke he papatisoaga he tama tane hana—ko e taha he 575 ne papatiso i Netelani he tau kua mole—ne tohi e ia: “He magaaho nei, kua totogi mitaki e tau fakauka haku he 20 e tau tau kua mole. Ko e tau magaaho oti mo e malolo—pihia mo e mamahi, laliaga, mo e momoko—kua galo tuai mogonei.” Ko e fiafia ha ia hana kua fifili ni he tama tane, mai he loto ni hana, ke fekafekau ki a Iehova. Ko e tapunu he 31,089 he tau tagata fakailoa ne hokotaki i Netelani he tau kua mole kua lauia ai e tokologa ne ako mai he tau mamatua ha lautolu ke fakaalofa ki a Iehova.

6. Maeke fefe e fakaalofa faka-Kerisiano ke lagomatai ke fakamalolo e pipiaga he fakamauaga?

⁶ Ne ui e Paulo e fakaalofa “ko e pipi haia ke fakamaopoopo ai,” ti maeke ke fakahao e pipiaga he fakamauaga pete ni he tau magaaho uka. (Kolose 3:14, 18, 19; 1 Peteru 3:1-7) He magaaho ne fakaako Tohi Tapu ai e tagata tane i Rurutu mo e Tau Fakamoli a Iehova, ko e aelani tote ne 700 e kilomita mai i Tahiti, ne totoko malolo e hoana hana. Fakahiku ai, ne uta e ia e fanau, tiaki a ia, mo e o nonofo i Tahiti. Ne fakakite agaia e ia e fakaalofa he fakafano tupe tumau mo e hea telefoni atu ke huhu ko e fai mena nakai ne manako a ia po ke fanau ki ai. Ti fakamalolo a ia ke fakamoli hana tau kotofaaga faka-Kerisiano. (1 Timoteo 5:8) Ne liogi tumau a ia ke liu e magafaoa hana ke fakalataha foki, ti fakahiku ai ne liu mai hana hoana. He liu mai hana hoana, ne taute atu e ia “mo e fakaalofa, mo e fakauka, mo e mahani molu” ki ai. (1 Timoteo 6:11) He 1998, ne papatiso a ia mo e nakai leva ne olioli lahi a ia he talia he hoana hana ke fakaako e Tohi Tapu. Ko e fakaakoaga ia ko e taha he 1,351 ne taute he matakavi i lalo hifo he la ha Tahiti he tau kua mole.

7. Hagaao ke he tagata tane i Sihamani, ko e heigoa ne fakamalolo aki e fakamauaga hana?

⁷ I Sihamani ko e tagata tane ne totoko e fiafia he hana hoana ke he kupu moli he Tohi Tapu mo e talitonu kua manako e Tau Fakamoli a Iehova ke fakavaia a ia. Nakai leva, ti tohi a ia ke he Fakamoli ne fina atu fakamua ke kitia e hoana hana: “Fakaaue he fakafeleveia e hoana haku ke he Tau Fakamoli a Iehova. Fakamua, ne tupetupe au he logona e tau mena kelea loga hagaao ki a lautolu. Ka ko e mogonei, he fina atu mo e hoana haku ke he tau feleveiaaga, ne mailoga e au kua hepe au. Ne iloa e au kua logona e au e kupu moli, ti kua taute e fakamauaga ha maua ke malolo lahi.” Ko e 162,932 he Tau Fakamoli a Iehova i Sihamani—mo e 1,773 he tau aelani he la Tahiti—putoia ai e tau magafaoa tokologa ne pipi ke he fakaalofa mahani Atua.

Fakaalofa ma e Tau Matakainaga Kerisiano ha Tautolu

8, 9. (a) Ko hai ne fakaako a tautolu ke fakaalofa ke he tau matakainaga ha tautolu, ti ko e heigoa he fakaalofa kua omoi a tautolu ke taute? (e) Foaki e fakafifitakiaga kua maeke he fakaalofa ke lagomatai e tau matakainaga ke fefakamafanaaki.

⁸ Tala age a Paulo ke he tau Kerisiano Tesalonia: “Ha kua ako tuai a mutolu he Atua he feofanaki.” (1 Tesalonia 4:9) E, kua feofanaki a lautolu ne “fakaako e Iehova.” (Isaia 54:13) Kua fakakite e fakaalofa ha lautolu ke he gahua, tuga ne fakakite e Paulo he magaaho ne talahau e ia: “Kia fekafekau a mutolu ko e taha kia taha ke he fakaalofa.” (Kalatia 5:13; 1 Ioane 3:18) Ko e mena anei ne taute e lautolu, ma e fakatai, ka ahi atu a lautolu ke he tau matakainaga gagao, fakamafana a lautolu kua tupetupe, mo e lagomatai a lautolu kua lolelole. (1 Tesalonia 5:14) Ko e fakaalofa faka-Kerisiano moli ha tautolu kua lafi ke he tupuaga he parataiso fakaagaga ha tautolu.

⁹ He fakapotopotoaga Ancón—taha he 544 he tau fakapotopotoaga i Ekuatoa—ne fakakite he tau matakainaga e fakaalofa ha lautolu ke he puhala aoga. Ko e tomo fakatupe ati nakai fai gahua po ke fai tupe a lautolu, ti fifili ai e tau tagata fakailoa ke tuli tupe he fakafua e tau mena kai ke he tau tagata futi ika he maaga ka liliu mai a lautolu ki kaina he hi po. Kua kau fakalataha e tau tagata oti pihia mo e tau fanau. Ne kamata a lautolu he matahola 1:00 a.m. ke tauteute e tau mena kai ke moho he matahola 4:00 a.m. ka liliu mai e tau tagata futi ika. Ko e tupe ne tutuli e lautolu kua maeke ke tufatufa he vahaloto ni ha lautolu fakatatau ke he tau tutuaga ha lautolu. Kua fakatata he lagomatai mafanatia pihia e fakaalofa Kerisiano moli.

10, 11. Fakakite fefe e tautolu e fakaalofa ma e tau matakainaga ne nakai iloa mitaki e tautolu?

¹⁰ Pete ia, nakai fakakaupa e fakaalofa ha tautolu ke he tau Kerisiano hokoia kua iloa mitaki e tautolu. Ne pehe e aposetolo ko Peteru: ‘Kia fakaalofa ke he tau matakainaga oti kana.’ (1 Peteru 2:17) Fakaalofa a tautolu ke he tau matakainaga oti  kana ha tautolu ha ko lautolu ko e tau matakainaga tapuaki ha Iehova ko e Atua. Ko e tau magaaho matematekelea kua fakakite e magaaho ke fakatata e fakaalofa nei. Ma e fakatai, ke he tau he fekafekauaga 2000, ne hoko e tau fakapuke kelea lahi i Mosamipiki, mo e felakutaki fakamatakau i Anakola ati hiku nonofogati e tokologa. Ko e numera lahi he tau matakainaga toko 31,725 i Mosamipiki mo e 41,222 i Anakola ne lauia ke he tau mena tutupu nei. Ti, ko e Tau Fakamoli ne tata atu ki Aferika Toga ne fakafano atu e tau koloa loga ke tuku hifo aki e tupetupe he tau matakainaga ha lautolu he tau motu ia. Ko e makai ha lautolu ke foaki e “muhumena” ha lautolu ke he tau matakainaga nonofogati ne fakatata e fakaalofa ha lautolu.—2 Korinito 8:8, 13-15, 24.

¹¹ Kitia foki e fakaalofa, ka lagomatai atu he tau matakainaga he tau motu loga e talagaaga he tau Fale he Kautu mo e tau Fale Fono he tau motu nakai monuina. Ma e fakatai ke he Tau Aelani i Solomona. Pete ne nakai fai mafola, ne kitia ai ko e 6 e pasene ne malitiki he tau tagata fakailoa he tau kua mole, mo e tapunu ke 1,697 mai he Tau Aelani i Solomona. Ne pulega a lautolu ke talaga e Fale Fono. Pete he tokologa ne toka e motu, ko e tau tagata lagomatai noa ne o mai i Ausetalia ke lagomatai e talagaaga. Fakahiku ai, kua amaamanaki e tau tagata lagomatai noa ke liliu, ka e nakai liliu ato fakamahani e lautolu e tau matakainaga ke fakakatoatoa e matapatu fale. Ko e talagaaga he tau lapatoa he fale ne ta mai he toga i Ausetalia, mo e fakakatoatoaaga he fale mitaki nei ma e tapuakiaga—he magaaho ia ne loga e tau fale talaga kua tunoa—to foaki ai e fakamatala mitaki ke he higoa a Iehova mo e ke he fakaalofa he tau matakainaga.

Tuga e Atua, Fakaalofa a Tautolu ke he Lalolagi

12. Fifitaki fefe e tautolu a Iehova ke he tau aga ha tautolu ki a lautolu ne nakai tua?

¹² Fakakaupa ni kia e fakaalofa ha tautolu ke he magafaoa ni ha tautolu mo e tau matakainaga ha tautolu? Nakai, ai pihia kaeke kua “fifitaki a [ta]utolu ke he Atua.” Ne pehe a Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Efeso 5:1; Ioane 3:16) Tuga a Iehova ko e Atua, kia fakaalofa atu a tautolu ke he tau tagata oti kana—pihia mo lautolu ne nakai ha ha he tua mo tautolu. (Luka 6:35, 36; Kalatia 6:10) Mahomo atu ke he mena nei, fakamatala e tautolu e tala mitaki he Kautu mo e tala age ke he falu e fakaalofa hofihofi he Atua ne taute ke lata mo lautolu. Kua fua mai e mena nei he fakamouiaga ke he ha tagata kua fanogonogo.—Mareko 13:10; 1 Timoteo 4:16.

13, 14. Ko e heigoa falu mena iloa he tau matakainaga ne fakakite e fakaalofa ke he tau tagata nakai ko e Tau Fakamoli, pete he hoko ke he tau matematekelea lahi fakatagata?

¹³ Kitekite la ke he fa e paionia pauaki i Nepali. Ne kotofa a lautolu nei ke he taone he fahi uta ki toga he motu, mo e he lima e tau kua mole, ne fakakite e lautolu ha lautolu a fakaalofa he fakamatala fakauka he taone mo e tau maaga tua. Ke oti e matakavi ha lautolu, ne fa fenoga a lautolu ke loga he tau tula he tau pasikala taholi he vela pakutoa ke 40°C. Ko e fakaalofa ha lautolu mo e “tumau ke he tau gahua mitaki” ne moua mai e tau fua mitaki he fakatu e matakau fakaako tohi he taha maaga. (Roma 2:7) Ia Mati 2000, toko 32 e tagata ne o mai ke logona e lauga ma e tau tagata he leveki he takaiaga. Ko e tapunu ha Nepali ko e 430 e tau tagata fakailoa he tau kua mole—ko e holo ki mua he 9 e pasene. Kua fakamonuina moli e Iehova e fakamakai mo e fakaalofa he tau matakainaga he motu ia.

¹⁴ Ha ha i ai i Kolomopia e tau paionia pauaki fakaku ne o ke fakamatala ke he tau India-Wayuu. Ke taute e mena nei, kua lata ke ako e lautolu e vagahau fou, ka ko e manako fiafia ha lautolu ne palepale he magaaho ne toko 27 a lautolu ne o atu ke he lauga, pete ne to lipilipi e uha. Ko e fakamakai fakaalofa pihia kua fakakite he tau paionia nei ne lafi ke he 5 e pasene ne malikiti i Kolomopia mo e tapunu he tau tagata fakailoa ke 107,613. I Tenemaka, ne manako e matakainaga motua fifine ke fakamatala e tala mitaki mo e falu, ka e kulikuli a ia. Fakamalolo ai, ne matutaki atu a ia ke he tau tagata fiafia he tohitohi. He magaaho nei, ne tohitohi a ia ke he tau tagata toko 42 mo e taute 11 e fakaakoaga Tohi Tapu. Ko ia taha he tapunu he tau tagata fakailoa 14,885 ne hokotaki i Tenemaka he tau kua mole.

Fakaalofa ke he Tau Fi Hau

15, 16. (a) Laulahi atu fefe e fakaalofa ne talahau e Iesu kua lata ke ha ha ia tautolu? (e) Fehagai fefe e tau matakainaga tane kua lata ke he puhala fakaalofa mo lautolu ne talahau fatipiko ke he Tau Fakamoli a Iehova?

¹⁵ Ne tala age a Iesu ke he taha ako fakatufono to eke e tagata Samaria mo katofia. He hana Lauga he  Mouga, ne matutaki atu foki a Iesu, he pehe a ia: “Kua fanogonogo a mutolu kua talahau mai, Kia fakaalofa atu a koe ke he tagata ne katofia mo koe, ka kia fakavihia e tagata kua fai fi kia koe. Ka e tala atu e au kia mutolu, kia fakaalofa atu a mutolu kia lautolu kua fai fi kia mutolu, kia fakamonuina atu e mutolu kia lautolu ne kaialu mai kia mutolu, kia totonu atu a mutolu, kia lautolu fakavihia a mutolu; kia liogi foki a mutolu ma lautolu ne tukumale mai mo e favale mai kia mutolu. Kia eke ai a mutolu mo fanau he Matua ha mutolu ha he lagi.” (Mataio 5:43-45) Pete foki ka totoko he taha tagata a tautolu, lali a tautolu ke “mahala e kelea ke he mitaki.” (Roma 12:19-21) Ka maeke, kia folafola e tautolu mo ia e koloa uho ha tautolu, ko e kupu moli.

¹⁶ I Ukaraine ko e vala tala he nusipepa Kremenchuk Herald ne talahau ko e Tau Fakamoli a Iehova ko e vahega lotu hagahaga kelea. Kua hagahaga kelea lahi e mena nei ha kua vagahau falu i Europa hagaao ke he Tau Fakamoli a Iehova ke he puhala nei ke maeke ke omoomoi e tau tagata nukua lata e tau matagahua he Tau Fakamoli ke fakakaupa po ke fakamotuhia. Ati fina atu ai ke he etitoa mo e ole ke lomi e vala tala ke fakahako aki. Ne talia e ia, ka ko e magaaho ne moua e tohi, ne lomi e ia e talahauaga ko e tala moli e vala tala fakamua. Ti liliu atu e tau matakainaga tane kua lata ki a ia mo e falu vala tala foki. Fakahiku, ne mailoga he etitoa kua hepe e vala tala fakamua, ti lomi e ia e manatu fakamolemole. He fehagai fakahako mo e totonu mo ia ko e puhala fakaalofa ke taute aki e tuaga nei, ti takitaki ai ke he fua mitaki.

Feaki Fefe e Tautolu e Fakaalofa?

17. Ko e heigoa kua fakakite kua liga nakai mukamuka tumau ke taute e fakaalofa ke he falu?

¹⁷ Ka fanau e tama mukemuke, ne mafiti e tau mamatua ke fakaalofa ki a ia. Ko e fehagai fakaalofa mo e tau fuata ko e mena nakai mukamuka tumau. Liga ko e kakano haia ne fatiaki mau mai he Tohi Tapu ki a tautolu ke feofanaki—ko e mena ke gahua a tautolu ki ai. (1 Peteru 1:22; 4:8; 1 Ioane 3:11) Ne iloa e Iesu to kamatamata e fakaalofa ha tautolu he pehe a ia kua lata ia tautolu ke fakamagalo e tau matakainaga ha tautolu “laga fitugofulu kua taki fitu.” (Mataio 18:21, 22) Ne fakamafana foki a Paulo ki a tautolu ke “fefakaukaaki a mutolu.” (Kolose 3:12, 13) Ko e mena ia ne tala mai ki a tautolu: “Kumi fakamakutu e . . . fakaalofa”! (1 Korinito 14:1) Taute fefe e tautolu e mena nei?

18. Ko e heigoa ka lagomatai a tautolu ke feaki e fakaalofa ke he falu?

¹⁸ Fakamua, kia tokaloto tumau e tautolu e fakaalofa ha tautolu ma Iehova ko e Atua. Ko e omoomoiaga malolo e fakaalofa nei ke fakaalofa  ke he katofia ha tautolu. Ko e ha? Ha ko e mena ka taute pihia e tautolu, kua fakakite fakamitaki he mena nei e Matua ha tautolu he lagi mo e ta mai e lilifu mo e fakahekeaga ki a ia. (Ioane 15:8-10; Filipi 1:9-11) Ua aki, lali a tautolu ke kitia e tau mena he puhala ne kitia e Iehova. He tau magaaho oti ka agahala a tautolu, kua agahala a tautolu ki a Iehova; ka e he tau magaaho oti kua fakamagalo e ia a tautolu mo e fakatumau ke fakaalofa ki a tautolu. (Salamo 86:5; 103:2, 3; 1 Ioane 1:9; 4:18) Ka feaki e tautolu e kitekiteaga a Iehova, to fakatapakupaku a tautolu ke fakaalofa ke he falu mo e fakamagalo e tau hehe ha lautolu ki a tautolu. (Mataio 6:12) Tolu aki, fakafehagai a tautolu mo e falu ke he puhala kua manako a tautolu ki a lautolu ke fehagai mo tautolu. (Mataio 7:12) Ko e tau tagata nakai mitaki katoatoa a tautolu, kua lata a tautolu mo e fakamagaloaga. Ma e fakatai, ka vagahau e tautolu e tau mena kua fakamamahi aki e falu, amanaki a tautolu to manatu e lautolu kua hala e alelo he tau tagata oti ke he falu magaaho. (Iakopo 3:2) Ka manako a tautolu ke he falu ke fehagai fakaalofa mo tautolu, kua lata a tautolu ke fehagai fakaalofa mo lautolu.

19. Kumi fefe e tautolu e lagomatai he agaga tapu ke feaki e fakaalofa?

¹⁹ Fa aki, kumi e tautolu e lagomatai he agaga tapu ha ko e fakaalofa ko e vala he fua he agaga. (Kalatia 5:22, 23) Tau fekapitigaaki, tau logonaaga he magafaoa, mo e fakaalofa fakavihiloto kua fa kitia mau. Ka e lata a tautolu mo e lagomatai he agaga a Iehova ke feaki e fakaalofa kua ha ha ia Iehova, ko e fakaalofa a ia ko e pipiaga he fakalatahaaga. Kumi e tautolu e lagomatai he agaga tapu he totou e Tohi Tapu omoomoi he agaga. Ma e fakatai, ka fakaako e tautolu e moui ha Iesu, to kitia e tautolu e puhala ne fehagai a ia mo e tau tagata, ti ako a tautolu ke fifitaki a ia. (Ioane 13:34, 35; 15:12) Lafi ki ai, ole a tautolu ki a Iehova ma e agaga tapu, mua atu ke he tau tuaga kua uka ia tautolu ke fakakite e puhala fakaalofa. (Luka 11:13) Fakahiku ai, moua e tautolu e fakaalofa he nonofo fakatata ke he fakapotopotoaga Kerisiano. He fakalataha mo e tau matakainaga fakahele ka lagomatai a tautolu ke feaki e fakaalofa.—Tau Fakatai 13:20.

20, 21. Ko e heigoa e fakatataaga mua ue atu he fakaalofa ne taute he Tau Fakamoli a Iehova he tau he fekafekauaga 2000?

²⁰ He tau kua mole, ko e tapunu he tau tagata fakailoa he tala mitaki he lalolagi katoa ko e 6,035,564. Ne fakaaoga he Tau Fakamoli a Iehova 1,171,270,425 e katoatoa he tau tula ke kumi e tau tagata ke tala age ki ai e tala mitaki. Ko e fakaalofa ne taute a lautolu ke fakauka ke he la, uha, mo e makalili he taute e lautolu e gahua nei. Ko e fakaalofa ne omoi a lautolu ke tutala ke he tau fanau aoga mo e tau kapitiga gahua mo e ke tutala ke he tau tagata kehe he tau puhala tu mo e ke he falu matakavi foki. Tokologa ne ahi atu e Tau Fakamoli ki ai nukua fakaheu, falu ne totoko. Pete ia, fai ne fakakite e fiafia, ati moua ai 433,454,049 e tau aahi atu, mo e 4,766,631 e tau fakaakoaga Tohi Tapu. *

²¹ Ko e fakatataaga ha ia he tau mena oti nei he fakaalofa he Tau Fakamoli a Iehova, ma e Atua ha lautolu mo e katofia ha lautolu! Ko e fakaalofa ia to nakai makalili ai. Mauokafua a tautolu ko e tau he fekafekauaga 2001 ka kitia e fakamatalaaga lahi atu ka foaki ke he tau tagata. Kia fakatumau e fakamonuina a Iehova mo e hana tau tagata tapuaki fakamoli mo e fakamakai he “eke . . . e tau mena oti ha mutolu mo e fakaalofa”!—1 Korinito 16:14.

[Matahui Tala]

Maeke Nakai a Koe ke Fakamaama?

• Ko hai ka fifitaki a tautolu ki ai ka fakaalofa a tautolu ke he katofia ha tautolu?

• Kua lata e fakaalofa ha tautolu ke lahi fefe?

• Ko e heigoa falu mena tutupu ne fakatata aki e fakaalofa faka-Kerisiano?

• Feaki fefe e tautolu e fakaalofa faka-Kerisiano?

[Tau Huhu he Fakaakoaga]

 [Fakafonua he lau 28-31]

HOKOTAKI HE FEKAFEKAUAGA HE TAU HE 2000 HE TAU FAKAMOLI A IEHOVA HE LALOLAGI OTI

 (Kikite pega volume)

[Tau Fakatino he lau 27]

Omoi he fakaalofa a tautolu ke folafola e amaamanakiaga ha tautolu mo e falu