HE MOGO ne tuga e kovili e matagahua fakamatala ne hiva e aho ia Aokuso/Septema 1929, molea 10,000 e tagata fakamatala ne o atu ke he motu katoa he Tau Faahi Kaufakalataha. Ne foaki e lautolu kuata e miliona tohi mo e tau tohi ikiiki ke he tau tagata. He tau tagata fakapuloa ia he Kautu, ne kavi taha e afe ha lautolu e tau tagata foafoa. Kua tupu mooli e numera ha lautolu! Ne fakailoa he Bulletin a kua “ofoofogia” ha kua fakalahi tolu e numera he tau paionia he 1927 ke he 1929.

He matahiku he 1929, ne matematekelea lahi e tuaga fakatupe. He Black Tuesday​​—ia Oketopa 29, 1929​—​ne tomo e tau tupe he New York Stock Exchange ti lauia e tuaga fakatupe he lalolagi katoa mo e hoko ke he Great Depression. Ne totou afe e tau pege ne tomo. Nakai gahuahua e tau faama. Pāpā hifo e tau fale gahua lalahi. Totou miliona ne ai fai gahua. He 1933, ko e tau tupe kaitalofa he U.S. ma e tau kaina ne liuaki, ne hokotia ke he 1,000 he taha e aho.

Fahia fēfē e tau matakainaga fakamatala tumau ha ko e lekua ia? Taha puhala ko e kaina i luga he tulela. Ha kua nakai fai totogi mo e nakai fai tukuhau, ko e motokā ne taute ke tuga e fale ne fakaatā e tokologa he tau paionia ke fakatumau ke he fekafekauaga ha lautolu mo e tote e tupe ne fakamole. b He tau magaaho fonoaga, ne eke e kaina utafano mo poko hotela ne nakai totogi. He 1934, ne tohi i loto he Bulletin e palana matafeiga ke lata mo e kaina tote pihia ka e hagahaga mitaki ne fai fakatokaaga vai, sitou kaitunu, mohega ne pepelu, mo e fakaalo mafana ke lata mo e makalili.

Ko e tau matakainaga lotomatala ne gahua fakamatala he lalolagi katoa ne talaga e tau kaina ha lautolu ne maeke ke utafano. “Ne nakai iloa a Noa ke ta e vaka,” he talahau e Victor Blackwell, “ti nakai iloa au po ke fai lotomatala ke ta e fale i luga he tulela.” Ka e talaga ni e ia.

Ko Avery mo Lovenia Bristow ne taha e fale he motokā. Ne pehē a Avery, “Tatai au mo e fonu he gati haana​​—ne uta tumau e kaina haaku mo au.” Ne paionia e tau Bristow mo Harvey mo Anne Conrow, ko e tau kaupā he kaina utafano ha laua ne taute aki e tau laupepa ne vali aki e tar. Ne mafolefole tumau e tau laupepa ka hiki e kaina ha laua. “Nakaila fai tagata ia ne kitia ha fale pihia,” he talahau e Avery, “ti nakaila fai ia ne kitia ha fale pihia he tali mai!” Ka e pehē a Avery ko e magafaoa Conrow mo e tau tama taane tokoua ha laua “ko e magafaoa ne mua atu e fiafia.” Ne tohia e Harvey Conrow, “Ne nakai mativa a mautolu he ha mena taha, mo e kua mauokafua katoatoa a mautolu ke he fekafekauaga ha Iehova mo e levekiaga fakaalofa haana.” Ko e magafaoa tokofā ha Conrow ne o atu ke he Aoga Kiliata he mogo fakamui ti kotofa ko e tau misionare ki Peru.

Ne paionia foki e magafaoa Battaino. He iloa e Giusto mo Vincenza ko e eke fai a laua mo tau matua, ne hikihiki e laua e tulaki 1929 Model A Ford ke eke  mo kaina “ne tuga e hotela mitaki lahi” he fakatatai mo e tau fale ie ne nonofo a laua he mogo fakamua. Mo e tama fifine tote ha laua, ne matutaki a laua he fekafekauaga ne fiafia a laua ki ai, ko e fakamatala ke he tau Italia ne nonofo he Tau Faahi Kaufakalataha.

Ne tokologa e tagata ne fanogonogo ke he tala mitaki, ka e lavea e tau tagata ne mativa mo e nakai gahua tupe ke foaki e tupe ma e tau tohi faka-Tohi Tapu. Ka kua foaki e lautolu e tau koloa kehekehe ke tautui aki. Tokoua e paionia ne tohi hifo 64 e koloa kehekehe ne age he tau tagata ne fiafia. Ne tatai ai mo e “tohi fakamau koloa mai he fale koloa he faama.”

Ne feleveia a Fred Anderson mo e tagata gahua fonua ne manako ke he fufuta pepa ha tautolu ti foaki e tioata totou he matua fifine haana ke tautui aki. Ne fina atu a ia ke he taha faama ti fiafia e tagata taane ke he tau tohi ha tautolu ka e pehē, “Ai fai tioata au ke totou aki.” He mogo ne tau e ia tioata he katofia haana, ne maeke a ia ke totou e tau tohi ti foaki e mena fakaalofa ma e tau tohi mo e tioata.

Ko Herbert Abbott ne uta e pā moa he motokā haana. He mole e moua e ia tolu po ke fā e moa, ne uta e ia e tau moa ke he makete ti fakafua mo e fakaaoga e tupe ke utu aki e motokā haana. “Fai magaaho nakai ne teitei a maua ke ai fai tupe? Ē fai,” he tohi e ia, “ka e nakai fakaatā e maua e mena ia ke taofi aki a maua. Ka fai penisini e motokā ha maua, ne ō a maua, he tua mo e falanaki ki a Iehova.”

Ko e falanaki ki a Iehova mo e eketaha fakamalolō ne kautū ai e tau tagata haana he tau tau uka lahi ia. He taha mogo ne tō lahi e uha, ko Maxwell mo Emmy Lewis ne hao fetamakina mai he ha laua a kaina i luga he tulela mo e onoono ki ai he veli hifo e akau ki luga ti malona. “Nakai ko e tau mena ia ke mataofi ai,” he tohi e Maxwell, “ko e tau tama lekua ni, ka e nakai lagataha e manamanatu a maua ke fakaoti e fekafekauaga. Ne lahi agaia e gahua ke taute, ti amanaki a maua ke taute ai.” He nakai tukumuli mo e he lagomatai he tau kapitiga loto fakaalofa, ne liu a Maxwell mo Emmy talaga ha laua a kaina i luga he tulela.

He tau magahala ne paleko ki a tautolu ni, ne pihia foki e aga foaki noa he totou miliona he Tau Fakamoli fakamakutu ha Iehova. He tuga ni e tau paionia fakamua ia, kua eketaha a tautolu ke taute e gahua fakamatala ato pehē a Iehova kua oti tuai e gahua.