He falu magaaho, ne moua mai he keli kelekele e tau mena ne fakamooli tonu po ke fakakite hagaao ke he tagata i loto he Tohi Tapu. Tuga anei, he 2011, ko e tau pulotu Israeli ne lolomi e vala tala hagaao ke he mouaaga ne fakamooli e mena ia. Ko e puha ne kua leva ke 2,000 tau tau​​—ne fakamanaia aki e puga ne tuku ai e tau polohui motua he tagata mate ne kua otioti e tau vala kakano.

Ko e puha nei ne tū ai e tala: “Ko Miriama ko e tama fifine he tama taane ha Yeshua ko Kaiafa, ko e ekepoa ha Maasia mai i Beth ʹImri.” Ko e ekepoa Iutaia ne mua ne putoia ke he fakafiliaga mo e mate ha Iesu ko Kaiafa. (Ioane 11:48-50) Ko e tagata tohia tala tuai ko Flavius Josephus ne talahau ko ia ko “Iosefa, ne fakahigoa ko Kaiafa.” Ne kitia maaliali ai ko e puha nei ko e puha he taha tagata mai he magafaoa haana. Ha ko e tala he puha pihia ne moua fakamua atu, ne manatu ai ko e puha he ekepoa ne mua ne fakahigoa a ia ko Yehosef bar Caiapha, po ko Iosefa, tama taane ha Kaiafa, a ti liga ko e magafaoa a Miriama mo Kaiafa.

Pehē e tau vala tala ne foaki mai he Israel Antiquities Authority (IAA), ko e puha ha Miriama ne liu moua mai he tau tagata kaihā ne fofō mai he tukuaga i tuai. Ko e kumikumiaga ke he koloa tuai nei mo e tala ne tū i ai kua fakamooli ko e mena moolioli a ia.

Ne talahau foki he puha ia e taha mena foou ki a tautolu. Kua hagaao ai ki a “Maasia,” ko e fakahikuaga he 24 e vahega ekepoa, ne gahua fakafetokaki he faituga i Ierusalema. (1 Nofo. 24:18) Ko e tala he puha nei kua fakakite “ko e magafaoa ha Kaiafa kua faoa mo e vahega ha Maasia,” he talahau he IAA.

Kua tū ai foki e tala ki a Beth ʹImri. Liga ha ha i ai ua e kakano ke he vala nei he tala. “Fakamua, liga ko e Beth ʹImri ko e higoa magafaoa he ekepoa​​—ko e tau fanau he tau tama taane ha Imere (Esera 2:36-37; Nehemia 7:39-42) ne putoia foki a lautolu ne tutupu mai he vahega ha Maasia,” he talahau he IAA. “Liga ko e kakano ke uaaki, ko [Beth ʹImri] ko e matakavi ne tupu mai a Miriama po ke magafaoa katoa haana.” Pete ni e kakano, kua foaki mai he puha ha Miriama e fakamooliaga na talahau he Tohi Tapu hagaao ke he tau tagata mooli ne fai magafaoa mooli.