Ko e kifaga fulufuluola nakai fai leo ne fakamataulu A Trip Down Market Street kua futia fakalahi mai e tau tagata onoono ke he tau ata he puhala moui tuai i San Francisco, U.S.A., ke he mataulu he senetenari 20 aki. Ko e tau tagata taute kifaga ne poki e tau ata aki e pokiata vilo he lima ne tuku ki mua he motoka kua holo loa atu mo e kua fakahagaao ke he puhalatu kua lavelave lahi. Ko e tau mena he kifaga kua putoia e tau fata fakataveli ne toho he tau nua mo e tau motoka he vahā i tuai, mo e tau tagata fakatau koloa foki mo e tau tama taane fakafua nusipepa hane taute e tau gahua fa mahani.

Ko e mena kua fakalagalaga e tau aga momoko ke he kifaga nei kua liga taute ai ia Aperila 1906, ato tō e mafuike lahi mahaki mo e afi he aho 18 ia Aperila ne totou afe e tagata ne mamate mo e teitei ke moumou e faahi ia he maaga lahi. Mooli ai foki, falu tagata mata fiafia ne poki he kifaga ne liga gahoa ni e aho ne toe he moui ato mamate. “Kitia ni e au e tau tagata i ai,” he ui e Scott Miles, ko e magafaoa he taha he tau tagata ne taute e kifaga, “mo e ne nakai iloa e lautolu e mena kua teitei ke hoko ki a lautolu. Ti kua omoi lahi a koe ke fakaalofa ki a lautolu.”

Ha i ai e fakaakoaga aoga lahi ke moua kua tatai mo e vahā ha tautolu. Kua omoi lahi foki a tautolu ke fakaalofa ke he tau katofia ha tautolu. Matutaki ni a lautolu ke taute e tau gahua fa mahani ka kua pouli katoatoa ke he matematekelea lahi mahaki kua ha ha i mua ha lautolu​​—ko e moumouaga he fakatokaaga nei mo e he puhala moui ha lautolu. Pete ia, kua nakai tuga e mafuike ne hoko fakalutukia, kua fai magaaho kū agaia ke hataki atu ke he tau katofia ha tautolu hagaao ke he aho he fakafiliaga ha Iehova. Liga kua fitā e fakatoka e koe e magaaho he tau faahi tapu takitaha ke gahua ke he fekafekauaga mai he gutuhala ke he gutuhala, ka e maeke nakai a koe ke fakalahi ai ke hataki atu ke he falu?

Kua aoga e fakafifitakiaga ha Iesu kakano ne mautali tumau a ia. Ne fakamatala a ia ke he tau tagata oti ne feleveia mo ia, putoia e telona he puhalatu po ke fifine ne feleveia mo ia ke he vaipuna he okioki fakakū ai he tupou laā. (Luka 19:1-5; Ioane 4:5-10, 21-24) Pete ni foki he fakatoka e ia e taha magaaho ke okioki, ne makai a ia ke toka e tau pulega haana ka e fakaako atu ke he falu. Ne omoi a ia he fakaalofa hofihofi haana ma e tau katofia ke foaki fakalahi, nakai ko e fakamatala noa ni. (Mare. 6:30-34) Kua fifitaki fēfē e aga fakamafiti ha Iesu he vahā nei?

Ne nofo a Melika he fale tokoluga ne puipui lahi. Tokologa he tau katofia haana ko e tau tagata fakaako mai he tau motu kehe hane fakaaoga e tau selafoni kua nakai fakamau e tau numela mo e nakai fakamau e tau higoa ha lautolu he tohi he fale ia. Ne mailoga e ia e magaaho pauaki kua hafagi ki a ia ke kamata e tau fakatutalaaga fakaagaaga mo e tau tagata kua nonofo i loto he fale tokoluga haana he poko ke huhū atu mo e he lifi. Pehē a ia, “He taha puhala, kua manamanatu au ko e fonua haaku a ia.” Kua uta e Melika e falu tohi he tau vagahau kehekehe, ti tokologa ne talia e tau tuleke mo e tau mekasini. Takitaki foki e ia a lautolu ke he ha tautolu a faahi Kupega Hila, jw.org. Kua kamata e ia falu fakaako Tohi Tapu.

Kua mataala foki a Sonia ke fakamatala ke he ha tagata ka maeke a ia. Gahua a ia he fale ekekafo, mo e fakatoka e ia e foliaga ke fakamatala ki a lautolu kua gahua mo ia. Fakamua, ne eketaha a ia ke iloa e tau mena kua lata mo e tau fiafia he tau tagata takitokotaha. Ti fakaaoga e magaaho okioki kai laā haana ke kumi a lautolu takitokotaha mo e fakatutala ke he tau mena fakaagaaga. Ko e fua, ne maeke a Sonia ke kamata ua e fakaako Tohi Tapu. Kua manako foki a ia ke fakaaoga e falu magaaho okioki haana ke tutala mo lautolu ka fakatali ke he ekekafo he poko fakatali.

Taha tagata ne hao mai he mafuike he 1906 ne talahau “ko e mena tupu pauaki ne mua atu e matematekelea ke hoko ke he faahi motu po ke maaga.” Ka e he nakai leva, ko e tau mena tutupu matematekelea oti to eke mo tau mena ikiiki he fakatatai ai ke he aho ka taui atu ki a “lautolu [oti] kua nakai iloa e Atua.” (2 Tesa. 1:8) Kua manako lahi a Iehova ke hiki he tau tagata e tau manatu mo e tau loto ha lautolu ti talia e hatakiaga hane fakapuloa he haana a Tau Fakamoli.​​—2 Pete. 3:9; Fakakite. 14:6, 7.

Ha ha ia koe e kotofaaga uho ke hafagi e tau mata he tau tagata ke he tau magaaho uka ha tautolu mo e lagomatai a lautolu ke haga kehe mai he tau manako lotokai ke maeke ke kumi a Iehova. (Sefa. 2:2, 3) Maeke nakai a koe ke fakaaoga e tau magaaho oti ke fakamatala ke he haau a tau kapitiga gahua, haau a tau katofia, mo e ki a lautolu kua feleveia mo koe he taute e koe e tau fekau fa mahani haau he aho? To fai mena foki nakai a koe ke taute ke hataki e falu?