Fakaaoga Nakai e Koe “e Tau Aho he Mouiaga Nai”?

NE TOMATOMA he aposetolo ko Paulo e tau Kerisiano he senetenari fakamuaaki i Efeso: “Kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia fakaaoga e mutolu e tau aho he mouiaga nai, ha kua kelea e tau aho ainei.” (Efeso 5:15, 16) Ko e ha ne aoga lahi e tomatoma nei? Ko e tali he huhu ia kua lata mo e fai iloaaga he tau tuaga ne fehagai ai e tau Kerisiano he maaga i tuai ia.

Kua talahaua a Efeso he hana muhukoloa mahaki, tau mahani feuaki kelea muitui, holifono hololoa, mo e tau gahua fakatemoni kehekehe. Lafi atu, ne taufetului e tau Kerisiano i ai mo e taofiaga hagaao ke he tau aho. He nakai tuanaki e tau Heleni nakai-Kerisiano i Efeso na holo hakotia e fanoaga he tau aho. Nukua fakaako tuai he tau pulotu Heleni a lautolu na liu maeke e moui ke tu mai lagaloga. Ti ka moumou he tagata e tau aho hana he mouiaga nei kua maeke ke liu moua ai he tau aho ka hau. Ko e tau faga manamanatuaga pehenai ne maeke ke fakamalaga e tau Kerisiano i Efeso ke onoono fakateaga ke he tau fakatokatokaaga tuai a Iehova, pihia mo e hana tau aho ne kotofa ma e fakafiliaga faka-Atua. Koenaia, kua lauia lahi e tomatomaaga a Paulo he ‘fakaaoga e tau aho he mouiaga nai.’

Nakai vagahau noa a Paulo hagaao ke he tau aho. Ko e kupu Heleni ne fakaaoga e ia ne mailoga ke he tau aho ne kotofa tuai, ko e tau aho ma e finagalo fakatoka pauaki. Ne tomatoma e Paulo e tau Kerisiano he senetenari fakamuaaki ke fakaaoga fakamitaki e tau aho he mouiaga nai, po ke vaha kua mitaki, ne ha ha ia lautolu he magaaho nei, neke hoko mai e fakahikuaga ati liuaki e fakaalofa hohofi noa he Atua mo e foakiaga he fakamouiaga.—Roma 13:11-13; 1 Tesalonia 5:6-11.

Tatai foki ha tautolu a nonofoaga ke fakaaoga e tau aho he mouiaga nai. Kia nakai moumou e vaha uho kua mitaki nei ke tutuli e tau mena fakafiafia fakaku kua foaki he lalolagi, ka e kia fakailoilo e tau Kerisiano ke fakaaoga e tau aho ne toe ki a lautolu ke taute “e tau mahani Atua” mo e fakamalolo e fakafetuiaga ha lautolu mo e Tufuga, ko Iehova ko e Atua.—2 Peteru 3:11; Salamo 73:28; Filipi 1:10.