Lagomatai e Tau Takape Mai he Tau Kamatamata ha Lautolu

KO E taha he tau tala mahuiga hagaao ke he tau takape ko e fakamauaga he Tohi Tapu ki a Ruta mo e matua fugavai hana, ko Naumi. Ko e tau takape fifine tokoua a laua. Ne nakai ni galo e Naumi hana tane ka e pihia foki mo e tau tama tane tokoua hana, ko e taha ne tane e Ruta. Ha kua nonofo a laua he tau fahi fonua nukua falanaki lahi ke he tau tagata tane, kua uka lahi moli e tuaga ha laua.—Ruta 1:1-5, 20, 21.

Pete ia, ne ha ha ia Naumi e kapitiga mo e tagata fakamafana mitaki lahi ko e figona hana ko Ruta, ne matauka ke toka a ia. Fai magaaho, ne eke moli a Ruta ke ‘mua he mitaki [ki a Naumi] ke he tau tama tane ne tokofitu’—nakai ni he fakaalofa hokulo hana ki a Naumi ka e pihia foki he fakaalofa hana ke he Atua. (Ruta 4:15) He fakamafana a Naumi ki a Ruta ke liu ke he magafaoa mo e tau kapitiga Moapi hana, ne tali atu a Ruta ko e taha he tau talahauaga mafanatia he mahani fakamoli ne fakamau laia fakamua: “Ko e mena ke fano a koe ki ai, to fano ai ni au, ko e mena ke nofo ai a koe to nofo ai au, to eke e motu hau mo motu haku, to eke e Atua hau mo  Atua haku. Ko e mena ke mate ai a koe, to mate ai au, ti tanu ai au ke he mena ia; kia eke pihia e Iehova kia au, mo e lafilafi e ia ki ai. Kaeke ke vevehe kehe a taua mo koe ato vevehe he mate.”—Ruta 1:16, 17.

Ne nakai galo e Iehova ko e Atua e aga ha Ruta. Ne fakamonuina e ia e magafaoa tote ha Naumi mo Ruta, ti fakahiku mau e Ruta e tagata Isaraela ko Poasa. Ko e tama ha laua, ne eke mo tupuna ha Iesu Keriso, kua leveki e Naumi ke tuga ni ko e hana a ia. Ko e fakamauaga tala nei ko e fakataiaga he puhala kua tokiofa e Iehova e tau takape kua fakatata ki a ia mo e falanaki ki a ia. Kua talahau foki he Tohi Tapu ki a tautolu e uho ha lautolu kua lagomatai fakaalofa e tau takape ke he ha lautolu a tau kamatamata. Ti maeke fefe a tautolu he vaha nei ke lalago e tau takape ne fakalataha mo tautolu?—Ruta 4:13, 16-22; Salamo 68:5.

Lautonu ka e Nakai Mamafa

Ka foaki e lagomataiaga ke he takape, kua mitaki ke mahino mo e lautonu ka e nakai mamafa. Ua taute e tau talahauaga tuga nai, “Fakailoa mai ki a au ka manako a koe ke he ha mena ni.” Kua tatai e mena ia mo e pehe, “Kia mafanatia, mo e makona” ke he tagata kua makalili mo e hoge ka e nakai fai mena ne taute ke lagomatai aki. (Iakopo 2:16) Tokologa e tau tagata ka nakai ole lagomatai a lautolu kaeke ke manako a lautolu ki ai; ati mamahi fakatekiteki ni a lautolu. Ke lagomatai a lautolu ia kua lata mo e fakailoilo, he kumikumi e tau manako ha lautolu. He taha fahi, ke fakailoilo lahi—he pule katoatoa ke he moui he takape—ka liga takitaki ke he tau logonaaga mamahi po ke taufetoko. Ko e mena ia, kua peehi he Tohi Tapu e lata ma e lagotatai he tau fehagai ha tautolu mo e falu. He fakamalolo a tautolu ke nakai manamanatu fulukovi ke he tau mena he falu tagata, kua fakamanatu mai ki a tautolu nakai ke ahiahi teao.—Filipi 2:4; 1 Peteru 4:15.

Ne fakatata e Ruta e aga lagotatai pihia ki a Naumi. He tapiki mau fakamoli ke he matua fugavai hana, ne nakai fakamakamaka po ke pule a Ruta ki a ia. Ne fakailoilo mitaki a ia, he moua e mena kai ma Naumi mo ia, ka e muitua foki a ia ke he tau fakaakoaga ha Naumi.—Ruta 2:2, 22, 23; 3:1-6.

Moli, kua kehekehe oti e tau manako he tau tagata. Ko Sandra nukua totoku fakamua, kua pehe: “Kua moua e au e mena kua manako au he fakaatukehe haku—ko e tau kapitiga fakahele mo e fakaalofa nukua agaagai ia au.” Ko Elaine, nukua totoku fakamua, he taha fahi, kua manako ni ke nofo tokotaha. Ti ko e lagomatai, mogoia, kua kakano ke fakailoilo mo e lagotatai he fakalilifu e nofo tokotaha hana mo e ataina ke lagomatai ka lata.

Lagomatai he Magafaoa

Ko e magafaoa fakaalofa mo e mafanatia, kaeke ke fai, kua lahi e mena nukua taute ke fakamalolo e takape to maeke ia ia ke fahia. Pete ni he liga maeke he falu tagata he magafaoa ke foaki fakalahi e lagomatai mai he falu, kua lata oti ke limalima auloa. “Kaeke foki ha ha he taha fifine takape e tau tama hana po ke fanau he tama hana, kia ako e lautolu ke fakamua e mahani mitaki ke he tau faoa ha lautolu, mo e taui atu ke he tau matua ha lautolu; ha ko e mena mitaki ia mo e fakafiafia ke he Atua.”—1 Timoteo 5:4.

Ke he laulahi he tau magaaho, ko e lagomatai fakatupe po ke “totogiaga” kua liga nakai lata. Kua fai tupe e falu takape ke leveki aki a lautolu, mo e falu kua moua e tupe lagomatai, nukua fakagofua ke he falu motu. Ka manako lagomatai e tau takape, kua lata he tau tagata he magafaoa ke lagomatai. Ka nakai fai magafaoa tata e takape ke foaki e lagomatai po ke nakai  maeke he tau magafaoa ke lagomatai, kua fakamalolo he tau Tohiaga Tapu e tau tagata talitonu ke lagomatai a ia: “Ko e hanai e oma ke he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea.”—Iakopo 1:27.

Ko lautolu ne fakagahua e tau matapatu fakaakoaga nei he Tohi Tapu ‘kua fakalilifu [moli] e tau takape.’ (1 Timoteo 5:3) Ke fakalilifu e tagata, kua kakano, ke fakatata e fakalilifu ki a ia. Ko e tau tagata kua fakakite ki ai e fakalilifu kua logona hifo e uho, tokiofa, mo e lilifu. Nakai logona hifo e lautolu kua lagomatai e falu kakano ni ha ko e kotofaaga. Pete ne fai magaaho a Ruta he takape a ia, ne fakalilifu moli e ia a Naumi he matakaki fakamakai mo e fakaalofa ke he levekiaga he tau manako fakatino mo e tau logonaaga ha Naumi. Moli ai, ne mafiti e aga ha Ruta ke moua e ia e talahaua mitaki, ke maeke he tane hana anoiha ke talahau hagaao ki a ia: “Kua iloa he maga oti he haku motu, ko e fifine mahani mitaki ni a koe.” (Ruta 3:11, matahui tala, NW) He magaaho taha, ko e fakaalofa ha Naumi ma e Atua, ko e mahani fakatokolalo pauaki hana, mo e loto fakaaue lahi hana ma e tau laliaga ha Ruta ki a ia kua nakai fakauaua ko e fiafia ha Ruta ke lagomatai a ia. Ko e fakafifitakiaga mitaki ha ia a Naumi ke he tau takape he vaha nei!

Fakatata ke he Atua

Nakai maeke moli he tau tagata he magafaoa mo e tau kapitiga ke fakapuke e galo kehe he mate he hoa. Ma e kakano nei, kua aoga ma e tagata maanu ke fakatata lahi ke he ‘Matua he fakaalofa hofihofi, ko e Atua foki hana e tau fakamafanaaga oti, ko ia kua fakamafana mai a tautolu ke he ha tautolu a tau matematekelea.’ (2 Korinito 1:3, 4) Manamanatu ke he fakafifitakiaga ha Ana, ko e takape fakamoli ne 84 e tau tau he moui he magaaho ne fanau a Iesu.

He mate e tane ha Ana he mole laia e fitu e tau he mau a laua, ne fuluhi atu a ia ki a Iehova ma e fakamafanaaga. “Ti nakai fano kehe a ia he faituga, ka e fekafekau a ia, ha ne fakakanopogi mo e liogi ke he aho mo e po.” (Luka 2:36, 37) Ti tali atu nakai a Iehova ke he mahani Atua ha Ana? E! Ne fakakite e ia e fakaalofa ki a Ana ke he puhala uho lahi he fakaata a ia ke kitia e tama mukemuke ka tupu hake ke eke mo Fakamoui he lalolagi. Ko e fiafia mo e mafanatia ha ia he mena nei ki a Ana! Mahino ai, ne moua e ia e moli he Salamo 37:4: “Kia fiafia a koe kia Iehova, ti foaki mai ai e ia kia koe e tau mena kua manako ki ai hāu a loto.”

Gahuahua e Atua Puhala he Tau Matakainaga Kerisiano

Ne pehe a Elaine: “Kua leva tuai e mate ha David, ne ha ha ia au e mamahi fakatino, tuga kua hoka aki e titipi e kahokaho haku. Manatu au ko e uka e taviliaga he tino. He kelea lahi mahaki he taha aho ti manatu au kua lata ke kitia e ekekafo. Ko e matakainaga fifine mo e kapitiga loto fakailoilo fakaagaga ne fakamafana na liga ko e maanu haku e lagaaga, ti fakamafana ai au ke ole ki a Iehova ma e lagomatai mo e fakamafanatia. Ne fakamafiti au ke taute e lagomatai hana ti liogi fakatekiteki mai he loto, he ole ki a Iehova ke fakamalolo au he maanu haku. Ti taute pihia e ia!” Ne kamata a Elaine ke laukauka, ti nakai leva ti galo e mamahi fakatino hana.

Maeke he tau motua he fakapotopotoaga ke mahomo atu e fakakapitiga totonu ke he tau takape maanu. He foaki tumau e tau lagomatai mo e mafanatia fakaagaga ke he puhala fakailoilo mo e manamanatu, maeke he tau motua ke lagomatai a lautolu ke nonofo fakatata ki a Iehova pete ne tau kamatamata ha lautolu. Kaeke kua lata, maeke foki he tau motua ke lagomatai he fakatoka ke foaki e koloa fakatino. Ko e tau motua fakaalofa hofihofi mo e fakailoilo pihia kua eke moli mo “fakamumuliaga mai he matagi.”—Isaia 32:2; Gahua 6:1-3.

Mafanatia Tukulagi he Patuiki Fou he Lalolagi

Ko ia ne olioli e fuakau ko Ana ke kitia he ua e afe tau kua mole kua eke tuai mogonei mo Patuiki faka-Mesia he Kautu he Atua he lagi. Ko e fakatufono nei to nakai leva ti utakehe e tau fakatupuaga oti he mamahi, pihia mo e mate. Ke he mena nei, kua talahau he Fakakiteaga 21:3, 4: “Kitiala, kua fakalataha mo e tau tagata e fale uta fano he Atua . . . To holoholo kehe he  Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” Mailoga nakai e koe kua hagaao e vala tala nei ke he “tau tagata”? E, to tokanoa mai e tau tagata he mate mo e tau maanu mo e tagi.

Ka e fai tala mitaki foki! Kua mavehe mai foki he Tohi Tapu e liu tu mai ma lautolu ne mamate. “Ko e mena hoko ke he aho ke logona ai ke he hana [Iesu] leo a lautolu katoa ha he tau tukuaga, mo e o mai ai.” (Ioane 5:28, 29) Tuga ni a Lasalo, ne fakatu mai e Iesu he mate, to tutu mai a lautolu ko e tau tagata, nakai ko e tau mena momoui fakaagaga. (Ioane 11:43, 44) Ko lautolu he magaaho fakamui ka “taute e tau mahani mitaki” ka ta mai ke he mitaki katoatoa he tagata mo e moua e levekiaga fakamatua ha Iehova he ‘fakamafola e ia hana a lima, mo e fakamakona e manako he tau mena momoui oti.’—Salamo 145:16.

Ko lautolu ne galo e fakahelehele he mate mo e tua ke he amaamanakiaga moli nei kua eke ai mo punaaga mafanatia lahi. (1 Tesalonia 4:13) Kaeke ko koe ko e takape, kia makai he “liogi nakai noa,” ma e mafanatia mo e lagomatai kua lata ma hau he tau aho takitaha ke fua e tau kavega kehekehe hau. (1 Tesalonia 5:17; 1 Peteru 5:7) Ti fakaata taha magaaho he tau aho takitaha ke totou e Kupu he Atua ke maeke he tau manatu he Atua ke fakamafana a koe. Ka taute e koe e tau mena nei, to kitia ai e koe e puhala, pete ne tau kamatamata mo e tau paleko oti kua fehagai e koe ko e takape, maeke moli ia Iehova ke lagomatai a koe ke moua e mafola.

[Blurb he lau 5]

Ke foaki e lagomatai kua kakano ke lagotatai he fakalilifu e nofo tokotaha he falu mo e foaki e lagomatai ka lata

[Fakatino he lau 7]

Ne fakamonuina he Atua e takape fuakau ko Ana