Taufetului Kia a Koe mo e Tau Logonaaga Hau?

KE HE tau tau moui hana, kua taufetului a Lena he tau logonaaga fakateaga hagaao ki a ia ni. “He ekefakakelea ke he mahani fakatane mo e fifine he vaha tote hana ne moumou e fakalilifu fakatagata haku,” he talahau e ia. “Ne logona hifo e au kua nakai fai aoga au.” Ne liu a Simone manatu ke he vaha fuata hana mo e pehe, “Kua gatigati a loto haku ti talitonu kua nakai fai aoga au.” Ko e nakai fiafia moli ne fua mai he tau logonaaga pihia kua tuga e holofa fano he vaha nei. Taha e laini telefoni fakatonutonu ma e tau fuata mui ne pehe teitei hafa a lautolu ne vilo atu ne pehe “ko e tau logonaaga tumau he tokolalo e aoga fakatagata.”

Hagaao ke he falu pulotu, ko e tau logonaaga he nakai lata ne tutupu ka taute he falu e tau tagata ke logona hifo e fakateaga. Ko e tuaga pihia he manamanatuaga kua feaki ka fakaata tumau e ia a ia ke he taufetoko, tutuhia mo e vale lahi mahaki, po ke tau ekefakakelea mamahi. Ko e ha kakano ni, ko e tau fua kua maeke ke fakalolelole mo e moumou foki. Ne moua he kumikumiaga fakaekekafo nakai la leva hagaao ki a lautolu ne moua he tau logonaaga fakateaga  hagaao ki a lautolu ne fa hihiga ke nakai falanaki ki a lautolu mo e falu, ti fakalolelole noa e tau fakafetuiaga tata mo e tau fekapitigaaki. “Kakano ai,” he talahau he hokotaki ke he kumikumiaga, “kua ‘fakatu’ e lautolu e tau tutuaga ne fakamatakutaku lahi.”

Ko e tau tagata ne logona hifo pihia ko lautolu ne lauia ai he mena ne talahau he Tohi Tapu ke he ha lautolu ni a ‘tau manatu galo.’ (Salamo 94:19) Ne logona e lautolu kua nakai fai aoga a lautolu. Ka fai mena ne hepe, ne pauaki a lautolu ke tuku aki na lautolu. Pete he nava he falu a lautolu ke he tau mouaaga ha lautolu, ka ke he tau loto ha lautolu kua logona hifo e lautolu e tuga e ta lagatau ka nakai leva ti fakatapakupaku. He talitonu kua nakai aoga a lautolu he fiafia, tokologa ne mokulu ke he matematekelea fakatagata ha kua logona hifo e lautolu e nakai fai malolo ke fakahako ai. Ko Lena, kua talahau fakamua, ne fakatupu e puhala kai hagahagakelea ha ko e nakai ha ha ia ia e fakalilifu fakatagata, ti talahau e ia, “Ne logona e au e nakai maeke ke hiki ha mena taha.”

Kua matematekelea kia a lautolu ne taufetului ke he ‘tau manatu galo’ ke logona hifo pihia ke he moui katoa hana? Fai mena nakai ka taute ke utakehe aki e tau logonaaga pihia? Kua fakave he Tohi Tapu e tau matapatu fakaakoaga mo e tomatomaaga aoga ne lagomatai aki e tokologa ke kautu ke he taufetului pihia. Ko e heigoa falu matapatu fakaakoaga nei, ti kua lagomatai fefe a lautolu ne matematekelea i ai ke moua e olioli he moui? To fakamaama ai he vala tala ka mui mai.