Taha e lagomataiaga uho ke fahia ko e fakamafanaaga kua moua mai e tautolu he magafaoa, tau kapitiga, mo e tau matakainaga talitonu.

Ko e tau kupu totonu mo e fakaalofa mai he kapitiga kua tuga e lolo mulumulu ne fakatotoka mo e fakamalolō a tautolu. (Fakatai 16:24; 18:24; 25:11) Ka ko e tau Kerisiano mooli kua nakai manamanatu hokoia ni ke moua e mafanatia. Kua lali a lautolu “ke fakamafana age kia lautolu ha i ai ha matematekelea ke he fakamafanaaga kua fakamafanatia ai he Atua a [l]autolu.” (2 Kori. 1:4; Luka 6:31) Ne tupu e mena nei ki a Antonio, ko e leveki faahimotu i Mesikō.

He mogo ne iloa kua moua a ia he gagao lymphoma, ko e vahega kenesā kua lauia e toto, ne fakaatukehe lahi mahaki a Antonio. Pete ia, ne eketaha a ia ke tautaofi e tau logonaaga momoko haana. Ke he puhala fe? Ne lali a ia ke manatu e tau lologo he Kautu mo e uhu ai ke logona mo e manamanatu fakahokulo ke he tau kupu. Ko e liogi fakaleo lahi mo e totou e Tohi Tapu kua fakamafanatia lahi.

Ne mailoga e Antonio mogonei, ko e taha he mena ne lagomatai lahi mahaki a ia ne moua mai he haana tau matakainaga talitonu. Pehē a ia: “Magaaho ne momoko lahi au mo e hoana haaku, ne ole a maua ke he motua he fakapotopotoaga ko ia ko e taha he magafaoa ke hau ke liogi mo maua. Ne mafanatia a maua he mena nei ti fakatotoka a maua. Ti fakaaue lahi ke he lalagoaga he tau magafaoa mo e tau matakainaga fakaagaaga ha maua,” he ui e ia, “ne maeke ia maua ke kautū mai he tau logonaaga momoko he magaaho kū.” Kua loto fakaaue mooli a ia ke he tau kapitiga ia ne loto fakaalofa mo e leveki!

Taha lagomatai foki he tau magaaho tupetupe ko e agaaga tapu ne mavehe mai. Pehē e aposetolo ko Peteru ko e agaaga tapu he Atua ko e “mena foaki noa.” (Gahua 2:38) Ne fakamooli e mena ia he magaaho ne tokologa ne fakauku he Penetekoso 33 V.N. Ka e fakalaulahi ai kua maeke foki a tautolu oti ke moua e mena fakaalofa ia ko e agaaga tapu. Nakai fai fakaotiaga e mena fakaalofa nei, ti ko e ha ne nakai ole ke moua fakaloga ai?​​—Isaia 40:28-31.

Ne fakauka a Paulo ke he loga atu foki e tau mena uka, falu mogo ne fehagai mo e mate. (2 Kori. 1:8-10) Ka kua nakai matakutaku hopoate a Paulo ma e moui haana. Ne moua e ia e mafanatia he iloa kua lalago he Atua a ia. Tohi e ia: “Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti, Ko ia kua fakamafana mai a mautolu ke he ha mautolu a tau matematekelea oti.” (2 Kori. 1:3, 4) Ne nakai kaumahala a Paulo ke he momoko ni haana ki a ia. Ka kua lagomatai he tau kamatamata ne fakauka a ia ki ai ke feaki e fakaalofa hofihofi, ti kua mauokafua a ia ke fakamafana e falu he manako lagomatai a lautolu.

He malolō a Antonio mai he gagao haana ne maeke a ia ke liu ke he gahua faifano. Ne fakakite tumau e ia e fiafia ke he haana tau matakainaga talitonu, ti kua eketaha pauaki a ia mo e hoana haana ke ahiahi mo e atihake a lautolu kua gagao. Ma e fakatai, he mole e ahiahi atu ke he taha Kerisiano ne taufetului he gagao lahi, ne iloa e Antonio kua nakai fia fano e matakainaga nei ke he tau feleveiaaga. “Ne nakai kakano kua nakai fakaalofa a ia ki a Iehova po ke tau matakainaga,” he talahau e Antonio, “ka kua lauia e tau logonaaga haana he gagao ati manatu kua nakai aoga a ia.”

Ko e taha mena ne taute e Antonio ke atihake e matakainaga taane ne gagao ko e ole ki a ia ke taute e liogi he taha lafiaga fiafia ne mole laia. Pete kua maimainā e matakainaga, ne talia e ia e uiina. Ne pehē a Antonio: “Ko e mitaki ha ia e liogi haana, he mogo fakamui, kua tuga e tagata kehe a ia. Ne logona hifo e ia kua aoga a ia mogonei.”

Ē, he lahi po ke tote e matematekelea kua logona hifo e tautolu oti e lata ke fakauka ai. Ka e he talahau e Paulo, kua maeke e mena nei ke mautali a tautolu ke fakamafana e falu ka manako lagomatai a lautolu. Ko e mena ia, kia mataala a tautolu ke he matematekelea he tau matakainaga Kerisiano mo e fifitaki ha tautolu a Atua, ko Iehova, he eke mo punaaga he fakamafana e falu.